ಟೋಕಿಯೊ: ಆಸ್ಪ್ರೇಲಿಯಾದ ಯುವ ತಾರೆ ನಿಕ್‌ ಕಿರಿಯೋಸ್‌, ಇಲ್ಲಿ ಮುಕ್ತಾಯಗೊಂಡ ಜಪಾನ್‌ ಓಪನ್‌ ಟೆನಿಸ್‌ ಟೂರ್ನಿಯ ಪುರುಷರ ಸಿಂಗಲ್ಸ್‌ನಲ್ಲಿ ಪ್ರಶಸ್ತಿ ಮುಡಿಗೇರಿಸಿಕೊಂಡಿದ್ದಾರೆ. ಇಲ್ಲಿನ ಅರಿಕೆ ಕೊಲ್ಸಿಯಂ ಅಂಗಣದಲ್ಲಿ ಭಾನುವಾರ ನಡೆದ ಪುರುಷರ ಸಿಂಗಲ್ಸ್‌ ಫೈನಲ್‌ ಪಂದ್ಯದಲ್ಲಿ ಒತ್ತಡ ನಿಭಾಯಿಸಿದ ಕಿರಿಯೋಸ್‌, 4-6, 6-3, 7-5 ಅಂತರದ ಸೆಟ್‌ಗಳಿಂದ ಬೆಲ್ಜಿಯಂನ ಆಟಗಾರ ಡೇವಿಡ್‌ ಗಾಫಿನ್‌ಗೆ ಸೋಲುಣಿಸಿದರು. ಪಂದ್ಯದಲ್ಲಿ ಗಂಟೆಗೆ 220 ಕಿ.ಮೀ ವೇಗದಲ್ಲಿ ಸರ್ವ್‌ ಸಿಡಿಸುತ್ತ ಪರಾಬಲ್ಯ ಮರೆದ ಕಿರಿಯೋಸ್‌, ಮೊದಲ ಸೆಟ್‌ ವೈಫಲ್ಯವನ್ನು ಮೆಟ್ಟಿನಿಂತು ವಿಶ್ವದ 14ನೇ ರಾರ‍ಯಂಕ್‌ನ ಆಟಗಾರ ಗಾಫಿನ್‌ ಸವಾಲನ್ನು ಅಂತ್ಯಗೊಳಿಸಿದರು. ವಿಶ್ವದ 15ನೇ ರಾರ‍ಯಂಕ್‌ ಹೊಂದಿರುವ ಕಿರಿಯೋಸ್‌, ಪಂದ್ಯದಲ್ಲಿ 11 ಬ್ರೇಕ್‌ ಪಾಯಿಂಟ್‌ಗಳನ್ನು ಉಳಿಸಿಕೊಳ್ಳುವ ಮೂಲಕ ಪ್ರಶಸ್ತಿ ತಮ್ಮದಾಗಿಸಿಕೊಂಡರು. ಗಾಯದ ಸಮಸ್ಯೆಯಿಂದಾಗಿ ಹಾಲಿ ಚಾಂಪಿಯನ್‌ ಸ್ವಿಜರ್ಲೆಂಡ್‌ನ ಸ್ಟ್ಯಾನಿಸ್ಲಾಸ್‌ ವಾವ್ರಿಂಕಾ ಮತ್ತು ಮಾಜಿ ಚಾಂಪಿಯನ್‌ ಅರ್ಜೆಂಟಿನಾದ ಜುವಾನ್‌ ಮಾರ್ಟಿನ್‌ ಡೆಲ್‌ಪೋಟ್ರೊ ಟೂರ್ನಿಯಿಂದ ಹಿಂದೆ ಸರಿದಿದ್ದರು.
↧
ಕಿರಿಯೋಸ್‌ಗೆ ಜಪಾನ್‌ ಕಿರೀಟ
↧