* ಫೆ.2 ಅಥವಾ ಅದಕ್ಕೂ ಮುನ್ನ ಬಜೆಟ್‌ ಮಂಡನೆ ಸಂಭವ * 2017ರ ಏಪ್ರಿಲ್‌ನಲ್ಲಿ ಜಿಎಸ್‌ಟಿ ಜಾರಿಗೆ ಅನುಕೂಲ ನಿರೀಕ್ಷೆ ಹೊಸದಿಲ್ಲಿ: ಹಣಕಾಸು ಸಚಿವಾಲಯವು ಫೆಬ್ರವರಿ 2ರಂದು ಅಥವಾ ಅದಕ್ಕೂ ಮುನ್ನ ಕೇಂದ್ರ ಬಜೆಟ್‌ ಅನ್ನು ಮಂಡಿಸಲು ಉತ್ಸುಕವಾಗಿದೆ. ಈ ಸಂಬಂಧ ಹಣಕಾಸು ಸಚಿವಾಲಯವು ಸಂಸದೀಯ ಸಮಿತಿಯ ಎದುರು ವಿವರಣೆ ನೀಡಿದೆ. ನಾನಾ ಬಗೆಯ ಆರ್ಥಿಕ ಸುಧಾರಣಾ ಪ್ರಕ್ರಿಯೆಗಳಿಗೆ ಇದರಿಂದ ಸಹಾಯಕವಾಗಲಿದೆ ಎಂದು ಹಣಕಾಸು ಕಾರ್ಯದರ್ಶಿ ಅಶೋಕ್‌ ಲಾವಾಸಾ ಅವರು ಸಂಸದೀಯ ಸಮಿತಿಗೆ ಮನವರಿಕೆ ಮಾಡಿಕೊಟ್ಟರು ಎಂದು ಮೂಲಗಳು ತಿಳಿಸಿವೆ. ಪ್ರಸ್ತುತ ಕೇಂದ್ರ ಬಜೆಟ್‌ ಅನ್ನು ಸಾಮಾನ್ಯವಾಗಿ ಫೆಬ್ರವರಿ ತಿಂಗಳಿನ ಕೊನೆಯ ದಿನದಂದು ಮಂಡಿಸಲಾಗುತ್ತಿದೆ. ಕೇಂದ್ರ ಬಜೆಟ್‌ ಜತೆಗೆ ರೈಲ್ವೆ ಬಜೆಟ್‌ ಅನ್ನು ವಿಲೀನಗೊಳಿಸುವುದರಿಂದ ಉಂಟಾಗುವ ಪ್ರಯೋಜನಗಳ ಬಗ್ಗೆಯೂ ಚರ್ಚೆ ನಡೆಯಿತು. ಮೂಲಗಳ ಪ್ರಕಾರ ಹಣಕಾಸು ಸಚಿವಾಲಯವು ಜನವರಿ 30 ಮತ್ತು ಫೆಬ್ರವರಿ 2ರೊಳಗೆ ಬಜೆಟ್‌ ಮಂಡಿಸಲು ಯೋಚಿಸಿದೆ. ಇಡೀ ಬಜೆಟ್‌ ಪ್ರಕ್ರಿಯೆಯನ್ನು ಮಾರ್ಚ್‌ 31ರೊಳಗೆ ಪೂರ್ಣಗೊಳಿಸುವುದು ಇದರ ಉದ್ದೇಶ. ಜಿಎಸ್‌ಟಿಯನ್ನು 2017ರ ಏಪ್ರಿಲ್‌ 1ರಿಂದ ಜಾರಿಗೊಳಿಸುವ ಉದ್ದೇಶ ಇರುವುದರಿಂದ ಬಜೆಟ್‌ ಅನ್ನು ಮುಂಚಿತವಾಗಿ ಮಂಡಿಸುವುದು ಮುಖ್ಯ ಎನ್ನಲಾಗಿದೆ. ಬಜೆಟ್‌ ಪ್ರಕ್ರಿಯೆಯನ್ನು ಸಂಸತ್ತಿನಲ್ಲಿ ಪೂರ್ಣಗೊಳಿಸಲು ಸರಕಾರಕ್ಕೆ 8-9 ವಾರಗಳು ಬೇಕಾಗುತ್ತದೆ. ಪ್ರತ್ಯೇಕ ರೈಲ್ವೆ ಬಜೆಟ್‌ ಮಂಡನೆಯ ಪದ್ಧತಿಯು 1924ರಲ್ಲಿ ಆರಂಭವಾಗಿತ್ತು.
↧
ಫೆ.2ಕ್ಕೆ ಬಜೆಟ್‌ ಮಂಡಿಸಲು ಹಣಕಾಸು ಸಚಿವಾಲಯ ಇಂಗಿತ
↧