ಚಿನ್ನದ ದರದಲ್ಲಿ 730 ರೂ. ಕುಸಿತ / ಬೆಳ್ಳಿ 1,750 ರೂ. ಅಗ್ಗ ಹೊಸದಿಲ್ಲಿ: ಚಿನ್ನದ ವ್ಯಾಮೋಹಿಗಳಿಗೆ ಇದು ಸಿಹಿ ಸುದ್ದಿ. ಬಂಗಾರದ ದರ ಬುಧವಾರ ಒಂದೇ ದಿನ 730 ರೂ.ರಷ್ಟು ಕಡಿಮೆಯಾಗಿದೆ. ಈಗ ದಿಲ್ಲಿಯಲ್ಲಿ 10 ಗ್ರಾಂ ಚಿನ್ನದ ದರ 30,520 ರೂ.ಗೆ ತಗ್ಗಿತು. ಆದರೆ ಬಂಗಾರದಲ್ಲಿ ಹೂಡಿಕೆ ಮಾಡಲು ಬಯಸುವವರಿ ಮಾತ್ರ ತುಸು ಯೋಚಿಸುವುದು ಸೂಕ್ತ. ಬಂಗಾರದ ಬೆಲೆ ಮತ್ತಷ್ಟು ಇಳಿಕೆಯಾಗುವ ಸಾಧ್ಯತೆ ಇದೆ ಎಂದು ತಜ್ಞರು ಭವಿಷ್ಯ ನುಡಿದಿದ್ದಾರೆ. ಚಿನ್ನದ ದರ ದಿಲ್ಲಿಯಲ್ಲಿ ಪ್ರತಿ 10 ಗ್ರಾಮ್‌ಗೆ 30,520 ರೂ.ಗೆ ಬುಧವಾರ ಮುಗ್ಗರಿಸಿತು. ಅಮೆರಿಕದಲ್ಲಿ ಬಡ್ಡಿ ದರಗಳು ಏರಿಕೆಯಾಗುವ ಸಾಧ್ಯತೆ ಉಂಟಾಗಿದೆ. ಇದರ ಪರಿಣಾಮ ಹೂಡಿಕೆದಾರರು ಹಳದಿ ಲೋಹದಲ್ಲಿನ ಹೂಡಿಕೆಯನ್ನು ಹಿಂತೆಗೆದುಕೊಂಡಿರುವುದು ದರ ಕುಸಿತಕ್ಕೆ ಕಾರಣವಾಗಿದೆ. ಬೆಳ್ಳಿಯ ದರ ಕೂಡ ಪ್ರತಿ ಕೆ.ಜಿಗೆ 1,750 ರೂ. ಕುಸಿದಿದ್ದು, 43,250 ರೂ.ಗೆ ತಗ್ಗಿತು. ಜಾಗತಿಕ ಮಾರುಕಟ್ಟೆಯಲ್ಲಿ ಚಿನ್ನದ ದರ ಕಳದ ಜೂನ್‌ ನಂತರ ಇದೇ ಮೊದಲ ಬಾರಿಗೆ ಪ್ರತಿ ಔನ್ಸಿಗೆ 1,300 ಡಾಲರ್‌ಗೆ ಕುಸಿಯಿತು. ಅಮೆರಿಕದಲ್ಲಿ ಫೆಡರಲ್‌ ರಿಸರ್ವ್‌ ಶೀಘ್ರದಲ್ಲಿಯೇ ದರ ಏರಿಕೆ ಮಾಡುವ ಸಾಧ್ಯತೆ ಇರುವುದೇ ಇದಕ್ಕೆ ಕಾರಣ ಎಂದು ವಿಶ್ಲೇಷಕರು ಹೇಳಿದ್ದಾರೆ. ಮುಂಬರುವ ದಿನಗಳಲ್ಲಿ ಅಮೆರಿಕದಲ್ಲಿ ಬಡ್ಡಿ ದರ ಏರಿಕೆಯಾದರೆ, ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಚಿನ್ನ ಮತ್ತಷ್ಟು ಕುಸಿಯಲಿದೆ. ಅದು ಭಾರತದ ಚಿನಿವಾರ ಪೇಟೆಯ ಮೇಲೆ ಕೂಡ ಪ್ರಭಾವ ಬೀರಲಿದೆ. ಏಕೆಂದರೆ ಭಾರತ ಬಂಗಾರಕ್ಕೆ ಆಮದನ್ನು ಅವಲಂಬಿಸಿದ್ದು, ಜಾಗತಿಕ ದರದ ಏರಿಳಿತದ ನೇರ ಪ್ರಭಾವಕ್ಕೆ ಒಳಗಾಗುತ್ತಿದೆ.
↧
ಚಿನ್ನ, ಬೆಳ್ಳಿಯ ದರ ಭಾರಿ ಇಳಿಕೆ
↧