ಇದೀಗ ಯಶ್‌ನೊಂದಿಗೆ ನಟಿಸುತ್ತಿರುವ 'ಸಂತು ಸ್ಟ್ರೈಟ್‌ಫಾರ್ವಡ್' ಚಿತ್ರದ ಚಿತ್ರೀಕರಣದಲ್ಲಿ ರಾಧಿಕಾ ಬ್ಯುಸಿಯಾಗಿದ್ದಾರೆ. ಕಳೆದ ಆಗಸ್ಟ್‌ನಲ್ಲಿ ನಿಶ್ಚಿತಾರ್ಥ ಮಾಡಿಕೊಂಡಿರುವ ಈ ನಟಿ, ಮದುವೆ ನಂತರ ಚಿತ್ರದಲ್ಲಿ ನಟಿಸುವುದನ್ನು ನಿಲ್ಲಿಸುತ್ತಾರೆಂಬ ಸುದ್ದಿ ಹರಡಿದೆ. ಈ ಊಹಾಪೋಹಕ್ಕೆ ನಟಿಯ ಆಪ್ತ ಮೂಲಗಳು ತೆರೆ ಎಳೆದಿದ್ದು, 'ಮುಂದೆಯೂ ನಟಿಸಲಿದ್ದಾರೆ' ಎಂಬುದನ್ನು ಬೆಂಗಳೂರು ಮಿರರ್‌ಗೆ ಖಚಿತಪಡಿಸಿವೆ.
ಸಾಮಾನ್ಯವಾಗಿ ನಟಿಯರು ಮದುವೆಯಾದ ನಂತರ ನಟನೆಯನ್ನು ಬಿಟ್ಟು ಬಿಡುತ್ತಾರೆ. ರಾಧಿಕಾ ವಿಷಯದಲ್ಲಿಯೂ ಇದೇ ಆಗಲಿದೆ ಎಂದೇ ಜನರು ಭಾವಿಸಿದ್ದಾರೆ. ಆದರೆ, 'ಯಶ್ ಈ ವಿಷಯದಲ್ಲಿ ಸ್ವಾತಂತ್ರ್ಯ ನೀಡಿದ್ದು, ಅಭಿನಯ ಮುಂದುವರಿಸಿರುವುದರಿಂದ ದಾಂಪತ್ಯ ಜೀವನಕ್ಕೆ ತೊಂದರೆಯಾಗುವುದಿಲ್ಲ,' ಎಂದು ಮೂಲಗಳು ಹೇಳಿವೆ.
ಡಿಸೆಂಬರ್ ಕಡೆ ಅಥವಾ ಜನವರಿ ಮೊದಲ ವಾರದಲ್ಲಿ ಈ ಜೋಡಿ ಸಪ್ತಪದಿ ತುಳಿಯಲಿದ್ದು, ಇನ್ನೂ ದಿನಾಂಕ ಅಂತಿಮಗೊಂಡಿಲ್ಲ. ರಾಜ್ಯದಲ್ಲಿ ಕಾವೇರಿ ವಿವಾದದಿಂದ ಸಮಸ್ಯೆಗಳು ತಲೆದೋರುತ್ತಿರುವುದರಿಂದ ಮದುವೆಯನ್ನು ಮುಂದೂಡುವ ಸಾಧ್ಯತೆಗಳೂ ಇವೆ.
ರಾಧಿಕಾ-ಯಶ್ ಜೋಡಿ ಕೆಲವು ಧಾರಾವಾಹಿಗಳಲ್ಲಿ ಒಟ್ಟಾಗಿ ಅಭಿನಯಿಸಿದ ನಂತರ 'ಡ್ರಾಮಾ,' 'ಮಿ.ಆ್ಯಂಡ್ ಮಿಸಸ್ ರಾಮಾಚಾರಿ,'ಯಲ್ಲಿ ನಟೆಸಿದ್ದು, ಈ ಚಿತ್ರಗಳು ಬಾಕ್ಸ್‌ ಆಫೀಸ್ ಕೊಳ್ಳೆ ಹೊಡೆದಿವೆ. ಇದೀಗ ತಮ್ಮ 20ನೇ ಚಿತ್ರ 'ಸಂತು ಸ್ಟ್ರೈಟ್‌ಫಾರ್ವಡ್' ಶೂಟಿಂಗ್‌ನಲ್ಲಿದ್ದಾರೆ ರಾಧಿಕಾ. ಈ ವರ್ಷದಲ್ಲಿ ತೆರೆ ಕಂಡ 'ಝೂಮ್ 'ಮತ್ತು 'ದೊಡ್ಮನೆ ಹುಡುಗ'ದಲ್ಲಿಯೂ ರಾಧಿಕಾ ನಾಯಕಿ.
ಬೆಂಗಳೂರು: ಇದೀಗ ಬಿಡುಗಡೆಯಾದ 'ದೊಡ್ಮನೆ ಹುಡುಗ'ನಿಗೆ ಅತ್ಯುತ್ತಮ ಪ್ರತಿಕ್ರಿಯೆ ಸಿಗುತ್ತಿದ್ದು, ಡಿಸೆಂಬರ್‌ನಲ್ಲಿ ನಟ ಯಶ್‌ನೊಂದಿಗೆ ದಾಂಪತ್ಯ ಜೀವನಕ್ಕೆ ಕಾಲಿರಿಸುತ್ತಿರುವ ಬಹು ಬೇಡಿಕೆಯ ನಟಿ ರಾಧಿಕಾ ಪಂಡಿತ್ ಮದುವೆ ನಂತರವೂ ಅಭಿನಯವನ್ನು ಮುಂದುವರಿಸುತ್ತಾರಂತೆ.