ಆಂಧ್ರದ ಶ್ರೀಹರಿಕೋಟಾದ ಸತೀಶ್‌ ಧವನ್‌ ಬಾಹ್ಯಾಕಾಶ ಕೇಂದ್ರಿಂದ ನೆರವೇರಲಿರುವ ಈ ಉಡಾವಣೆಯು ಸುದೀರ್ಘ ಉಡಾವಣಾ ಪ್ರಕ್ರಿಯೆಗಾಗಿ ಹೊಸ ಮೈಲುಗಲ್ಲು ಸೃಷ್ಟಿಸಲಿದೆ. ಸುಮಾರು 2 ಗಂಟೆ 15 ನಿಮಿಷಗಳ ದೀರ್ಘಾವಧಿಯಲ್ಲಿ ಇಸ್ರೊ 8 ರಾಕೆಟ್‌ಗಳನ್ನು ಎರಡು ವಿಭಿನ್ನ ಕಕ್ಷೆಗಳಿಗೆ ಸೇರಿಸಲಿದೆ.
ಉಪಗ್ರಹಗಳನ್ನು ಹೊತ್ತ 'ಪಿಎಸ್‌ಎಲ್‌ವಿ-ಸಿ35' ಸೋಮವಾರ ಬೆಳಗ್ಗೆ ಸರಿಯಾಗಿ 9.12ಕ್ಕೆ ರಾಕೆಟ್‌ ನಭಕ್ಕೆ ಚಿಮ್ಮಲಿದ್ದು, ಇದಕ್ಕಾಗಿ ಶನಿವಾರ ಬೆಳಗ್ಗೆ 8.42ರಿಂದಲೇ ಕ್ಷಣಗಣನೆ ಶುರುವಾಗಿದೆ.
ಪಿಎಸ್‌ಎಲ್‌ವಿ ರಾಕೆಟ್‌ 377 ಕಿಲೋ ತೂಕದ 'ಸ್ಕಾಟ್‌ಸ್ಯಾಟ್‌-1' ಹಾಗೂ ಇತರೆ ಏಳು ಉಪಗ್ರಹಗಳನ್ನು ಉತ್ತರ ಧ್ರುವ ಸೂರ್ಯ ಸಮಕಾಲಿಕ ಕಕ್ಷೆಗೆ (ಪೋಲಾರ್‌ ಸನ್‌ ಸಿಂಕ್ರ್ರೊನಸ್‌ ಆರ್ಬಿಟ್‌) ಸೇರಿಸಲಿದೆ.
ಸ್ಕಾಟ್‌ಸ್ಯಾಟ್‌-1 ಉಪಗ್ರಹವನ್ನು 730 ಕಿ.ಮೀ. ದೂರದ ಉತ್ತರ ಧ್ರುವ ಸೂರ್ಯ ಸಮಕಾಲಿಕ ಕಕ್ಷೆಗೆ ಸೇರಿಸಿದರೆ, ಇನ್ನುಳಿದ 7 ಉಪಗ್ರಹಗಳು 670 ಕಿ.ಮೀ. ದೂರದ ಉತ್ತರ ಧ್ರುವ ಕಕ್ಷೆಗೆ ಸೇರಲಿವೆ ಎಂದು ಇಸ್ರೊ ತಿಳಿಸಿದೆ.
ಭಾರತದ 'ಸ್ಕಾಟ್‌ಸ್ಯಾಟ್‌-1', ಅಲ್ಜೆರಿಯಾದ 5 ಉಪಗ್ರಹಗಳು, ಕೆನಡಾ ಮತ್ತು ಅಮೆರಿಕದ ತಲಾ 1 ಸ್ಯಾಟೆಲೈಟ್‌ಗಳು, ಮುಂಬಯಿನ ಐಐಟಿ ವಿದ್ಯಾರ್ಥಿ ನಿರ್ಮಿಸಿದ 'ಪ್ರಥಮ್‌ (10 ಕೆಜಿ) ಮತ್ತು ಬೆಂಗಳೂರಿನ ಪಿಇಎಸ್‌ ವಿದ್ಯಾರ್ಥಿ ನಿರ್ಮಿಸಿದ 'ಪಿಸ್ಯಾಟ್‌ (5.25) ಉಪಗ್ರಹಗಳನ್ನು ರಾಕೆಟ್‌ ಕಕ್ಷೆಗೆ ತಲುಪಿಸಲಿದೆ.
4ನೇ ಹಂತ ನಿರ್ಣಾಯಕ
ಎರಡನೇ ಬಾರಿಗೆ ಒಂದೇ ರಾಕೆಟ್‌ ಮೂಲಕ ಹಲವು ಉಪಗ್ರಹಗಳನ್ನು ವಿಭಿನ್ನ ಕಕ್ಷೆಗಳಿಗೆ ಸೇರಿಸುವ ಪ್ರಯೋಗಕ್ಕೆ ಇಸ್ರೊ ಕೈ ಹಾಕಿದ್ದು, ಇದರ ಭಾಗವಾಗಿ ನಾಲ್ಕನೇ ಹಂತದಲ್ಲಿ ರಾಕೆಟ್‌ ಎಂಜಿನ್‌ ಆಫ್‌ ಮತ್ತು ಆನ್‌ ಮಾಡಲಾಗುತ್ತದೆ (ಮಲ್ಟಿಪಲ್‌ ಬರ್ನ್‌ ಟೆಕ್ನಾಲಜಿ). ಈ ವೇಳೆ, ಅತೀವ ಉಷ್ಣತೆ ಹೊಂದಿರುವ ಎಂಜಿನ್‌ ಅನ್ನು ಅತ್ಯಂತ ಕಡಿಮೆ ಅವಧಿಯಲ್ಲಿ ಕೂಲ್‌ ಮಾಡಿ ಅದಕ್ಕೆ ಮತ್ತೆ ಚಾಲನೆ ಮಾಡುವುದು ವಿಜ್ಞಾನಿಗಳ ಪಾಲಿಗೆ ಅತ್ಯಂತ ಸವಾಲಿನ ಹಾಗೂ ಮಹತ್ವದ ಕಾರ್ಯವಾಗಿದೆ. ಇಡೀ ಯೋಜನೆಯ ಯಶಸ್ಸು ಈ ಹಂತದಲ್ಲೇ ನಿರ್ಣಯವಾಗಲಿದೆ. ಈ ಹಂತದಲ್ಲಿ ಎರಡು ಬಾರಿ ಎಂಜಿನ್‌ ಆಫ್‌ ಮಾಡಿ, ಅಲ್ಲಿಂದ ರಾಕೆಟ್‌ ಅನ್ನು ಪುನಃ ಮತ್ತೊಂದು ಕಕ್ಷೆಯತ್ತ ಹಾರಿಸಲಾಗುತ್ತದೆ. ಈ ಮುನ್ನ ಡಿ.2015ರಲ್ಲಿ ಇಸ್ರೊ ಸಿಂಗಪುರದ 6 ರಾಕೆಟ್‌ಗಳನ್ನು ವಿಭಿನ್ನ ಕಕ್ಷೆಗಳಿಗೆ ಸೇರಿಸಿತ್ತಾದರೂ, ಉಡಾವಣಾ ಪ್ರಕ್ರಿಯೆ ಇಷ್ಟು ಸುದೀರ್ಘವಾಗಿರಲಿಲ್ಲ.
ಸ್ಕಾಟ್‌ಸ್ಯಾಟ್‌-1 ಲಾಭವೇನು?
ಇಸ್ರೊ ನಿರ್ಮಿತಿ 'ಸ್ಕಾಟ್‌ಸ್ಯಾಟ್‌-1' ಉಪಗ್ರಹವು ಚಂಡಮಾರುತ ಸೇರಿದಂತೆ ಹಲವು ಹವಾಮಾನ ಸಂಬಂಧಿತ ಮುನ್ಸೂಚನೆಗಳು ಹಾಗೂ ಟ್ರ್ಯಾಕಿಂಗ್‌ ಸರ್ವಿಸ್‌ಗೆ ನೆರವಾಗಲಿದೆ.
ಶ್ರೀಹರಿಕೋಟಾ: ಇಸ್ರೊ ಮತ್ತೊಂದು ಮೈಲುಗಲ್ಲಿಗೆ ಸಜ್ಜಾಗಿದೆ. ಸಾಗರ ಮತ್ತು ಹವಾಮಾನ ಅಧ್ಯಯನ ಉದ್ದೇಶದ ಭಾರತದ 'ಸ್ಕಾಟ್‌ಸ್ಯಾಟ್‌-1' ಉಪಗ್ರಹ ಹಾಗೂ ಅಮೆರಿಕ, ಕೆನಡಾ ಸೇರಿದಂತೆ ಐದು ರಾಷ್ಟ್ರಗಳು ಮತ್ತು ಎರಡು ಭಾರತೀಯ ವಿವಿಗಳಿಗೆ ಸೇರಿದ ಒಟ್ಟು 8 ಉಪಗ್ರಹಗಳನ್ನು ಇಸ್ರೋ ಸೋಮವಾರ ಕಕ್ಷೆಗೆ ಸೇರಿಸಲಿದೆ. ಈ ಪೈಕಿ ಬೆಂಗಳೂರಿನ ಪಿಇಎಸ್‌ ವಿವಿ ವಿದ್ಯಾರ್ಥಿ ಅಭಿವೃದ್ಧಿ ಪಡಿಸಿರುವ ಉಪಗ್ರಹವೂ ಸೇರಿರುವುದು ವಿಶೇಷ.