ಟೆಸ್ಟ್‌ ಕ್ರಿಕೆಟ್‌ನ ಬೌಲಿಂಗ್‌ ಹೀರೋಗಳು

ಬೆಂಗಳೂರು: ಭಾರತೀಯ ಟೆಸ್ಟ್‌ ಕ್ರಿಕೆಟ್‌ಗೆ ಗುರುವಾರ ಸ್ಮರಣೀಯ ದಿನ. ಅಂದು ಭಾರತ ತಂಡ ಟೆಸ್ಟ್‌ ಚರಿತ್ರೆಯಲ್ಲಿ ತನ್ನ 500ನೇ ಪಂದ್ಯವಾಡಲಿದೆ. ಈ 500ರ ಪಯಣದಲ್ಲಿ ಭಾರತೀಯ ಕ್ರಿಕೆಟ್‌ನಲ್ಲಿ ಅಸಾಮಾನ್ಯ ಸಾಧನೆ ಮಾಡಿದ ಬೌಲರ್‌ಗಳು ಭಾರತ ತಂಡದ ಯಶಸ್ಸಿಗೆ ಕಾರಣರಾಗಿದ್ದಾರೆ.

60-70ರ ದಶಕದ ಹೀರೋಗಳಾದ ಎರ್ರಪಳ್ಳಿ ಪ್ರಸನ್ನ, ಬಿ.ಎಸ್‌ ಚಂದ್ರಶೇಖರ್‌, ಬಿಷನ್‌ ಸಿಂಗ್‌ ಬೇಡಿ, 80ರ ದಶಕದಲ್ಲಿ ಕಪಿಲ್‌ ದೇವ್‌, 90ರ ದಶಕದ ಬಳಿಕ ಅನಿಲ್‌ ಕುಂಬ್ಳೆ, ಹರ್ಭಜನ್‌ ಸಿಂಗ್‌, ವೇಗಿ ಜಹೀರ್‌ ಖಾನ್‌ ಭಾರತದ ಯಶಸ್ವಿ ಟೆಸ್ಟ್‌ ಬೌಲರ್‌ಗಳಾಗಿ ಮಿಂಚಿದ್ದಾರೆ.

ಪ್ರಸನ್ನ, ಚಂದ್ರು, ಬೇಡಿ ಮೋಡಿ

ಕರ್ನಾಟಕದ ಎರ್ರಪಳ್ಳಿ ಪ್ರಸನ್ನ ದೇಶ ಕಂಡ ಶ್ರೇಷ್ಠ ಆಫ್‌ಸ್ಪಿನ್ನರ್‌ ಎಂಬುದರಲ್ಲಿ ಎರಡು ಮಾತಿಲ್ಲ. 49 ಟೆಸ್ಟ್‌ ಪಂದ್ಯಗಳನ್ನಾಡಿ 189 ವಿಕೆಟ್‌ ಪಡೆದಿರುವ ಪ್ರಸನ್ನ, 16 ವರ್ಷಗಳ ಕಾಲ ಭಾರತ ಟೆಸ್ಟ್‌ ತಂಡದ ಪ್ರಮುಖ ಬೌಲಿಂಗ್‌ ಅಸ್ತ್ರವಾಗಿದ್ದರು. ರಾಜ್ಯದವರೇ ಆದ ಭಾಗ್ವತ್‌ ಚಂದ್ರಶೇಖರ್‌ ತಮ್ಮ ಲೆಗ್‌ ಸ್ಪಿನ್‌ ಮೋಡಿಯಿಂದ ಮಿಂಚಿದವರು. ಆಡಿದ 58 ಟೆಸ್ಟ್‌ಗಳಿಂದ 242 ವಿಕೆಟ್‌ ಪಡೆದ ಹೆಗ್ಗಳಿಕೆ ಚಂದ್ರಶೇಖರ್‌ ಅವರದ್ದು.

ಭಾರತ ತಂಡದ ಮಾಜಿ ನಾಯಕರೂ ಆಗಿರುವ ಎಡಗೈ ಸ್ಪಿನ್ನರ್‌ ಬಿಷನ್‌ ಸಿಂಗ್‌ ಬೇಡಿ 70ರ ದಶಕದ ಮತ್ತೊಬ್ಬ ಯಶಸ್ವಿ ಬೌಲರ್‌. 67 ಟೆಸ್ಟ್‌ಗಳಲ್ಲಿ 266 ವಿಕೆಟ್‌ ಸಂಪಾದಿಸಿರುವ ಬೇಡಿ ಭಾರತದ ಟೆಸ್ಟ್‌ ಕ್ರಿಕೆಟ್‌ನ ಶ್ರೇಷ್ಠ ಬೌಲರ್‌ಗಳಲ್ಲೊಬ್ಬರು.

80ರ ದಶಕದಲ್ಲಿ ಕಪಿಲ್‌ ಮಿಂಚು

ಹರಿಯಾಣ ಹರಿಕೇನ್‌ ಖ್ಯಾತಿಯ ಕಪಿಲ್‌ ದೇವ್‌ ಭಾರತೀಯ ಕ್ರಿಕೆಟ್‌ ಕಂಡ ಸರ್ವಶ್ರೇಷ್ಠ ಆಲ್‌ರೌಂಡರ್‌. 80ರ ದಶಕದಲ್ಲಿ ತಂಡದ ಸಾರಥಿಯಾಗಿ, ಬೆನ್ನೆಲುಬಾಗಿದ್ದ ಕಪಿಲ್‌ ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಭಾರತ ಪರ ಅತಿ ಹೆಚ್ಚು ವಿಕೆಟ್‌ ಪಡೆದ ವೇಗದ ಬೌಲರ್‌. 131 ಟೆಸ್ಟ್‌ ಪಂದ್ಯಗಳನ್ನಾಡಿರುವ ಕಪಿಲ್‌ 434 ವಿಕೆಟ್‌ ಪಡೆದ ಸಾಧನೆ ಮಾಡಿದ್ದಾರೆ.

ಸ್ಪಿನ್‌ ಮಾಂತ್ರಿಕ ಅನಿಲ್‌ ಕುಂಬ್ಳೆ

ಕರ್ನಾಟಕದ ಹೆಮ್ಮೆಯ ಆಟಗಾರ ಅನಿಲ್‌ ಕುಂಬ್ಳೆ ತಮ್ಮ ಸ್ಪಿನ್‌ ಮೋಡಿಯಿಂದ ಭಾರತದ ಯಶಸ್ಸಿಗೆ ಕಾರಣರಾದವರು. ವಿಶ್ವದ ಶ್ರೇಷ್ಠ ಬೌಲರ್‌ಗಳ ಪೈಕಿ ಒಬ್ಬರಾಗಿರುವ ಕುಂಬ್ಳೆ ಕ್ರಿಕೆಟ್‌ ಮೈದಾನದಲ್ಲಿ ಛಲಬಿಡದ ಹೋರಾಟಕ್ಕೆ ಹೆಸರುವಾಸಿ. 132 ಟೆಸ್ಟ್‌ ಪಂದ್ಯಗಳನ್ನಾಡಿರುವ ಕುಂಬ್ಳೆ ದಾಖಲೆಯ 619 ವಿಕೆಟ್‌ ಉರುಳಿಸಿದ್ದಾರೆ. 1999ರಲ್ಲಿ ದಿಲ್ಲಿಯ ಫಿರೋಜ್‌ ಶಾ ಕೋಟ್ಲಾ ಮೈದಾನದಲ್ಲಿ ನಡೆದ ಪಾಕಿಸ್ತಾನ ವಿರುದ್ಧ ಟೆಸ್ಟ್‌ ಪಂದ್ಯದ ಒಂದೇ ಇನಿಂಗ್ಸ್‌ನಲ್ಲಿ ಎಲ್ಲಾ 10 ವಿಕೆಟ್‌ಗಳನ್ನು ಪಡೆದು ವಿಶ್ವದಾಖಲೆ ನಿರ್ಮಿಸಿದ್ದು ಕುಂಬ್ಳೆ ಅವರ ವೃತ್ತಿಜೀವನದ ಮಹಾನ್‌ ಸಾಧನೆಗಳಲ್ಲೊಂದು.

ಎದುರಾಳಿಗಳಿಗೆ ಸಿಂಹಸ್ವಪ್ನ ಭಜ್ಜಿ, ಜ್ಯಾಕ್‌

ಅನಿಲ್‌ ಕುಂಬ್ಳೆ ನಂತರ ಭಾರತೀಯ ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಅತ್ಯಂತ ಹೆಚ್ಚು ಸದ್ದು ಮಾಡಿದ ಸ್ಪಿನ್ನರ್‌ ಎಂದರೆ ಹರ್ಭಜನ್‌ ಸಿಂಗ್‌. ನಿಖರ ಆಫ್‌ಸ್ಪಿನ್‌ ದಾಳಿಯಿಂದ ಎದುರಾಳಿಗಳ ಪಾಲಿಗೆ ಸಿಂಹಸ್ವಪ್ನರಾಗಿದ್ದ ಭಜ್ಜಿ, 103 ಪಂದ್ಯಗಳಿಂದ 417 ವಿಕೆಟ್‌ ಪಡೆದ ಸಾಧಕ.

ಇನ್ನು ಭಾರತೀಯ ಕ್ರಿಕೆಟ್‌ ಕಂಡ ಶ್ರೇಷ್ಠ ಎಡಗೈ ವೇಗದ ಬೌಲರ್‌ ಜಹೀರ್‌ ಖಾನ್‌ ಒಂದು ದಶಕಕ್ಕೂ ಹೆಚ್ಚು ಕಾಲ ಭಾರತೀಯ ಬೌಲಿಂಗ್‌ನ ಮುಂಚೂಣಿಯ ದಾಳಿಗಾರನಾಗಿ ಮಿಂಚಿದವರು. 92 ಟೆಸ್ಟ್‌ ಪಂದ್ಯಳನ್ನಾಡಿ 311 ವಿಕೆಟ್‌ ಪಡೆದಿರುವ ಜ್ಯಾಕ್‌, ದೇಶ-ವಿದೇಶಗಳಲ್ಲಿ ಭಾರತದ ಸ್ಮರಣೀಯ ಗೆಲುವುಗಳ ರೂವಾರಿಯಾಗಿ ಟೆಸ್ಟ್‌ ಕ್ರಿಕೆಟ್‌ಗೆ ಕೊಡುಗೆ ನೀಡಿದ್ದಾರೆ.