ಹೊಸದಿಲ್ಲಿ: ಬಿಗ್‌ ಬಜಾರ್‌ಗಳನ್ನು ಒಳಗೊಂಡ ಫ್ಯೂಚರ್‌ ಗ್ರೂಪ್‌, ಹೈದರಾಬಾದ್‌ ಮೂಲದ ಹೆರಿಟೇಜ್‌ ಫುಡ್ಸ್‌ ಕಂಪನಿಯ ರಿಟೇಲ್‌ ವ್ಯವಹಾರವನ್ನು ಖರೀದಿಸಲು ಮಂದಾಗಿದ್ದು ಮಾತುಕತೆ ಪ್ರಗತಿಯಲ್ಲಿದೆ. ಖರೀದಿ ಸಾಧ್ಯವಾದರೆ, ಇದು ಕಿಶೋರ್‌ ಬಿಯಾನಿ ನೇತೃತ್ವದ ಫ್ಯೂಚರ್‌ ಗ್ರೂಪ್‌ನ ನಾಲ್ಕನೇ ದೊಡ್ಡ ವಿಲೀನ ವ್ಯವಹಾರವೆನಿಸಲಿದೆ. 1992ರಲ್ಲಿ ಎನ್‌. ಚಂದ್ರಬಾಬು ನಾಯ್ಡು(ಆಂಧ್ರಪ್ರದೇಶದ ಹಾಲಿ ಮುಖ್ಯಮಂತ್ರಿ) ಸಂಸ್ಥಾಪಿಸಿದ್ದ ಹೆರಿಟೇಜ್‌ ಗ್ರೂಪ್‌ನ ಒಟ್ಟು ಮೌಲ್ಯ 2,381 ಕೋಟಿ ರೂ. ಹೈದರಾಬಾದ್‌ನ ಹೆರಿಟೇಜ್‌ ಗ್ರೂಪ್‌ ಡೇರಿ ಉತ್ಪನ್ನಗಳು, ರಿಟೇಲ್‌ ಮಳಿಗೆಗಳನ್ನು ಹೈದರಾಬಾದ್‌, ಚೆನ್ನೈ, ಬೆಂಗಳೂರಿನಲ್ಲಿ ನಡೆಸುತ್ತಿದೆ. ನೂರಕ್ಕೂ ಹೆಚ್ಚು ಮಳಿಗೆಗಳು ಕಾರ್ಯನಿರ್ವಹಿಸುತ್ತಿವೆ. ವಿಲೀನದಿಂದಾಗಿ ಈ ವ್ಯವಹಾರಗಳೆಲ್ಲವೂ ಫ್ಯೂಚರ್‌ ಗ್ರೂಪ್‌ ಪಾಲಾಗಲಿವೆ. 2012ರಿಂದ ಈಚೆಗೆ ಭಾರ್ತಿ ರಿಟೇಲ್‌ನಿಂದ ಈಸಿಡೇ, ದಿಲ್ಲಿ ಮೂಲದ ಬಿಗ್‌ ಆ್ಯಪಲ್‌, ಹೈದರಾಬಾದ್‌ ಮೂಲದ ನೀಲಗಿರಿ ಸೂಪರ್‌ ಮಾರ್ಕೆಟ್‌ ಜಾಲವನ್ನು ಫ್ಯೂಚರ್‌ ಗ್ರೂಪ್‌ ತನ್ನಲ್ಲಿ ವಿಲೀನ ಮಾಡಿಕೊಂಡಿದೆ. ವಿಲೀನ ವ್ಯವಹಾರ ಸಂಬಂಧ ಪ್ರತಿಕ್ರಿಯಿಸಲು ಹೆರಿಟೇಜ್‌ ಫುಡ್ಸ್‌ ನಿರಾಕರಿಸಿದೆ. ಇಂಥ ವಿಷಯಗ ಬಗ್ಗೆ ಪ್ರತಿಕ್ರಿಯಿಸುವುದಿಲ್ಲ ಎಂದು ಫ್ಯೂಚರ್‌ ಗ್ರೂಪ್‌ ವಕ್ತಾರ ಹೇಳಿದ್ದಾರೆ. 2016ರ ಮಾರ್ಚ್‌ 31ರ ಅಂತ್ಯಕ್ಕೆ ಹೆರಿಟೇಜ್‌ ಫ್ರೆಷ್‌ 582.9 ಕೋಟಿ ರೂ. ವಹಿವಾಟು ನಡೆಸಿದೆ. ಹೈದರಾಬಾದ್‌ನಲ್ಲಿ 60, ಬೆಂಗಳೂರಿನಲ್ಲಿ 16, ಚೆನ್ನೈನಲ್ಲಿ 34 ಸೇರಿದಂತೆ ನೂರಕ್ಕೂ ಅಧಿಕ ಮಳಿಗೆಗಳನ್ನು ಹೊಂದಿದೆ. 2016ರ ಜೂನ್‌ ಹೊತ್ತಿಗೆ ಫ್ಯೂಚರ್‌ ರಿಟೇಲ್‌ ಕಂಪನಿಯು 3,979 ಕೋಟಿ ರೂ. ವ್ಯವಹಾರ ನಡೆಸಿದ್ದು, 738 ಮಳಿಗೆಗಳನ್ನು ಹೊಂದಿದೆ.
↧
ಹೆರಿಟೇಜ್‌ ಖರೀದಿಗೆ ಫ್ಯೂಚರ್‌ ಮಾತುಕತೆ
↧