* ಕಳೆದ ಎರಡೂವರೆ ವರ್ಷಗಳಲ್ಲಿ 7,000 ಕೆ.ಜಿ ಬಂಗಾರ ಕಳ್ಳ ಸಾಗಣೆ * ಭಾರತ-ಮ್ಯಾನ್ಮಾರ್‌ ಗಡಿ ಭಾಗದಿಂದ ಮಣಿಪುರ ಮಾರ್ಗವಾಗಿ ಸಾಗಣೆ ಹೊಸದಿಲ್ಲಿ: ಮ್ಯಾನ್ಮಾರ್‌ನಿಂದ ಭಾರತಕ್ಕೆ ಭಾರಿ ಚಿನ್ನ ಕಳ್ಳ ಸಾಗಣೆಯ ಜಾಲವನ್ನು ಕಂದಾಯ ವಿಚಕ್ಷಣ ಇಲಾಖೆಯ (ಡಿಆರ್‌ಐ) ಸಿಬ್ಬಂದಿ ಭೇದಿಸಿದ್ದಾರೆ. ಕಳೆದ ಎರಡು ವರ್ಷಗಳ ಅವಧಿಯಲ್ಲಿ ಸುಮಾರು 7,000 ಕೆ.ಜಿ ಬಂಗಾರವನ್ನು ಮ್ಯಾನ್ಮಾರ್‌ನಿಂದ ಭಾರತಕ್ಕೆ ಅಕ್ರಮವಾಗಿ ಸಾಗಿಸುವಾಗ ಖದೀಮರು ಸಿಕ್ಕಿ ಬಿದ್ದಿದ್ದಾರೆ. ಹೀಗೆ ವಶಪಡಿಸಿಕೊಳ್ಳಲಾಗಿರುವ ಬಂಗಾರದ ಮೊತ್ತ 2,000 ಕೋಟಿ ರೂ. ದಾಟಿದೆ ಎಂದು ಡಿಆರ್‌ಐ ಪ್ರಕಟಣೆ ತಿಳಿಸಿದೆ. ಭಾರತ ಮತ್ತು ಮ್ಯಾನ್ಮಾರ್‌ ಗಡಿ ಭಾಗದಲ್ಲಿ ಈ ಕಳ್ಳ ಸಾಗಣೆ ನಡೆಯುತ್ತಿತ್ತು. ನಂತರ ದಿಲ್ಲಿ ಮತ್ತು ದೇಶದ ಇತರ ಭಾಗಗಳಲ್ಲಿ ಮಾರಾಟ ಮಾಡಲಾಗುತ್ತಿತ್ತು. ದೇಶದೊಳಗೆ ವಿಮಾನಗಳಲ್ಲಿ ಸಾಗಿಸಲಾಗುತ್ತಿತ್ತು. ಕಂದಾಯ ವಿಚಕ್ಷಣ ಇಲಾಖೆಯ ದಿಲ್ಲಿ ಘಟಕದ ಅಧಿಕಾರಿಗಳು ಇಂದಿರಾಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಇತ್ತೀಚೆಗೆ 10 ಕೆ.ಜಿ ಬಂಗಾರವನ್ನು ಜಪ್ತಿ ಮಾಡಿದ್ದರು. 24 ಕ್ಯಾರಟ್‌ ಚಿನ್ನದ ಗಟ್ಟಿಗಳು ಮ್ಯಾನ್ಮಾರ್‌ನಿಂದ ಕಳ್ಳ ಸಾಗಣೆಯಾಗಿತ್ತು. ಇದರ ಮಾರುಕಟ್ಟೆ ಮೌಲ್ಯ 3.1 ಕೋಟಿ ರೂ.ಗಳಾಗಿತ್ತು. ಈ ಪ್ರಕರಣದಲ್ಲಿ ಏರ್‌ಲೈನ್ಸ್‌ನ ಸಿಬ್ಬಂದಿ ಭಾಗವಹಿಸಿರುವ ಶಂಕೆಯಿದ್ದು, ತನಿಖೆ ನಡೆಯುತ್ತಿದೆ. ಗುವಾಹಟಿ ಮೂಲದ ವ್ಯಾಪಾರಿ ಹಾಗೂ ದಿಲ್ಲಿ ಮೂಲದ ಆತನ ಸಹಚರನನ್ನು ಬಂಧಿಸಲಾಗಿದೆ. ಇವರಿಬ್ಬರೂ 617 ಸಲ ಚಿನ್ನವನ್ನು ಮ್ಯಾನ್ಮಾರ್‌ನಿಂದ ಕಳ್ಳ ಸಾಗಣೆ ಮಾಡಿರುವುದು ಗೊತ್ತಾಗಿದೆ. ಡಿಆರ್‌ಐನ ದಿಲ್ಲಿ ಘಟಕವು ಕಳೆದ ಎರಡೂವರೆ ವರ್ಷಗಳಲ್ಲಿ ಕಳ್ಳಸಾಗಣೆಯಾಗಿದ್ದ 7,000 ಕೆ.ಜಿ ಬಂಗಾರವನ್ನು ಜಪ್ತಿ ಮಾಡಿದೆ. ಇದರ ಮೌಲ್ಯ 2,000 ಕೋಟಿ ರೂ.ಗಳಾಗಿವೆ. ಭಾರತ-ಮ್ಯಾನ್ಮಾರ್‌ ಗಡಿ ಭಾಗದಿಂದ ಮಣಿಪುರ ಮಾರ್ಗವಾಗಿ ಭಾರತಕ್ಕೆ ಬಂಗಾರ ಕಳ್ಳ ಸಾಗಣೆಯಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
↧
2,000 ಕೋಟಿ ರೂ. ಚಿನ್ನದ ಕಳ್ಳ ಸಾಗಣೆ ಜಾಲ ಪತ್ತೆ
↧