ಜಾನ್‌ ಜಾನಿ ಜನಾರ್ದನ್‌ ಸಿನಿಮಾ ನಾಯಕಿ ಕಾಮನಾ ರಣಾವತ್‌ ಸಿಂಗ್‌, ಈ ಸಿನಿಮಾದಲ್ಲಿ ವಿಭಿನ್ನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಆ ಪಾತ್ರದ ಕುರಿತು ಅವರಿಲ್ಲಿ ಮಾತಾಡಿದ್ದಾರೆ. --- ಗುರು ದೇಶಪಾಂಡೆ ನಿರ್ದೇಶನದ ಸಿನಿಮಾದ ಮೂಲಕ ಕಾಮನಾ ರಣಾವತ್‌ ಸಿಂಗ್‌ ಕನ್ನಡಕ್ಕೆ ಬಂದಿದ್ದಾರೆ. ಮುಂಬಯಿಯ ಈ ಬೆಡಗಿ ಈಗಾಗಲೇ ತೆಲುಗು ಸಿನಿಮಾ ರಂಗಕ್ಕೆ ಪರಿಚಿತರು. ಕನ್ನಡದ 'ಜಾನ್‌ ಜಾನಿ ಜನಾರ್ದನ್‌' ಚಿತ್ರದಿಂದ ಸ್ಯಾಂಡಲ್‌ವುಡ್‌ಗೆ ಪ್ರವೇಶ ಮಾಡಿದ್ದಾರೆ. ಈ ಸಿನಿಮಾದಲ್ಲಿ ಮೂವರು ನಾಯಕರು. ಲೂಸ್‌ಮಾದ ಖ್ಯಾತಿಯ ಯೋಗಿ, ಅಜಯ್‌ ರಾವ್‌ ಮತ್ತು ಮದರಂಗಿ ಕೃಷ್ಣ ಪ್ರಮುಖ ಪಾತ್ರ ನಿರ್ವಹಿಸಿದ್ದಾರೆ. ಈ ಮೂವರಿಗೂ ಒಬ್ಬರೇ ನಾಯಕಿ. ಅವರೇ ಕಾಮನಾ ಅನ್ನುವುದು ವಿಶೇಷ. ಇದೇ ಮೊದಲ ಬಾರಿಗೆ ಸ್ಯಾಂಡಲ್‌ವುಡ್‌ಗೆ ಕಾಲಿಟ್ಟಿರುವ ಕಾಮನಾಗೆ ಪಾತ್ರದ ಬಗ್ಗೆ ಹೆಮ್ಮೆ ಇದೆ. ಇಂಥದ್ದೊಂದು ಪಾತ್ರ ತಮಗೆ ಸಿಕ್ಕಿದ್ದಕ್ಕೆ ಸಂತಸ ವ್ಯಕ್ತಪಡಿಸುತ್ತಾರೆ. 'ನಿರ್ದೇಶಕರು ಪಾತ್ರದ ಬಗ್ಗೆ ಹೇಳಿದಾಗ ಥ್ರಿಲ್‌ ಆದೆ. ಕನ್ನಡದ ನನ್ನ ಮೊದಲ ಚಿತ್ರದಲ್ಲೇ ಮೂವರು ನಾಯಕರ ಜತೆ ನಟಿಸಿದ್ದೇನೆ. ಅದಕ್ಕಿಂತ ಖುಷಿ ಮತ್ತೊಂದಿಲ್ಲ. ಈ ಸಿನಿಮಾದಲ್ಲಿ ನನ್ನದು ಕಾಲ್‌ಸೆಂಟರ್‌ನಲ್ಲಿ ಕೆಲಸ ಮಾಡುವ ಹುಡುಗಿಯ ಪಾತ್ರ. ತುಂಬಾ ಮಾಡ್‌ ಆಗಿ ಇರುವ ಹುಡುಗಿಯಾಕೆ. ಮೂವರು ನಾಯಕರು ನನ್ನನ್ನು ಪ್ರೀತಿಸುತ್ತಾರೆ. ಅವರು ಲವ್‌ ಮಾಡುತ್ತಿರುವ ವಿಷಯ ನನಗೆ ಗೊತ್ತಿರುತ್ತದೆ. ಆದರೆ, ನಾನು ಯಾರನ್ನು ಮೆಚ್ಚಿಕೊಳ್ಳುತ್ತೇನೆ ಅನ್ನುವುದೇ ಸಿನಿಮಾ. ಕೊಟ್ಟ ಪಾತ್ರವನ್ನು ಸರಿಯಾಗಿ ನಿಭಾಯಿಸಿದ್ದೇನೆ ಅನ್ನುವ ನಂಬಿಕೆ ನನ್ನದು' ಅಂತಾರೆ ಕಾಮನಾ. ಮೂಲತಃ ಪಂಜಾಬಿನವರಾದ ಇವರು, ಮುಂಬಯಿಯಲ್ಲಿ ವಾಸವಾಗಿದ್ದಾರೆ. ಸಾಕಷ್ಟು ಜಾಹೀರಾತು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಶರಣ್‌ ನಟನೆಯ 'ವಿಕ್ಟರಿ' ತೆಲುಗಿನಲ್ಲಿ ರೀಮೇಕ್‌ ಆಗಿದೆ. ಆ ಚಿತ್ರಕ್ಕೆ ಕಾಮನಾ ನಾಯಕಿ. ಆ ನಟನೆಯೇ ಕನ್ನಡದತ್ತ ಕರೆದುಕೊಂಡು ಬಂದಿದೆ. 'ಕನ್ನಡ ಸಿನಿಮಾಗಳ ಬಗ್ಗೆ ಕೇಳಿದ್ದೆ. ತೆಲುಗು ಸಿನಿಮಾ ಮಾಡುವಾಗಲೂ ಅಲ್ಲಿ ಸ್ಯಾಂಡಲ್‌ವುಡ್‌ ಚಿತ್ರಗಳ ಬಗ್ಗೆ ಮಾತಾಡುತ್ತಿದ್ದರು. ಈ ಇಂಡಸ್ಟ್ರಿಯಲ್ಲಿ ಕೆಲಸ ಮಾಡಬೇಕು ಅಂತ ಅನಿಸಿತ್ತು. ಇಷ್ಟು ಬೇಗ ಅವಕಾಶ ಸಿಗುತ್ತದೆ ಅಂತ ನಾನು ಅಂದುಕೊಂಡಿರಲಿಲ್ಲ. ಈ ಸಿನಿಮಾದ ನಂತರ ಮತ್ತಷ್ಟು ಅವಕಾಶಗಳು ಸಿಗುತ್ತವೆ ಅನ್ನುವ ವಿಶ್ವಾಸದಲ್ಲಿದ್ದೇನೆ' ಅನ್ನುವುದು ಕಾಮನಾ ಮಾತು. ಈ ಸಿನಿಮಾದಲ್ಲಿ ಇನ್ನೂ ಇಬ್ಬರು ನಾಯಕಿಯರು ನಟಿಸಿದ್ದಾರೆ. ಮಾಲಾಶ್ರೀ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು, ಐಂದ್ರಿತಾ ರೇ ಹಾಡೊಂದಕ್ಕೆ ಹೆಜ್ಜೆ ಹಾಕಿದ್ದಾರೆ. ಅರ್ಜುನ್‌ ಜನ್ಯ ಸಂಗೀತದಲ್ಲಿ ಹಾಡುಗಳು ಮೂಡಿ ಬಂದಿದ್ದು, ಮುಂದಿನ ತಿಂಗಳು ಆಡಿಯೋ ಸಿಡಿ ಬಿಡುಗಡೆ ಮಾಡುವ ಪ್ಲಾನ್‌ ಕೂಡ ಮಾಡಿದ್ದಾರೆ. ---- ನಿರ್ದೇಶಕರು ಪಾತ್ರದ ಬಗ್ಗೆ ಹೇಳಿದಾಗ ಥ್ರಿಲ್‌ ಆದೆ. ಕನ್ನಡದ ನನ್ನ ಮೊದಲ ಚಿತ್ರದಲ್ಲೇ ಮೂವರು ನಾಯಕರ ಜತೆ ನಟಿಸಿದ್ದೇನೆ. ಅದಕ್ಕಿಂತ ಖುಷಿ ಮತ್ತೊಂದಿಲ್ಲ. -ಕಾಮನಾ ಸಿಂಗ್‌, ನಟಿ
↧
ಮೂವರು ಹೀರೋಗಳಿಗೆ ಕಾಮನ್‌ ನಾಯಕಿ ಕಾಮನಾ
↧