-ಪದ್ಮಾ ಶಿವಮೊಗ್ಗ
ಸಿನಿಮಾದಲ್ಲಿ ಐಟಂ ಡಾನ್ಸ್‌, ಹೀರೋಯಿಸಂ, ಡಬಲ್‌ ಮೀನಿಂಗ್‌ ಡೈಲಾಗ್‌, ಸೂಪರ್‌ ಫೈಟ್‌ಗಳಿದ್ದರೆ ಸಾಕು, ಜನರಿಗೆ ಮನರಂಜನೆ ನೀಡಬಹುದು ಅನ್ನೋ ನಂಬಿಕೆ ಸ್ಯಾಂಡಲ್‌ವುಡ್‌ನಲ್ಲಿ ಜಾಸ್ತಿ. ಆದರೆ, ಒಂದು ಕತೆ ಅದೆಲ್ಲಕ್ಕೂ ಸಡ್ಡು ಹೊಡೆದು ಜನರನ್ನು ರಂಜಿಸಬಲ್ಲದು ಎನ್ನುವುದಕ್ಕೆ ಗೋಲಿ ಸೋಡ ಉತ್ತಮ ಉದಾಹರಣೆ. ಯಾವ ಸ್ಟಾರ್‌ ನಟರು, ಅದ್ದೂರಿತನ ಇಲ್ಲದ, ನಮ್ಮ ನಡುವೆ ಇರುವ ಸಾಮಾನ್ಯ ಜನರ ಬದುಕಿನ ಚಿತ್ರವಾಗಿದ್ದರೂ ನೋಡುಗರಿಗೆ ರೋಮಾಂಚನ ಉಂಟು ಮಾಡುವ ಥ್ರಿಲ್ಲರ್‌ ಚಿತ್ರ ಇದು. ತಮಿಳಿನಲ್ಲಿ ಸೂಪರ್‌ ಹಿಟ್‌ ಆದ ಗೋಲಿ ಸೋಡ ರಿಮೇಕ್‌ ಚಿತ್ರವಾಗಿದ್ದರೂ, ಮಿಸ್‌ ಮಾಡದೆ ನೋಡಿ.
ಸಿಟಿ ಮಾರುಕಟ್ಟೆಯಲ್ಲಿ ಮೂಟೆಗಳನ್ನು ಹೊರುವ ನಾಲ್ವರು ಹದಿಹರೆಯದ ಹುಡುಗರು. ಇವರ ಮೇಲೆ ಕಾರಣವಿಲ್ಲದೆಯೂ ಅಕ್ಕರೆ ತೋರುವ ತರಕಾರಿ ಮಾರುವ ಪುಟ್ಟಕ್ಕ (ತಾರಾ). ಈಕೆ ಅಡ್ರೆಸ್‌ ಇಲ್ಲದ ಈ ಹುಡುಗರಿಗೆ ಒಂದು ನೆಲೆ ಕಾಣಿಸಲು ಗೌಡನ ಬಳಿ ಹೋಗುತ್ತಾಳೆ. ಮಾರುಕಟ್ಟೆಯನ್ನು ಬಡ್ಡಿ ವ್ಯವಹಾರ ಮತ್ತು ತನ್ನ ರೌಡಿ ಗ್ಯಾಂಗ್‌ನಿಂದ ಹಿಡಿತದಲ್ಲಿಟ್ಟುಕೊಂಡಿದ್ದ ಗೌಡ ತನ್ನ ಶೆಡ್‌ನಲ್ಲಿ ಹೋಟೆಲ್‌ ತೆರೆಯಲು ಅವಕಾಶ ಕೊಡುತ್ತಾನೆ. ಅಪ್ಪ ಅಮ್ಮ ಇದ್ದೂ ಇಲ್ಲದಂತಿದ್ದ ಹುಡುಗಿ (ದಿವ್ಯಾ) ಈ ಹುಡುಗರ ಜತೆ ಸೇರಿಕೊಳ್ಳುತ್ತಾಳೆ. ಪುಟ್ಟಕ್ಕನ ಮಗಳ (ಪ್ರಿಯಾಂಕಾ) ಮೇಲೆ ಹುಡುಗರಲ್ಲೊಬ್ಬನಾದ ಅಪ್ಪುವಿಗೆ ಪ್ರೀತಿ. ಇಷ್ಟರಲ್ಲಿ ಇಡೀ ಮಾರುಕಟ್ಟೆಯಲ್ಲಿರುವ 350 ಸ್ಟಾಲ್‌ಗಳಿಗೆ ಊಟ ನೀಡುವ ಹೋಟೆಲ್‌ ಇವರದಾಗುತ್ತೆ. ಒಮ್ಮೆ ಗೌಡನ ಕಡೆಯವನು ಹೋಟೆಲನ್ನು ಕೆಟ್ಟ ಕೆಲಸಕ್ಕೆ ಬಳಸಿಕೊಂಡಾಗ ಹುಡುಗರ ಬದುಕಿನಲ್ಲಿ ಅಲ್ಲೋಲ ಕಲ್ಲೋಲವಾಗುತ್ತದೆ. ಅಲ್ಲಿವರೆಗೆ ಮುಗ್ಧರಂತಿದ್ದ ಇವರು ಸಿಡಿದೇಳುತ್ತಾರೆ. ಆನೆಯಂಥ ಗೌಡನನ್ನು ಇರುವೆಯಂಥ ಹುಡುಗರು ಅತ್ಯಂತ ಬುದ್ಧವಂತಿಕೆಯಿಂದ ಹೇಗೆ ಎದುರಿಸುತ್ತಾರೆ ಅನ್ನೋದು ಕತೆ.
ಆ ಮಾರುಕಟ್ಟೆಗೆ ಬರುವ ಪ್ರತಿಯೊಂದು ಮೂಟೆಗೂ ಒಂದು ಅಡ್ರೆಸ್‌ ಅಂಟಿಸಿರುತ್ತಾರೆ. ಆದರೆ, ಈ ಮೂಟೆ ಹೊರುವವರಿಗೆ ಒಂದು ಅಡ್ರೆಸ್‌ ಇಲ್ಲ ಅನ್ನೋದನ್ನು ಹೇಳುವ ಅನಾಥ ಹುಡುಗರಿಗೆ ಕೊನೆಗೆ ಆ ಹೋಟೆಲ್‌ ಅವರ ಐಡೆಂಟಿಟಿ ಆಗುತ್ತದೆ, ಬದುಕಾಗುತ್ತದೆ. ಅದನ್ನು ಉಳಿಸಿಕೊಳ್ಳಲು ಅವರು ಹೋರಾಡುವುದನ್ನು ಚಿತ್ರದಲ್ಲೇ ನೋಡಬೇಕು.
ಚಿತ್ರದ ಹೀರೋ ಅಂದರೆ ಕತೆ ಮತ್ತು ಸ್ಕ್ರಿಪ್ಟ್‌. ಕಸ, ತಿಪ್ಪೆಗಳ ನಡುವೆಯೂ ಹೃದಯ ಕಲಕುತ್ತದೆ. ಹುಡುಗರ ನಡುವಿನ ಸ್ನೇಹ ಸ್ಟ್ರಾಂಗ್‌. ಪ್ರಾಣಕ್ಕೆ ಪ್ರಾಣ ಕೊಡುವ ಸ್ನೇಹಕ್ಕೆ ಪ್ರೇಕ್ಷಕ ಫಿದಾ ಆಗುತ್ತಾನೆ. ಎಲ್ಲರೂ ರೌಡಿಗಳ ಹೊಡೆತಕ್ಕೆ ಚಿಂದಿಯಾಗಿ ದಿಕ್ಕಾಪಾಲಾದರೂ ಮತ್ತೆ ಸೆಟೆದು ನಿಲ್ಲುವ ಅವರೊಳಗಿನ ಇಚ್ಛಾಶಕ್ತಿ ಪ್ರೇಕ್ಷಕನಿಗೆ ಥ್ರಿಲ್‌ ನೀಡುತ್ತದೆ. ರೌಡಿಗಳನ್ನು ಅವರು ಚಾಣಾಕ್ಷತನದಿಂದ ದುರ್ಬಲರನ್ನಾಗಿ ಮಾಡುತ್ತಾರೆ.
ಅಂದಹಾಗೆ, ಚಿತ್ರದಲ್ಲಿ ರಕ್ತ ಸಂಬಂಧಿಗಳಲ್ಲದವರ ನಡುವಿನ ಮನುಷ್ಯ ಪ್ರೀತಿ ಮನತಟ್ಟುತ್ತದೆ. ಎಲ್ಲೂ ಬೋರ್‌ ಹೊಡೆಸದೆ, ಕ್ಷಣಕ್ಷಣವೂ ಕುತೂಹಲ ಕೆರಳಿಸುವ ಸ್ಕ್ರಿಪ್ಟ್‌ ಸಹಜವಾಗಿದೆ. ಎಲ್ಲರ ಅಭಿನಯವೂ ಚೆನ್ನಾಗಿದೆ. ಬಿಗ್‌ ಬಜೆಟ್‌ ಸಿನಿಮಾಗಳಲ್ಲಿ ಕಣ್ಣಿಗೆ ಕಲರ್‌ಫುಲ್‌ ಅನ್ನಿಸಬಹುದು. ಆದರೆ, ಈ ಚಿತ್ರದ ತಾಜಾತನ ಮೈಮರೆಸುತ್ತವೆ. ಮನರಂಜನೆಯ ಬೇರೆ ಆಯಾಮಗಳನ್ನು ಅರಿಯಲು ಈ ಸಿನಿಮಾ ನೋಡಿ.
ಕನ್ನಡ ಚಿತ್ರ: ಗೋಲಿ ಸೋಡ