ಹೊಸದಿಲ್ಲಿ: ಉದ್ಯಮಿ ಅನಿಲ್‌ ಅಂಬಾನಿಯವರ ಹಿರಿಯ ಪುತ್ರ ಜೈ ಅನ್ಮೋಲ್‌ ಮಂಗಳವಾರ ರಿಲಯನ್ಸ್‌ ಕ್ಯಾಂಪಿಟಲ್‌ನ ಆಡಳಿತ ಮಂಡಳಿಗೆ ಹೆಚ್ಚುವರಿ ನಿರ್ದೇಶಕರಾಗಿ ಸೇರ್ಪಡೆಯಾಗಿದ್ದಾರೆ. ಅನ್ಮೋಲ್‌ (24) ರಿಲಯನ್ಸ್‌ ಕ್ಯಾಪಿಟಲ್‌ನಲ್ಲಿ ಎರಡು ವರ್ಷಗಳ ತರಬೇತಿಯ ನಂತರ, ಇದೀಗ ಹೆಚ್ಚುವರಿ ನಿರ್ದೇಶಕರಾಗಿದ್ದಾರೆ. ರಿಲಯನ್ಸ್‌ ಕ್ಯಾಪಿಟಲ್‌ನಲ್ಲಿ ಅನಿಲ್‌ ಅಂಬಾನಿ ಹಾಗೂ ಅನ್ಮೋಲ್‌ ಹೊರತುಪಡಿಸಿ, ಕುಟುಂಬದ ಇತರ ಯಾರೊಬ್ಬರೂ ಸೇರಿಲ್ಲ. ಮುಂದಿನ ತಿಂಗಳು ನಡೆಯಲಿರುವ ಕಂಪನಿಯ ವಾರ್ಷಿಕ ಸಭೆಯಲ್ಲಿ ಅನ್ಮೋಲ್‌ ಅವರು ಪೂರ್ಣಕಾಲಿಕ ಕಾರ‍್ಯಕಾರಿ ನಿರ್ದೇಶಕರಾಗಲಿದ್ದಾರೆ. ಕಳೆದ ಎರಡು ವರ್ಷಗಳಲ್ಲಿ ರಿಲಯನ್ಸ್‌ ಕ್ಯಾಪಿಟಲ್‌ನ ಆಂತರಿಕ ವ್ಯವಹಾರಗಳಲ್ಲಿ ತೊಡಗಿಸಿಕೊಂಡಿದ್ದ ಅನ್ಮೋಲ್‌, ರಿಲಯನ್ಸ್‌ ಲೈಫ್‌ ಇನ್ಷೂರೆನ್ಸ್‌ ಮತ್ತು ರಿಲಯನ್ಸ್‌ ಅಸೆಟ್‌ ಮ್ಯಾನೇಜ್‌ಮೆಂಟ್‌ನಲ್ಲಿ ನಿಪ್ಪೋನ್‌ ಲೈಫ್‌ನ ಷೇರು ಹೆಚ್ಚಿಸುವ ನಿಟ್ಟಿನಲ್ಲಿ ನಡೆದ ಮಾತುಕತೆಯಲ್ಲಿ ಭಾಗವಹಿಸಿದ್ದರು. ಅನಿಲ್‌ ಅಂಬಾನಿಯವರ ಅಣ್ಣ ಮುಕೇಶ್ ಅಂಬಾನಿಯವರ ಪುತ್ರ ಆಕಾಶ್‌ ಈಗಾಗಲೇ ರಿಲಯನ್ಸ್‌ ಇಂಡಸ್ಟ್ರೀಸ್‌ನಲ್ಲಿ ತಂದೆಯ ಜತೆಗೆ ಕಾರ್ಯನಿರ್ವಹಿಸುತ್ತಿದ್ದಾರೆ. ರಿಲಯನ್ಸ್‌ ಜಿಯೋದಲ್ಲಿ ಮುಖ್ಯ ಕಾರ್ಯತಂತ್ರ ಅಧಿಕಾರಿಯಾಗಿದ್ದಾರೆ. ಜಿಯೊ ಶೀಘ್ರದಲ್ಲಿ ತನ್ನ 4ಜಿ ಸೇವೆಯನ್ನು ಬಿಡುಗಡೆಗೊಳಿಸಲಿದೆ. ಅನಿಲ್‌ ಅಂಬಾನಿಯವರ ಕಿರಿಯ ಪುತ್ರನ ಹೆಸರು ಅನ್ಷುಲ್‌ ಅಂಬಾನಿ.
↧
ಅನಿಲ್‌ ಅಂಬಾನಿ ಹಿರಿಯ ಪುತ್ರ ರಿಲಯನ್ಸ್‌ ಕ್ಯಾಪಿಟಲ್‌ಗೆ ಸೇರ್ಪಡೆ
↧