ಮಾರುಕಟ್ಟೆಯಿಂದ ಮೀನು ಕಳವು: ಪ್ರಕರಣ ದಾಖಲು

ಕೋಲ್ಕೊತಾ: ಚಿನ್ನ, ಹಣ, ಗೋವು, ಆಡು ಕಳವು ಬಳಿಕ ಇದೀಗ ಕಳ್ಳರು ಮೀನು ಕಡಿಯುವ ಕೆಲಸಕ್ಕೆ ಕೈ ಹಾಕಿದ್ದಾರೆ. ಕೋಲ್ಕೊತಾದ ಮುನಿಶ್‌ ಬಜಾರ್‌ನಲ್ಲಿ ತಲಾ ಒಂದು ಕೆ.ಜಿಯ ಎರಡು ಮೀನು (ಹಿಲ್ಸಾ) ಗಳು ಕಳವಾಗಿರುವ ಕುರಿತು ದೂರು ದಾಖಲಾಗಿದೆ.

ಈ ಮೀನು ಬಹಳ ರುಚಿ ಹಾಗೂ ಜನಪ್ರಿಯ, ಆದರೆ ಬೆಲ ಮಾತ್ರ ಈಗ ದುಬಾರಿಯಾಗಿದ್ದು, ದೊಡ್ಡ ಗಾತ್ರದ ಒಂದು ಮೀನಿಗೆ 1500 ರೂ. ಬೆಲೆ ತೆರಬೇಕು.

ಕೋಲೆ ಮಾರುಕಟ್ಟೆಯಿಂದ ಖರೀದಿಸಿ ಮುನಿಶ್‌ ಬಜಾರ್‌ನಲ್ಲಿ ಮೀನು ಮಾರಾಟ ಮಾಡುವ ಅಶಿಮ್‌ ದಾಸ್‌ ಎರಡು ಮೀನು ಕಳವಾಗಿರುವುದಾಗಿ ದೂರು ನೀಡಿದ್ದಾರೆ. ದೂರಿನಲ್ಲಿ ಮೀನಿನ ಗಾತ್ರ, ಬಣ್ಣ, ತಾಜಾತನದ ಸಮಗ್ರ ವಿವರ ದಾಖಲಿಸಿದ್ದಾರೆ.

ಕೆಲವು ದಿನಗಳ ಹಿಂದೆ ಇಲ್ಲಿನ ಪೊಲೀಸರು ಆಡು ಕಳ್ಳರನ್ನು ಬಂಧಿಸಿದ್ದರು. ದನ ಕಳ್ಳರ ಬಗ್ಗೆತೂ ತನಿಖೆ ನಡೆಸುತ್ತಿದ್ದಾರೆ. ಮೀನು ಕಳವಿನ ಬಗ್ಗೆ ತನಿಖೆ, ವಿಚಾರಣೆ ನಡೆಸುತ್ತಿದ್ದರೂ ಈವರೆಗೆ ಸುಳಿವು ಲಭಿಸಿಲ್ಲ.