ಓದಲು ಪಟನಾಕ್ಕೆ ತೆರಳಿದ್ದ ಸಂದರ್ಭದಲ್ಲೇ ಆಹಾರ ಸೇವನೆ ನಿಲ್ಲಿಸಿದ ಕೃಶ ಶರೀರದ ಪೀಲಿ ಬಾಯ್‌ (48) ಮತ್ತೆ ಎಂದೂ ಆಹಾರ ಸೇವಿಸಿಲ್ಲ. ವೈದ್ಯರ ಬಳಿ ತೋರಿಸಿದರೂ, ಅವರ ಸ್ಥಿತಿ ಸುಧಾರಿಸಿಲ್ಲ. ಚಹಾ ಕುಡಿದು ಜೀವಿಸಿರುವ ಬಗ್ಗೆ ವೈದ್ಯರಿಗೂ ಅಚ್ಚರಿ.
ಜನರೊಂದಿಗೆ ಹೆಚ್ಚು ಬೆರೆಯದ ನಾಚಿಕೆ ಸ್ವಭಾವದ ಪೀಲಿ, ಕೊರೆಯಾ ಜಿಲ್ಲೆಯ ಬರ್ದಿಯಾ ಗ್ರಾಮದಲ್ಲಿ ಪೋಷಕರ ಜತೆ ವಾಸವಿದ್ದಾರೆ. 'ಕಳೆದ 18 ವರ್ಷಗಳಲ್ಲಿ ಆಕೆ ಎಂದೂ ಘನ ಆಹಾರ ಸೇವಿಸಿಲ್ಲ. ದಿನಕ್ಕೆ 2 ಅಥವಾ 3 ಕಪ್‌ ಬ್ಲ್ಯಾಕ್ ಟೀ ಮಾತ್ರ ಸೇವಿಸುತ್ತಾಳೆ,'ಎಂದು ಕುಟುಂಬ ಸದಸ್ಯರು ಹೇಳಿದ್ದಾರೆ.
'ಬರಿಗಾಲಲ್ಲೇ ನಡೆಯುವ ಪೀಲಿಯನ್ನು ದಶಕಗಳಿಂದ ನೋಡುತ್ತಿದ್ದೇನೆ. ಅವರ ಕುಟುಂಬದವರು ಆಕೆಯನ್ನು ಹಲವಾರು ಆಸ್ಪತ್ರೆಗಳಿಗೆ ಕರೆದೊಯ್ದಿದ್ದಾರೆ. ಆಕೆಗೆ ಯಾವುದೇ ಆರೋಗ್ಯ ಸಮಸ್ಯೆ ಇಲ್ಲ. ಇಂಥ ಅಸಹಜ ವರ್ತನೆಯಿಂದ ಬೇಸತ್ತು ಅತ್ತೆ ಮನೆಯವರು ಆಕೆಯನ್ನು ಪೋಷಕರ ಮನೆಗೆ ಕಳುಹಿಸಿದ್ದಾರೆ. ಪತಿ ಮಾತ್ರ ಆಗಾಗ ಪೀಲಿಯನ್ನು ಭೇಟಿ ಮಾಡುತ್ತಾರೆ,'ಎಂದು ಸ್ಥಳೀಯ ಮುಖಂಡ ಬಿಹಾರಿ ರಾಜವಾಡೆ ಹೇಳಿದ್ದಾರೆ.
ಇದು ಪವಾಡ ಎಂದಿರುವ ಖಾಸಗಿ ಆಸ್ಪತ್ರೆ ವೈದ್ಯ ಡಾ.ರಾಕೇಶ್‌ ಶರ್ಮ, 'ಪೀಲಿಯನ್ನು ಅವರ ಮನೆಯವರು ಹಲವಾರು ಬಾರಿ ನಮ್ಮ ಆಸ್ಪತ್ರೆಗೆ ಕರೆ ತಂದಿದ್ದಾರೆ. ಆಹಾರ ಸೇವಿಸದಿದ್ದರೂ 45 ಕೆ.ಜಿ. ತೂಕವಿದ್ದಾರೆ. ಒಂದು ವಾರ ನಮ್ಮ ಆಸ್ಪತ್ರೆಯಲ್ಲಿಟ್ಟುಕೊಂಡು ನಿಗಾ ವಹಿಸಲಾಗಿತ್ತು. ಬ್ಲ್ಯಾಕ್ ಟೀ ಹೊರತುಪಡಿಸಿ ಬೇರೆ ಏನನ್ನೂ ಅವರು ಸೇವಿಸುವುದಿಲ್ಲ,'ಎಂದಿದ್ದಾರೆ.
'ಪೌಷ್ಠಿಕಾಂಶಗಳ ಕೊರತೆಯಿಂದ ದುರ್ಬಲರಾದಾಗ ಆಸ್ಪತ್ರೆಯಲ್ಲಿ ಅವರಿಗೆ ಡ್ರಿಪ್ಸ್‌ ನೀಡಲಾಗುತ್ತದೆ. ಆಗ ಅವರ ಸ್ಥಿತಿ ಸುಧಾರಿಸುವುದು. ನಮ್ಮ ಆಸ್ಪತ್ರೆ ಸಿಬ್ಬಂದಿ ಅವರನ್ನು ಬ್ಲ್ಯಾಕ್ ಟೀ ಮಹಿಳೆ ಎಂದೇ ಕರೆಯುತ್ತಾರೆ,'ಎಂದು ಶರ್ಮ ಹೇಳುತ್ತಾರೆ.
ರಾಯಪುರ್: ಛತ್ತೀಸ್‌ಗಢದ ಕೊರೆಯಾ ಜಿಲ್ಲೆಯ ಮಹಿಳೆ 18 ವರ್ಷಗಳಿಂದ ಕೇವಲ ಬ್ಲ್ಯಾಕ್ ಟೀ ಸೇವಿಸಿ ಬದುಕಿದ್ದಾರೆ ಎನ್ನಲಾಗಿದೆ.