ಪ್ರತಿ ಸಿನಿಮಾದಲ್ಲೂ ವಿಭಿನ್ನವಾಗಿ ಕಾಣಿಸಿಕೊಳ್ಳುವ ರವಿಶಂಕರ್‌, ಇದೀಗ 'ನಟರಾಜ ಸರ್ವಿಸ್‌' ಚಿತ್ರದಲ್ಲಿ ಫಕೀರನಾಗಿ ನಟಿಸಿದ್ದಾರೆ. ಸ್ವತಃ ತಾವೇ ಕಾಸ್ಟ್ಯೂಮ್‌ ಡಿಸೈನ್‌ ಕೂಡ ಮಾಡಿಕೊಂಡಿದ್ದು ವಿಶೇಷ. - ಪದ್ಮಾ ಶಿವಮೊಗ್ಗ ಕನ್ನಡ ಚಿತ್ರರಂಗದಲ್ಲಿ ಇದೀಗ ರವಿಶಂಕರ್‌ ಬಿಝಿ ನಟ. ವೈವಿಧ್ಯಮಯ ಪಾತ್ರಗಳಲ್ಲಿ ಇವರು ಕಾಣಿಸಿಕೊಳ್ಳುತ್ತಿರುವುದೇ ಇದಕ್ಕೆ ಕಾರಣ. ಸದ್ಯ ಪವನ್‌ ಒಡೆಯರ್‌ ನಿರ್ದೇಶನದ ನಟರಾಜ ಸರ್ವಿಸ್‌ ಚಿತ್ರದಲ್ಲಿ ಫಕೀರನಾಗಿ ವಿಭಿನ್ನ ಗೆಟಪ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ರವಿಶಂಕರ್‌ ಅಭಿನಯದಲ್ಲಿ ಮೂಡಿಬಂದಿರುವ 'ಅಲ್ಲಾ ಅಲ್ಲಾ.. ನಟರಾಜ ಬರ್ತಾನಲ್ಲಾ...' ಹಾಡು ಈಗ ಆನ್‌ಲೈನ್‌ನಲ್ಲಿ ವೈರಲ್‌ ಆಗಿದೆ. ಐದು ದಿನಗಳಲ್ಲೇ ನಾಲ್ಕು ಲಕ್ಷ ಜನರನ್ನು ತಲುಪಿ ದೊಡ್ಡ ಸುದ್ದಿಯಾಗಿದೆ. ಈ ಹಾಡಿಗೆ ಅನೂಪ್‌ ಸೀಳಿನ್‌ ಸಂಗೀತ ಸಂಯೋಜನೆ ಮಾಡಿ, ಅದಕ್ಕೆ ಧ್ವನಿಯೂ ಆಗಿದ್ದಾರೆ. ಮುರಳಿ ನೃತ್ಯ ಸಂಯೋಜನೆ ಮಾಡಿದ್ದಾರೆ. ನಟರಾಜ ಸರ್ವಿಸ್‌ನಲ್ಲಿ ಶರಣ್‌ ನಾಯಕನಾಗಿ ನಟಿಸಿದ್ದಾರೆ. ಮಯೂರಿ ನಾಯಕಿ. ಚಿತ್ರದ ಪ್ರಾರಂಭದಲ್ಲೇ ನಾಯಕನನ್ನು ಪರಿಚಯಿಸುವ ಹಾಡು ಇದಾಗಿದ್ದರೂ ಇಡೀ ಹಾಡಿನಲ್ಲಿ ರವಿಶಂಕರ್‌ ಮಿಂಚಿದ್ದಾರೆ. 'ಪವನ್‌ ಒಡೆಯರ್‌ ಫೋನ್‌ ಮಾಡಿ ಒಂದು ಹಾಡು, ಒಂದು ಸೀನ್‌ ಮಾಡಬೇಕು ಅಂದ್ರು. ಹಾಡು ಚೆನ್ನಾಗಿದ್ರೆ ಮಾತ್ರ ಮಾಡ್ತೀನಿ ಅಂತ ಹೇಳಿ ತರಿಸಿಕೊಂಡು ಕೇಳಿದೆ. ಕೇಳುತ್ತಿದ್ದಂತೆ ಬಹಳ ಇಷ್ಟ ಆಗಿ ಒಪ್ಪಿಕೊಂಡುಬಿಟ್ಟೆ. ನಟರಾಜ ಮತ್ತು ಅಲ್ಲಾನನ್ನು ಒಟ್ಟಿಗೆ ಹಾಡಿನಲ್ಲಿ ತರಲಾಗಿದೆ. ಪವನ್‌ ಒಡೆಯರ್‌ ಕೇವಲ 15 ನಿಮಿಷದಲ್ಲಿ ಬರೆದ ಹಾಡಿದು. ಬಹಳ ಜನಪ್ರಿಯ ಆಗಿದೆ' ಎಂದಿದ್ದಾರೆ ರವಿಶಂಕರ್‌. ಈ ಹಾಡಿನ ಇನ್ನೊಂದು ವಿಶೇಷ ಅಂದ್ರೆ ರವಿಶಂಕರ್‌ ಗೆಟಪ್‌ ಎಲ್ಲರ ಗಮನ ಸೆಳೆದಿದೆ. ಅವರೇ ತಮ್ಮ ಕಾಸ್ಟ್ಯೂಮ್‌ ಡಿಸೈನ್‌ ಮಾಡಿಕೊಂಡಿರೋದು ವಿಶೇಷ. ಫಕೀರನ ಡ್ರೆಸ್‌, ವಿಗ್‌ ಮತ್ತು ಗಡ್ಡ, ಮಣಿಸರಗಳು ಎಲ್ಲವನ್ನೂ ಅವರೇ ಆಯ್ಕೆ ಮಾಡಿದ್ದಾರೆ. 'ಫಕೀರ ಹೇಗಿಬೇಕು ಅಂತ ಪವನ್‌ ತಿಳಿಸಿದ್ರು. ಅದರಂತೆ ಎಲ್ಲವನ್ನೂ ಆಯ್ಕೆ ಮಾಡಿದೆ. ಜೀತು ಮತ್ತು ಸುರೇಂದ್ರನಾಥ್‌ ವಿಗ್‌ ಮತ್ತು ಗಡ್ಡ ಮಾಡಿಕೊಟ್ಟರು. ನನ್ನ ಎಲ್ಲ ಚಿತ್ರಗಳಿಗೆ ಅವರೇ ಮಾಡಿಕೊಡೋದು. ಹೊಸ ಬಟ್ಟೆಯಂತೆ ಕಾಣಬಾರದೆಂದು ಟೀ ಡಿಕಾಕ್ಷನ್‌ನಲ್ಲಿ ಹಾಕಿ ಅವುಗಳನ್ನು ಮಾಸಲು ಮಾಡಿದೆವು' ಎಂದು ತಮ್ಮ ಅನುಭವವನ್ನು ಹಂಚಿಕೊಳ್ಳುತ್ತಾರೆ. ಇದೀಗ ರವಿಶಂಕರ್‌ ಹೆಬ್ಬುಲಿ ಚಿತ್ರದಲ್ಲಿ ಮಿನಿಸ್ಟರ್‌, ಮುಕುಂದ ಮುರಾರಿ ಚಿತ್ರದಲ್ಲಿ ಸ್ವಾಮೀಜಿ, ದೊಡ್ಮನೆ ಹುಡುಗ ಚಿತ್ರದಲ್ಲಿ ರಿಯಲ್‌ ಎಸ್ಟೇಟ್‌ ಬಿಸ್ನೆಸ್‌ಮ್ಯಾನ್‌ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ---- ಈ ಹಾಡು ಖಂಡಿತ ಸೂಪರ್‌ ಹಿಟ್‌ ಆಗುತ್ತೆ ಅಂತ ಪವನ್‌ಗೆ ಹೇಳಿದ್ದೆ. ಇವತ್ತು ಅದು ನಿಜವಾಗಿದೆ. ಚಿತ್ರದಲ್ಲಿ ಕತೆಗೆ ತಿರುವು ಕೊಡುವ ದೃಶ್ಯದಲ್ಲಿ ನಾನು ನಟಿಸಿದ್ದೇನೆ. -ರವಿಶಂಕರ್‌, ನಟ
↧
ಕಾಸ್ಟ್ಯೂಮ್‌ ಡಿಸೈನರ್‌ ಆದ ರವಿಶಂಕರ್‌
↧