* ಶೀಲಾ ಸಿ. ಶೆಟ್ಟಿ
ಐಟಂ ಸಾಂಗ್ ಇಲ್ಲ, ಎಕ್ಸ್‌ಪೋಸ್‌ಗೆ ಅವಕಾಶವಿಲ್ಲ, ರೋಮ್ಯಾಂಟಿಕ್ ಸೀನ್‌ಗಳು ಇಲ್ಲವೇ ಇಲ್ಲ, ಪಕ್ಕಾ ಫ್ಯಾಮಿಲಿ ಎಂಟರ್‌ಟೇನರ್ ಬಾಲಿವುಡ್ ಲಿಸ್ಟ್‌ಗೆ ಸೇರಿದೆ ಸಲ್ಮಾನ್ ಖಾನ್ ಹಾಗೂ ಅನುಷ್ಕಾ ಶರ್ಮಾ ಅಭಿನಯದ ಸುಲ್ತಾನ್ ಚಿತ್ರ. ಇದು ಸ್ಪೋರ್ಟ್ಸ್ ಲವರ್ಸ್‌ ಸಿನಿಮಾ ಎಂದರೂ ತಪ್ಪಿಲ್ಲ! ಇಡೀ ಕತೆ ರೆಸ್ಲಿಂಗ್‌ನ ಸುತ್ತಲೇ ಸುತ್ತುತ್ತದೆ.
ಪಕ್ಕಾ ಹರಿಯಾಣಿ ಹಿಂದಿಯ ಸೊಗಡು ಈ ಚಿತ್ರದಲ್ಲಿದೆ. ಸಲ್ಮಾನ್ ಈ ಶೈಲಿಯಲ್ಲಿ ಸುಲಲಿತವಾಗಿ ಮಾತನಾಡಿದ್ದಾರೆ. ದಬಾಂಗ್ ನಂತರ ಮತ್ತೊಮ್ಮೆ ಮೀಸೆಯಲ್ಲಿ ಕಾಣಿಸಿಕೊಂಡಿದ್ದಾರೆ. ರಫ್ ಆ್ಯಂಡ್ ಟಫ್ ಲುಕ್ ಹಾಗೂ ಲವರ್ ಬಾಯ್ ನಂತರ ಜನರೇಷನ್ ಗ್ಯಾಪನ್ನು ಫಿಲ್ ಮಾಡಬಲ್ಲ ತಂತ್ರಕ್ಕೆ ಮ್ಯಾಚ್ ಆಗುವಂತೆ ಸಲ್ಲು ಮಿಯಾನ ಮೇಕ್‌ಒವರ್ ಚಿತ್ರಕಥೆಗೆ ಸೂಟ್ ಆಗಿದೆ. ಎಂದಿನಂತೆ ಸಲ್ಲು ಪಂಚಿಗ್ ಡೈಲಾಗ್ಸ್ ಚಪ್ಪಾಳೆ ಹಾಗೂ ಶಿಳ್ಳೆ ಗಿಟ್ಟಿಸುತ್ತವೆ.
ಇದು ಹೀರೋಯಿಸಂ ಕತೆಯೆ. ತೀರ ಸಿಂಪಲ್ ಆಗಿದೆ. ಒಂದಿಷ್ಟು ಮಸಾಲೆ ಹಾಗೂ ಹಾಡುಗಳೊಂದಿಗೆ ಸಲ್ಮಾನ್ ಪ್ರೇಮಿಗಳಿಗೆ ರಸದೌತಣ ನೀಡಿದೆ ಯಶ್ ಚೋಪ್ರಾ ಬ್ಯಾನರ್. ಜೀವನದಲ್ಲಿ ಗುರಿಯಿಲ್ಲದೇ ಸಾಗುತ್ತಿದ್ದ ನಾಯಕ ಸುಲ್ತಾನ್‌ಗೆ ನಾಯಕಿ ಆರ್ಫಾ ಮೇಲೆ ಲವ್ವಾಗುತ್ತದೆ. ಆದರೆ ಇಂಥ ಹುಡುಗನನ್ನು ಮದುವೆಯಾಗಲಾರೆ ಎನ್ನುತ್ತಾಳೆ ಒಲಿಂಪಿಕ್ ಚಾಂಪಿಯನ್‌ಶಿಪ್ ಕನಸು ಕಾಣುವ ನಾಯಕಿ. ನಾಯಕ ಪ್ರಪೋಸ್ ಮಾಡಿದಾಗ ತಾನು ಕುಸ್ತಿಪಟುವನ್ನು ಮದುವೆಯಾಗುವುದಾಗಿ ಹೇಳಿ ಅವಮಾನ ಮಾಡುತ್ತಾಳೆ. ಈ ಅವಮಾನ, ಸುಲ್ತಾನ್‌ಗೆ ಸ್ಟೇಟ್ ಚಾಂಪಿಯನ್ ಪಟ್ಟದತ್ತ ಸಾಗುವಂತೆ ಮಾಡುತ್ತದೆ. ಅಲ್ಲಿಂದ ಸ್ಟೋರಿ ಟರ್ನ್ ತೆಗೆದುಕೊಳ್ಳುತ್ತದೆ.
ವರ್ಲ್ಡ್ ಚಾಂಪಿಯನ್‌ಶಿಪ್ ಪಡೆಯುವ ಮಹದಾಸೆಯಲ್ಲಿ ದುರಹಂಕಾರ ಜೊತೆಯಾಗುತ್ತದೆ. ತುಂಬುಗರ್ಭಿಣಿ ಪತ್ನಿಯ ಜತೆ ಇರದೇ ವಿದೇಶಕ್ಕೆ ಹಾರುತ್ತಾನೆ. ಬರುವಷ್ಟರೊಳಗೆ ರೇರ್ ಬ್ಲಡ್ ಓ ನೆಗೆಟಿವ್ ಗ್ರೂಪ್ ಸಿಗದೇ ಮಗು ಸಾವನ್ನಪ್ಪಿರುತ್ತದೆ. ಇದರಿಂದ ನೊಂದ ಅರ್ಫಾ ಸುಲ್ತಾನ್‌ನಿಂದ ದೂರವಾಗುತ್ತಾಳೆ. ನಂತರ ಮೂಲೆಗುಂಪಾಗುವ ಸುಲ್ತಾನ್, ಗ್ರಾಮದಲ್ಲಿ ಬ್ಲಡ್ ಗ್ರೂಪ್ ಬ್ಯಾಂಕ್ ತೆರೆಯಲು ಚಂದಾ ಕೂಡಿಸುತ್ತಾನೆ. ಹಲವು ವರ್ಷಗಳ ನಂತರ ಉದ್ಯಮಿ ಅಮಿತ್ ಸೂದ್ ಭೇಟಿಯೊಂದಿಗೆ ಕತೆಗೆ ಮತ್ತೊಂದು ತಿರುವು. ಪ್ರೊ ಮಿಕ್ಸೆಡ್ ಮಾರ್ಷಲ್ ಆರ್ಟ್ಸ್ ಟೂರ್ನಮೆಂಟ್‌ಗೆ ಸುಲ್ತಾನ್ ಸಿದ್ಧನಾಗುತ್ತಾನೆ. ಈತನಿಗೆ ಟ್ರೇನಿಂಗ್ ನೀಡುವ ಪಾತ್ರದಲ್ಲಿ ರಣದೀಪ್ ಹೂಡಾ ಕೂಡ ರಫ್ ಆ್ಯಂಡ್ ಟಫ್ ಕೋಚ್ ಆಗಿ ಕಾಣಿಸಿಕೊಂಡಿದ್ದಾರೆ. ಮಧ್ಯ ವಯಸ್ಕ ದೇಸಿ ಪೈಲ್ವಾನ್ ಹೇಗೆ ಇಂದಿನ ಜನರೇಷನ್‌ನ ರೆಸ್ಲಿಂಗ್ ಚಾಂಪಿಯನ್‌ಗಳನ್ನುಸೋಲಿಸುತ್ತಾನೆ, ಮುಂದೇನಾಗುತ್ತದೆ, ನಾಯಕ ಮರಳಿ ತನ್ನ ಜೀವನ ಸರಿಪಡಿಸಿಕೊಳ್ಳುತ್ತಾನಾ? ಇವೆಲ್ಲವನ್ನೂ ನೀವು ಸಿನಿಮಾದಲ್ಲೇ ನೋಡಿ ಆನಂದಿಸಬೇಕು.
ಖುಷಿಯ ವಿಚಾರವೆಂದರೆ, ಕುಸ್ತಿ ನೋಡುವಾಗ ಎಲ್ಲಿಯೂ ಬೋರಾಗುವುದಿಲ್ಲ, ಫ್ರಾನ್ಸ್‌ನ ಬ್ರಹಿಂ, ಐಸ್‌ಲ್ಯಾಂಡ್‌ನ ಡೇವಿಡ್ ಸೇರಿದಂತೆ ಇತರೇ ಸಾಹಸ ಕಲಾವಿದರ ಸ್ಟಂಟ್‌ಗಳು ಮೈನವಿರೇಳಿಸುತ್ತವೆ. ಆ ಮಟ್ಟಿಗೆ ಚಿತ್ರ ಬ್ಯಾಲೆನ್ಸ್ ಆಗಿದೆ. ಹಾಗಾಗಿ ಚಿತ್ರವನ್ನು ಕ್ರೀಡಾಪ್ರೇಮಿಗಳಂತೆ ನೋಡಿ. ಮಕ್ಕಳಂತೆ ಎಂಜಾಯ್ ಮಾಡುವುದು ಉತ್ತಮ. ಹಾಡುಗಳೂ ಕೇಳುವಂತಿವೆ. ಇಲ್ಲಿ ಒಂದು ವಿಷಯ ಹೇಳಬೇಕಾದ್ದೇ, ಒಟ್ಟಾರೆ ಇದು ಫ್ಯಾಮಿಲಿ ಎಂಟರ್‌ಟೇನರ್.
ಹಿಂದಿ ಚಿತ್ರ