ಕ್ಯಾ. ಗೋಪಿನಾಥರ ಕಾರ್ಗೊ ಎಕ್ಸ್‌ಪ್ರೆಸ್‌ ಹರಾಜು ಇಂದು

* ಕೋಟ್ಯಂತರ ಸಾಲ ಬಾಕಿ ಹಿನ್ನೆಲೆ

* ಬೆಂಗಳೂರಿನಲ್ಲಿರುವ ಕಾರ್ಗೋ ಎಕ್ಸ್‌ಪ್ರೆಸ್‌ ಕಚೇರಿ, ಪೀಠೋಪಕರಣ ಹರಾಜು

* ಹರಾಜಿನ ಕನಿಷ್ಠ ಬಿಡ್‌ ದರ 13.92 ಕೋಟಿ ರೂ.

* ಕೇಶವ ಪ್ರಸಾದ್‌.ಬಿ.ಕಿದೂರು. ಬೆಂಗಳೂರು

ಭಾರತದ ಮೊಟ್ಟ ಮೊದಲ ಅಗ್ಗದ ಏರ್‌ಲೈನ್‌ ಏರ್‌ ಡೆಕ್ಕನ್‌ನ ಸಂಸ್ಥಾಪಕ, ಕ್ಯಾಪ್ಟನ್‌ ಗೋಪಿನಾಥ್‌ ಅವರ ಡೆಕ್ಕನ್‌ ಕಾರ್ಗೋ ಎಕ್ಸ್‌ಪ್ರೆಸ್‌ ಲಾಜಿಸ್ಟಿಕ್ಸ್‌ ನ(ಡಿಸಿಎಫ್‌ಎಲ್‌) ಆಸ್ತಿಪಾಸ್ತಿಗಳು ಬುಧವಾರ ಹರಾಜಾಗಲಿದೆ.

ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾದಿಂದ ಪಡೆದಿದ್ದ ಕೋಟ್ಯಂತರ ರೂ. ಮೊತ್ತದ ಸಾಲವನ್ನು ಮರು ಪಾವತಿಸುವಲ್ಲಿ ವಿಫಲವಾದ್ದರಿಂದ, ಡೆಕ್ಕನ್‌ ಕಾರ್ಗೋಗೆ ಸಂಬಂಧಿಸಿದ ಕಚೇರಿಯ ಕಟ್ಟಡ, ಪೀಠೋಪಕರಣಗಳನ್ನು ಬ್ಯಾಂಕ್‌ ಹರಾಜಿಗಿಟ್ಟಿತ್ತು.

ಬೆಂಗಳೂರಿನ 'ಎಂಬಸಿ ಸ್ಕ್ವಾರ್‌'ನಲ್ಲಿರುವ ಕಚೇರಿಯ 7 ಯುನಿಟ್‌ಗಳನ್ನು ಹರಾಜು ಹಾಕಲಾಗಿದ್ದು, ಒಟ್ಟು 9,000 ಚದರ ಅಡಿ ಪ್ರದೇಶವನ್ನು ಹೊಂದಿದೆ.

ಡಿಸಿಎಫ್‌ಎಲ್‌ ಕಚೇರಿಯಲ್ಲಿರುವ ಕೆಫೆಟೇರಿಯಾ, ಟೇಬಲ್‌, ಕುರ್ಚಿಗಳು, ಏ.ಸಿ, ಕೂಲರ್‌ ಫ್ಯಾನ್‌, ಮೀಟಿಂಗ್‌ ರೂಮ್‌, ಪ್ರಾಜೆಕ್ಟರ್‌ ಸ್ಕ್ರೀನ್‌, ರಿಸೆಪ್ಷನ್‌ ಟೇಬಲ್‌, ಕಾನ್ಫರೆನ್ಸ್‌ ಹಾಲ್‌ ಟೇಬಲ್‌, 200 ಕೆವಿಎ ಜನರೇಟರ್‌ ಮುಂತಾದವುಗಳೂ ಹರಾಜಿನಲ್ಲಿದೆ. ಹರಾಜಿನಲ್ಲಿ ಕನಿಷ್ಠ ಬಿಡ್‌ ದರ 13,92,00,000 ರೂ.ಗಳಾಗಿವೆ. ಈ ಹರಾಜಿನ ಎಲ್ಲ ವಿವರಗಳನ್ನು ಕಾರ್ಪೊರೇಟ್‌ ವ್ಯವಹಾರಗಳ ಸಚಿವಾಲಯದ ವೆಬ್‌ಸೈಟ್‌ನಲ್ಲಿ ಪ್ರಕಟಿಸಲಾಗಿದೆ.

ಒಟ್ಟು ಸಾಲವೆಷ್ಟು?

ಡೆಕ್ಕನ್‌ ಕಾರ್ಗೋ ಮೇಲೆ ಸಾಲದ ಹೊರೆ ಈಗ ಎಷ್ಟಿದೆ ಎಂಬುದನ್ನು ಎಸ್‌ಬಿಐ ಅಧಿಕಾರಿಗಳು ಸ್ಪಷ್ಟಪಡಿಸಿಲ್ಲ. ಆದರೆ ಬ್ಯಾಂಕ್‌ ಈ ಹಿಂದೆ 2013ರ ಏಪ್ರಿಲ್‌ನಲ್ಲಿ ಪ್ರಕಟಿಸಿದ್ದ ಸಾರ್ವಜನಿಕ ನೋಟಿಸ್‌ ಪ್ರಕಾರ, ಆ ವರ್ಷ ಏಪ್ರಿಲ್‌ ವೇಳೆಗೆ 211 ಕೋಟಿ ರೂ. ಸಾಲದ ಸುಳಿಗೆ ಡೆಕ್ಕನ್‌ ಕಾರ್ಗೋ ಸಿಲುಕಿತ್ತು. 2013ರಲ್ಲಿ ಬ್ಯಾಂಕ್‌, ಪ್ರಾಪರ್ಟಿಯ ಹರಾಜಿಗೆ ಯತ್ನಿಸಿದ್ದರೂ, ಯಶಸ್ವಿಯಾಗಿರಲಿಲ್ಲ. ಆದ್ದರಿಂದ ಎರಡನೇ ಬಾರಿಗೆ ಹರಾಜು ಪ್ರಕ್ರಿಯೆ ಈಗ ನಡೆಯುತ್ತಿದೆ.

1 ರೂ.ಗೆ ಏರ್‌ಟಿಕೆಟ್‌!

ಹಾಸನ ಜಿಲ್ಲೆಯ ಹಳ್ಳಿಯೊಂದರಲ್ಲಿ ಜನಿಸಿದ್ದ ಗೋಪಿನಾಥ್‌ ಭಾರತೀಯ ಸೇನೆಯಲ್ಲೂ ಸೇವೆ ಸಲ್ಲಿಸಿದ್ದರು. ಸೇನೆಯಲ್ಲಿ 8 ವರ್ಷಗಳ ಕರ್ತವ್ಯ ನಿರ್ವಹಣೆ ನಂತರ ಏರ್‌ಲೈನ್ಸ್‌ ಸ್ಥಾಪನೆಯ ಸಾಹಸ ಮಾಡಿದರು. 2003ರಲ್ಲಿ ಏರ್‌ ಡೆಕ್ಕನ್‌ ಸ್ಥಾಪಿಸಿದ ಗೋಪಿನಾಥ್‌ ಅವರು 2005ರಲ್ಲಿ ಕೇವಲ 1 ರೂ. ಹಾಗೂ 221 ರೂ.ಗಳ ತೆರಿಗೆ ಇರುವ ಅತಿ ಅಗ್ಗದ ಏರ್‌ ಟಿಕೆಟ್‌ ದರವನ್ನು ಘೋಷಿಸಿದ್ದರು. ದಿಲ್ಲಿ-ಬೆಂಗಳೂರು, ಬೆಂಗಳೂರು-ಮುಂಬಯಿ, ಮುಂಬಯಿ-ದಿಲ್ಲಿ ಮುಂತಾದ ಮಾರ್ಗಗಳಲ್ಲಿ ಸೀಮಿತ ಅವಧಿಗೆ 1 ರೂ.ಗಳ ಏರ್‌ ಟಿಕೆಟ್‌ ಪ್ರಕಟಿಸಿದ್ದರು. ಆದರೆ 2008ರಲ್ಲಿ ಏರ್‌ ಡೆಕ್ಕನ್‌ ಅನ್ನು ಉದ್ಯಮಿ ವಿಜಯ್‌ ಮಲ್ಯರಿಗೆ ಮಾರಾಟ ಮಾಡಿದರು. ಮಲ್ಯರ ಕಿಂಗ್‌ಫಿಶರ್‌ ಏರ್‌ಲೈನ್ಸ್‌ ಜತೆ ಅದು ವಿಲೀನವಾಯಿತು.

ಕ್ಯಾಪ್ಟನ್‌ ಗೋಪಿನಾಥ್‌ 2009ರಲ್ಲಿ ಸರಕು ಸಾಗಣೆಯ ಡೆಕ್ಕನ್‌ 360 ಏರ್‌ಲೈನ್‌ ಸಂಸ್ಥೆಯನ್ನು ಸ್ಥಾಪಿಸಿದರು. ಇದುವೇ ಬಳಿಕ ಡೆಕ್ಕನ್‌ ಕಾರ್ಗೊ ಆ್ಯಂಡ್‌ ಎಕ್ಸ್‌ಪ್ರೆಸ್‌ ಲಾಜಿಸ್ಟಿಕ್ಸ್‌ (ಡಿಸಿಇಎಲ್‌) ಎಂದು ಹೆಸರಾಯಿತು. ಆದರೆ ಅದೂ ವಿಫಲ ಉದ್ದಿಮೆಯಾಗಿ ಈಗ ಹರಾಜಿಗೀಡಾಗಿದೆ.