ನಾಯಿ ಬೊಗಳೊ ಜಗಳ ಸಾವಿನಲ್ಲಿ ಅಂತ್ಯ

ಪುಣೆ: ಪುಣೆಯ ಹಡಪ್ಸರ ಪ್ರದೇಶದಲ್ಲಿ ನಾಯಿ ಬೊಗಳುವ ವಿಚಾರದಲ್ಲಿ ಬುಧವಾರ ನಡೆದ ಜಗಳ ವ್ಯಕ್ತಿ ಸಾವಿನಲ್ಲಿ ಅಂತ್ಯಗೊಂಡಿದೆ.

ಗಣೇಶ್‌ ಬಾವ್ಲೆ ಅವರ ಸಾಕು ನಾಯಿ, ನಿಲೇಶ್‌ ಎಂಬುವವರನ್ನು ಕಂಡು ಬೊಗಳಲಾರಂಭಿಸಿತು. ಇದೇ ವಿಚಾರವಾಗಿ ಇಬ್ಬರ ನಡುವೆ ಜಗಳ ಆರಂಭವಾಗಿತ್ತು.

ಜಗಳ ತಾರಕಕ್ಕೇರಿ, ನಿಲೇಶ್‌ ತಮ್ಮ ಸ್ನೇಹಿತರನ್ನು ಅಲ್ಲಿಗೆ ಕರೆಸಿದರು. ಗಣೇಶ್‌ ನೆರಹೊರೆಯವರು ನಿಲೇಶ್‌ನನ್ನು ಸಮಾಧಾನಪಡಿಸಲು ಯತ್ನಿಸಿದರೂ ಪ್ರಯೋಜನ ಆಗಲಿಲ್ಲ. ಎರಡೂ ಕಡೆಯವರ ಜಗಳ ಪರಸ್ಪರ ಕೈ ಕೈ ಮಿಲಾಯಿಸುವ ಹಂತಕ್ಕೆ ತಲುಪಿ, ಹೊಡೆದಾಟದಲ್ಲಿ ಗಣೇಶ್‌ ಸ್ನೇಹಿತ ಸಾಗರ ಎಂಬಾತನಿಗೆ ಗಂಭೀರ ಸ್ವರೂಪದ ಪೆಟ್ಟು ಬಿದ್ದು ಮೃತಪಟ್ಟಿದ್ದಾನೆ.

ಈ ಘಟನೆ ಸಂಬಂಧ ನಿಲೇಶ್‌ ಸೇರಿದಂತೆ ಆತನ ಸ್ನೇಹಿತ ಗೌರವ್‌ ಹಾಗೂ ಇತರ 8 ಮಂದಿಯನ್ನು ಪುಣೆ ಪೊಲೀಸರು ಬಂಧಿಸಿದ್ದಾರೆ. ಉಳಿದವರಿಗಾಗಿ ಪೊಲೀಸರು ಶೋಧ ಮುಂದುವರಿಸಿದ್ದಾರೆ.