- ಶ್ರೀಧರ್‌
ದಕ್ಷಬ್ರಹ್ಮನ ಹದಿಮೂರನೆಯ ಮಗಳಾದ ಅದಿತಿಯನ್ನು ಕಶ್ಯಪ ಮುನಿಯು ವರಿಸಿ ಅವರಿಬ್ಬರಿಂದ ಜನಿಸಿದವನೇ ಸೂರ್ಯ. ಅದಿತಿಯ ಮಗನಾದ್ದರಿಂದ ಆದಿತ್ಯನೆಂಬ ಹೆಸರು ಸೂರ್ಯನಿಗೆ.
ಸೂರ್ಯೋದಯದಿಂದ ದಿನ, ಎಂದಿನ ಕೆಲಸಗಳು ಪ್ರಾರಂಭ. ಕೆಲಸಗಳಿಂದಲೇ ಜೀವನ. ಆದುದರಿಂದ ಕೆಲಸಕ್ಕೆ ಕಾರಕ ಸೂರ್ಯ. ಇದರಿಂದ ಸೂರ‍್ಯನು ಉದ್ಯೋಗಕಾರಕನಾದನು.
'ಆಳಾದವನು ಅರಸಾಗಬಲ್ಲ' ಎಂಬಂತೆ ಕೆಲಸ ಮಾಡುವವನಿಗೆ ಕೆಲಸ ಮಾಡಿಸುವ ಶಕ್ತಿಯೂ ಇದೆ. ಆ ಶಕ್ತಿಯೇ ಅವನ ತೇಜಸ್ಸು. ಕೆಲಸ ಮಾಡಿಸುವುದು ಅಧಿಕಾರದ ಲಕ್ಷಣ. ಅಧಿಕಾರ ರಾಜನ ಲಕ್ಷಣ. ಈ ಕಾರಣದಿಂದ ರವಿಯು ಅಧಿಕಾರ ಕಾರಕ.
ಗಿಡ, ಮರಗಳಿಂದ ಹಿಡಿದು ಪ್ರಾಣಿ, ಮನುಷ್ಯರೆಲ್ಲರಿಗೂ ಸೂರ್ಯನ ಬೆಳಕಿನ ಅವಶ್ಯಕತೆ ಇದೆ. ಬೆಳೆಸುವ ಶಕ್ತಿ ಹಾಗೂ ರೋಗವನ್ನು ನಾಶ ಮಾಡುವ ಶಕ್ತಿ ಈ ಬೆಳಕಿಗಿದೆ. ಸೂರ್ಯನ ಶಾಖವು ಬೆಳಕಿನ ಸಹಜ ಗುಣಗಳನ್ನು ಬದಲಾಯಿಸದು. ಆದರೆ, ಅಭಿವೃದ್ಧಿ ಮಾಡುತ್ತದೆ. ಬೆಂಕಿಯ ಶಾಖಕ್ಕೆ ಇದು ವಿರುದ್ಧ. ಇದು ಗುಣಗಳನ್ನು ಮಾರ್ಪಾಟು ಮಾಡುತ್ತದೆ. ಆಯುರ್ವೇದ ಮೂಲಿಕೆಗಳ ಉತ್ಪತ್ತಿ ಈ ಬೆಳಕಿನಿಂದಲೇ ಸಾಧ್ಯ. ಇದರಿಂದ ತಯಾರು ಮಾಡುವ ಔಷಧಗಳೇ ಆಯುರ್ವೇದದ ಮೂಲ. ಸೂರ್ಯನ ಪ್ರಭಾವ ಹೊಂದಿದವರು ಈ ಔಷಧ ತಯಾರಿಸಬಲ್ಲ ಆಯುರ್ವೇದ ತಜ್ಞರಾಗುತ್ತಾರೆ.
ಕೆಟ್ಟ ಕೆಲಸಗಳು, ಸಮಾಜಕ್ಕೆ ಕೆಟ್ಟ ಪರಿಣಾಮ ಬೀರುವ ಕೆಲಸಗಳನ್ನು ಸೂರ್ಯನ ಬೆಳಕಿನಲ್ಲಿ ಮಾಡಲು ಸಾಧ್ಯವಿಲ್ಲ. ಧೈರ‍್ಯವಾಗಿ ಮಾಡುವ ಕೆಲಸ, ಎಲ್ಲರ ಮೆಚ್ಚುಗೆ ಪಡೆವ ಕೆಲಸಗಳು ಮಾತ್ರ ಬೆಳಕಿನಲ್ಲಿ ಆಗುವ ಕೆಲಸ. ಇದು ಸತ್ವಗುಣದ ಕುರುಹು. ಈ ಕಾರಣದಿಂದ ಸೂರ‍್ಯನು ಸಾತ್ವಿಕ ಗ್ರಹನಾದ.
ಕೀರ್ತಿಗೆ ಕಾರಕ ಸೂರ್ಯ. ಇವನ ಅನುಗ್ರಹವಾದ ಒಳ್ಳೆಯ ಹೆಸರು, ಸರ್ವಶ್ರೇಷ್ಠನೆಂಬ ಕೀರ್ತಿ, ಉದಾತ್ತ ಗುಣಗಳು, ಮನಸ್ಸಿಗೆ ತೃಪ್ತಿ ಎಲ್ಲವೂ ದೊರೆಯುತ್ತದೆ.
ಎಲ್ಲಾ ಕಾರ್ಯಗಳೂ ಬೆಳಕಿಗೆ ಬರಲು ಎತ್ತರದ ವೇದಿಕೆ ಬೇಕು. ಎತ್ತರದ ಪ್ರದೇಶ ಈ ರವಿಯದು. ಅಧಿಕಾರವೂ ಒಂದು ಎತ್ತರದ ಸ್ಥಾನ. ದೇಹದಲ್ಲಿಯೂ ಎತ್ತರದ ಸ್ಥಾನ ತಲೆ. ಆದುದರಿಂದ ರವಿಯನ್ನು 'ಶೆರೋ ಸೂಚಕ' ಎನ್ನುವರು. ಸಂಸಾರದಲ್ಲಿ ತಲೆ ಆದ ತಂದೆಗೂ ರವಿಯೇ ಕಾರಕ -ಪಿತೃ ಕಾರಕ.
ಆದಿತ್ಯ ಹೃದಯ ಪಠಣದಿಂದ ಸಂಪ್ರೀತನಾಗುವ ರವಿ ಸ್ತೋತ್ರ ಪ್ರಿಯ. ರವಿಯ ಪ್ರಭಾವದಿಂದಾಗಿ ಹೆಚ್ಚಿನ ಜಾತಕರೂ ಸ್ತೋತ್ರಪ್ರಿಯರಾಗುತ್ತಾರೆ.
ಬೆಳಕಿನ ಗ್ರಹ ಸೂರ್ಯ, ಮನುಷ್ಯನ ಅಂತರಂಗವನ್ನು ಪ್ರಭಾವಿಸುವ ಗ್ರಹ- ಆತ್ಮಕ ಕಾರಕ, ಜಾತಕರು ಆತ್ಮವಿದ್ಯಾಸಕ್ತರು.
ಜನ್ಮ ಕುಂಡಲಿಯಲ್ಲಿ ಒಂದನೇ ಮನೆಯಾದ ಲಗ್ನವನ್ನು ಹಾಗೂ ಪಿತೃಸಂಬಂಧಿತವಾದ 9ನೇ ಮನೆಯ ಕಾರಕವನ್ನು ಪ್ರತಿನಿಧಿಸುವ ಗ್ರಹ ಸೂರ್ಯ. ಹಾಗೂ 10ನೇ ಮನೆಯನ್ನು ದಿಗ್ಬಲವಾಗಿ ಪ್ರತಿನಿಧಿಸುವ ಗ್ರಹ 3ನೇ ಮನೆಯು ಸೂರ್ಯನಿಗೆ ಶುಭವಾದುದು. ಈ ಸ್ಥಿತ ಗ್ರಹವು 9ನೇ ಮನೆಯನ್ನು ವೀಕ್ಷಿಸುವುದರಿಂದ ಕಾರಕೋ ಭಾವನಾಶಾಯದ ಫಲದಿಂದ 9ನೇ ಭಾವಕ್ಕೆ ಧಕ್ಕೆಯಾಗುತ್ತದೆ.
ಬದುಕಿನ ನಿತ್ಯದ ಕೆಲಸಗಳಿಂದ ತೊಡಗಿ ವ್ಯಕ್ತಿಯ ಹಲವು ಪ್ರಮುಖ ಗುಣಗಳಿಗೆ ಸೂರ‍್ಯನೇ ಕಾರಕನಾಗುತ್ತಾನೆ. ಸೂರ್ಯನಕಾರಕ ಗುಣಗಳ ವಿವರ ಇಲ್ಲಿದೆ.