ಸ್ವಿಸ್‌ ಬ್ಯಾಂಕ್‌ಗಳಲ್ಲಿ ವಿದೇಶಿಯರ ಹಣ ಇಳಿಕೆ

ಭಾರತಕ್ಕೆ 75ನೇ ರಾರ‍ಯಂಕ್‌, ಬ್ರಿಟನ್‌ಗೆ ಮೊದಲ ರಾರ‍ಯಂಕ್‌

ಹೊಸದಿಲ್ಲಿ: 'ಕಪ್ಪು ಹಣದ ಸ್ವರ್ಗ' ಎನ್ನಲಾದ ಸ್ವಿಜರ್‌ಲೆಂಡ್‌ನ ಬ್ಯಾಂಕ್‌ಗಳಲ್ಲಿ ಹಣ ಇಡುವ ವಿದೇಶಿ ಗ್ರಾಹಕರ ಸಂಖ್ಯೆ ಕಳೆದ ವರ್ಷ ಶೇ.4ರಷ್ಟು ಇಳಿಕೆಯಾಗಿದೆ. ಭಾರತ 75ನೇ ಸ್ಥಾನದಲ್ಲಿದ್ದರೆ, ಬ್ರಿಟನ್‌ ತನ್ನ ಮೊದಲ ಸ್ಥಾನವನ್ನು ಕಾಯ್ದುಕೊಂಡಿದೆ.

ಸ್ವಿಜರ್‌ಲೆಂಡ್‌ನ ಕೇಂದ್ರೀಯ ಬ್ಯಾಂಕ್‌ನ(ಸ್ವಿಸ್‌ ನ್ಯಾಷನಲ್‌ ಬ್ಯಾಂಕ್‌) ವಾರ್ಷಿಕ ವರದಿಯಲ್ಲಿ ಸ್ವಿಸ್‌ ಬ್ಯಾಂಕ್‌ಗಳ ಸ್ಥಿತಿಗತಿ ಮತ್ತು ಹಣದ ಹರಿವು ಕುರಿತಾಗಿ ಮಾಹಿತಿ ನೀಡಲಾಗಿದೆ. 2015ನೇ ಸಾಲಿನ ಅಂತ್ಯಕ್ಕೆ ಸ್ವಿಸ್‌ ಬ್ಯಾಂಕ್‌ಗಳಲ್ಲಿನ ವಿದೇಶಿಯರ ಹೂಡಿಕೆ ಶೇ.4ರಷ್ಟು ಅಂದರೆ 98 ಲಕ್ಷ ಕೋಟಿ ರೂ.ಗಳಷ್ಟು (1.42 ಲಕ್ಷ ಕೋಟಿ ಸ್ವಿಸ್‌ ಫ್ರಾಂಕ್‌) ಇಳಿಕೆಯಾಗಿದೆ.

ಸ್ವಿಸ್‌ ಬ್ಯಾಂಕ್‌ಗಳಲ್ಲಿ ಭಾರತೀಯರ ಹೂಡಿಕೆ ಇಳಿಕೆಯಾಗಿದ್ದು, ಕಳೆದ ವರ್ಷ 61ನೇ ಸ್ಥಾನದಲ್ಲಿತ್ತು. 2004ರಲ್ಲಿ ಭಾರತವು ಗರಿಷ್ಠ ರಾರ‍ಯಂಕ್‌ ಅಂದರೆ, 37ನೇ ಸ್ಥಾನದಲ್ಲಿತ್ತು. ಭಾರತೀಯ ಕಾಳಧನಿಕರು ತಮ್ಮ ಕಪ್ಪು ಹಣವನ್ನು ಬಚ್ಚಿಡಲು ಸ್ವಿಸ್‌ ಬ್ಯಾಂಕ್‌ಗಳನ್ನು ಬಳಸಿಕೊಂಡಿದ್ದರು.

ಬ್ರಿಟನ್‌ಗೆ ಅಗ್ರಸ್ಥಾನ:

ಬ್ರಿಟನ್‌ ಪ್ರಜೆಗಳು ತಮ್ಮ ಹೂಡಿಕೆಗೆ ಸ್ವಿಸ್‌ ಬ್ಯಾಂಕ್‌ಗಳ ಮೇಲೆ ವಿಶ್ವಾಸ ಇಟ್ಟಿದ್ದು, ಇಲ್ಲಿನ ಬ್ಯಾಂಕ್‌ಗಳಲ್ಲಿ 350 ಶತಕೋಟಿ ಸ್ವಿಸ್‌ ಫ್ರಾಂಕ್‌ನಷ್ಟು(ಸಿಎಚ್‌ಎಫ್‌) ಹಣವಿದೆ. ಸ್ವಿಸ್‌ ಬ್ಯಾಂಕ್‌ಗಳಲ್ಲಿ ವಿದೇಶಿಯರು ಹೂಡಿಕೆ ಮಾಡಿರುವ ಮೊತ್ತದಲ್ಲಿ ಶೇ.25ರಷ್ಟು ಬ್ರಿಟನ್‌ ಗ್ರಾಹಕರ ಪಾಲಿದೆ.

ಬ್ರಿಕ್ಸ್‌ ದೇಶಗಳ ಪೈಕಿ ಭಾರತವು ಕಡಿಮೆ ರಾರ‍ಯಂಕಿಂಗ್‌ ಅನ್ನು ಹೊಂದಿದೆ. ರಷ್ಯಾ 17ನೇ ರಾರ‍ಯಂಕ್‌(17.6 ಶತಕೋಟಿ ಸಿಎಚ್‌ಎಫ್‌), ಚೀನಾ 28ನೇ ರಾರ‍ಯಂಕ್‌(7.4 ಶತಕೋಟಿ ಸಿಎಚ್‌ಎಫ್‌), ಬ್ರೆಜಿಲ್‌ 37ನೇ ರಾರ‍ಯಂಕ್‌(4.8 ಶತಕೋಟಿ ಸಿಎಚ್‌ಎಫ್‌) ಮತ್ತು ದಕ್ಷಿಣ ಆಫ್ರಿಕಾ 60ನೇ ರಾರ‍ಯಂಕ್‌(2.2 ಶತಕೋಟಿ ಸಿಎಚ್‌ಎಫ್‌) ಪಡೆದಿವೆ.

ಭಾರತಕ್ಕಿಂತ ಹೆಚ್ಚಿನ ರಾರ‍ಯಂಕ್‌ ಪಡೆದ ದೇಶಗಳಲ್ಲಿ ಮಾರಿಷಿಯಸ್‌, ಕಜಖಸ್ತಾನ್‌, ಇರಾನ್‌, ಚಿಲಿ, ಫಿಲಿಪ್ಪೀನ್ಸ್‌, ಇಂಡೋನೇಷಿಯಾ ಮತ್ತು ಮೆಕ್ಸಿಕೋ ಇವೆ.

=======

ಬ್ರಿಟನ್‌ ನಂತರದ 2ನೇ ಸ್ಥಾನವನ್ನು ಅಮೆರಿಕ ಹೊಂದಿದ್ದು, ಈ ದೇಶದ ಗ್ರಾಹಕರ ಒಟ್ಟು ಹಣ ಶೇ.14(196 ಶತಕೋಟಿ ಸಿಎಚ್‌ಎಫ್‌).

ಅಮೆರಿಕ, ಬ್ರಿಟನ್‌ ಬಿಟ್ಟರೆ ಸ್ವಿಸ್‌ ಬ್ಯಾಂಕ್‌ ಹೂಡಿಕೆಯಲ್ಲಿ ಬೇರೆ ಯಾವ ದೇಶಗಳೂ 2 ಅಂಕಿಯ ಶೇಕಡಾವಾರು ಪಾಲನ್ನು ಹೊಂದಿಲ್ಲ.

ಭಾರತ 75ನೇ ರಾರ‍ಯಂಕ್‌ ಪಡೆದಿದ್ದು 1.2 ಶತಕೋಟಿ ಸಿಎಚ್‌ಎಫ್‌(8,392 ಕೋಟಿ ರೂ.) ಹಣ ಸ್ವಿಸ್‌ ಬ್ಯಾಂಕ್‌ಗಳಲ್ಲಿದೆ. ಶೇಕಡಾವಾರು ಲೆಕ್ಕ ಹಾಕುವುದಾದರೆ ಭಾರತದ ಪಾಲು 0.1ರಷ್ಟೂ ಇಲ್ಲ. 1996ರಿಂದ ಈಚೆಗಿನ ಎರಡು ದಶಕಗಳಲ್ಲಿ ಇದು ಗರಿಷ್ಠ ಮಟ್ಟ.

ಪಾಕಿಸ್ತಾನವು 69ನೇ ಸ್ಥಾನದಲ್ಲಿದ್ದು, ಹಣದ ಪ್ರಮಾಣ 1.5 ಶತಕೋಟಿ ಸಿಎಚ್‌ಎಫ್‌.

======

ಭಾರತದ ರಾರ‍ಯಂಕಿಂಗ್‌ ಇಳಿಕೆ

ಸ್ವಿಸ್‌ ಬ್ಯಾಂಕ್‌ಗಳಲ್ಲಿ ಹೆಚ್ಚಿನ ಹೂಡಿಕೆ ಮಾಡಿದ ವಿದೇಶಗಳ ಪೈಕಿ, 1996ರಿಂದ 2007ರ ತನಕ ಭಾರತವು ಟಾಪ್‌-50 ದೇಶಗಳಲ್ಲಿ ಒಂದಾಗಿತ್ತು. ಆದರೆ 2008ರಲ್ಲಿ 55ನೇ ಸ್ಥಾನಕ್ಕೆ, 2009 ಮತ್ತು 2010ರಲ್ಲಿ 59ನೇ ಸ್ಥಾನಕ್ಕೆ ಇಳಿಯುತ್ತಾ ಬಂತು. 2011ರಲ್ಲಿ 55ನೇ ಸ್ಥಾನಕ್ಕೆ ಜಿಗಿಯಿತಾದರೂ 2011ರಲ್ಲಿ 71ನೇ ರಾರ‍ಯಂಕ್‌ ಮುಟ್ಟಿತು.