ಲಖನೌ: ಇಲ್ಲಿನ ಐಶ್‌ಭಾಗ್‌ ಈದ್ಗಾ ಗುರುವಾರ ಐತಿಹಾಸಿಕ ವಿದ್ಯಮಾನಕ್ಕೆ ಸಾಕ್ಷಿಯಾಯಿತು. ಇದೇ ಮೊದಲ ಬಾರಿಗೆ ನೂರಾರು ಸಂಖ್ಯೆಯಲ್ಲಿ ಈದ್ಗಾಕ್ಕೆ ಆಗಮಿಸಿದ ಮುಸ್ಲಿಂ ಮಹಿಳೆಯರು, ಈದ್‌ ಉಲ್‌ ಫಿತರ್‌ನ ಅಂಗವಾಗಿ ನಮಾಜ್‌ ಸಲ್ಲಿಸಿದರು. ಮುಸ್ಲಿಂ ಸಮುದಾಯದ ಮಹಿಳೆಯರು ನಡೆಸುತ್ತಿರುವ ಲಿಂಗ ಸಮಾನತೆಯ ಹೋರಾಟದಲ್ಲಿ ಈದ್ಗಾ ಪ್ರವೇಶಿಸಿ ನಮಾಜ್‌ ಸಲ್ಲಿಸಲು ಸಿಕ್ಕ ಅನುಮತಿ ದೊಡ್ಡದೊಂದು ಗೆಲುವಿನ ಮೈಲಿಗಲ್ಲಾಗಿದೆ. ಅಖಿಲ ಭಾರತ ಮುಸ್ಲಿಂ ವೈಯಕ್ತಿಕ ಕಾನೂನು ಮಂಡಳಿ(ಎಐಎಂಪಿಎಲ್‌ಬಿ)ಯ ಸದಸ್ಯ ಹಾಗೂ ಫಿರಂಗಿಮಹಲ್‌ನ ಮುಖ್ಯ ಇಮಾಮ್‌ ಆಗಿರುವ ಮೌಲಾನಾ ಖಲೀದ್‌ ರಶೀದ್‌ ಅವರ ದಿಟ್ಟ ಪ್ರಯತ್ನಗಳ ಫಲವಾಗಿ ಈ ಗೆಲುವು ಸಾಧ್ಯವಾಗಿದೆ. ''ಇಸ್ಲಾಂ ಮಹಿಳೆ ಹಾಗೂ ಪುರುಷನಿಗೆ ಸಮಾನ ಹಕ್ಕುಗಳನ್ನು ನೀಡಿದೆ ಎಂಬುದನ್ನು ಸಾಬೀತುಪಡಿಸಬೇಕಿತ್ತು. ಭವಿಷ್ಯದಲ್ಲಿ ಇಂಥ ಹಲವಾರು ಪ್ರಾರ್ಥನೆಗಳನ್ನು ಆಯೋಜಿಸುತ್ತೇವೆ,'' ಎಂದು ರಶೀದ್‌ ಹೇಳಿದರು. ಮುಂಬಯಿಯ ಹಾಜಿ ಆಲಿ ದರ್ಗಾಕ್ಕೆ ಪ್ರವೇಶ ಕೋರಿ ಪ್ರತಿಭಟನೆ ನಡೆಸುವುದರಿಂದ ಹಿಡಿದು, ತಲಾಖ್‌ ಪದ್ಧತಿಗೆ ವಿರೋಧ, ಶರಿಯಾ ಕಾನೂನಿನಲ್ಲಿ ಸಮಾನತೆಗೆ ಆಗ್ರಹ ಸೇರಿದಂತೆ ಮುಸ್ಲಿ ಮಹಿಳೆಯರು ಇತ್ತೀಚಿನ ವರ್ಷಗಳಲ್ಲಿ ಹೆಚ್ಚು ಹೋರಾಟದ ಧ್ವನಿ ಹೊರಡಿಸಿದ್ದಾರೆ. ಸಾಂಪ್ರದಾಯಿಕವಾಗಿ 'ಪುರುಷರಿಗೆ ಮಾತ್ರ' ಅನುಮತಿಯಿದ್ದ ಈದ್ಗಾ ಮೈದಾನಕ್ಕೆ ಮಹಿಳೆಯರಿಗೂ ಅನುಮತಿ ನೀಡಿದ್ದರೂ, ಹಲವಾರು ಮಹಿಳೆಯರು ಮನೆ ಬಿಟ್ಟು ಹೊರಬರುವ ಧೈರ್ಯ ತೋರಲಿಲ್ಲ. ಹಾಗೆ ಧೈರ್ಯ ತೋರಿದ ಕೆಲ ಮಹಿಳೆಯರು ಮಾತ್ರ ಸಾಹಸ ಮಾಡಿದ ಸಂತಸದಲ್ಲಿದ್ದರು. ----- ಈ ಬದಲಾವಣೆಗಾಗಿ ನಾನು ಈದ್ಗಾ ಸಮಿತಿಗೆ ಧನ್ಯವಾದ ಅರ್ಪಿಸುತ್ತೇನೆ. ಇದು ಎಲ್ಲ ಕಡೆ ಪುನರಾವರ್ತನೆಯಾಗುತ್ತದೆಯೆಂಬ ಭರವಸೆಯಿದೆ. - ಫರಾ ಉಸ್ಮಾನಿ, ಸಾಮಾಜಿಕ ಕಾರ್ಯಕರ್ತೆ ಭವಿಷ್ಯದಲ್ಲೂ ಹೀಗೆ ಈದ್ಗಾಕ್ಕೆ ಬರುವಂಥ ಹೆಚ್ಚಿನ ಅವಕಾಶಗಳಿಗಾಗಿ ನಾನು ಎದುರು ನೋಡುತ್ತಿದ್ದೇನೆ. - ಮೆಜ್ಬೀನ್‌, ಸಾಫ್ಟ್‌ವೇರ್‌ ಉದ್ಯೋಗಿ
↧
ಈದ್ಗಾದಲ್ಲಿ ಮಹಿಳೆಯರ ಐತಿಹಾಸಿಕ ನಮಾಜ್‌
↧