- ಶರಣು ಹುಲ್ಲೂರು
ಜೂಮ್‌ ಪದಕ್ಕೆ ನಾನಾ ಅರ್ಥಗಳಿದ್ದರೂ, ಸಿನಿಮಾದಲ್ಲಿ ನಿರ್ದೇಶಕರು ಕೊಟ್ಟ ಉತ್ತರ ಮತ್ತೊಂದಿದೆ. ಅದು ಪಕ್ಕಾ ಪಡ್ಡೆಗಳ ಪಾಲಿಗೆ ಪರಮಾನ್ನದಂತಿದೆ. ಹೀಗಾಗಿ ಹೇಳುವುದಕ್ಕಿಂತ ನೀವು ಸಿನಿಮಾದಲ್ಲಿ ನೋಡುವುದೇ ಉತ್ತಮ.
ಜೂಮ್‌ ಚಿತ್ರಕ್ಕೆ ಜೂಮ್‌ ಹಾಕಿ ನೋಡಿದಾಗ ಆ್ಯಡ್‌ ಏಜೆನ್ಸಿಯೊಂದರಲ್ಲಿ ಕೆಲಸ ಮಾಡುವ ಸಂತೋಷ್‌ (ಗಣೇಶ್‌), ಮತ್ತೊಂದು ಜಾಹೀರಾತು ತಯಾರಿಕಾ ಸಂಸ್ಥೆಯಲ್ಲಿ ಕೆಲಸ ಮಾಡುವ ನಯನ (ರಾಧಿಕಾ ಪಂಡಿತ್‌), ಆ್ಯಡ್‌ ಮೇಕಿಂಗ್‌ ಕಂಪೆನಿಯ ಮಾಲೀಕ ಎಂ.ಜೆ. (ಸಾಧು ಕೋಕಿಲ), ಸೈಂಟಿಸ್ಟ್‌ ಧೂಮಕೇತು (ಕಾಶೀನಾಥ್‌) ಮುಂತಾದ ಪಾತ್ರಗಳು ಸಿಗುತ್ತವೆ. ಒಂದೊಂದು ಪಾತ್ರಕ್ಕೂ ವಿಭಿನ್ನವಾದ ಹಿನ್ನೆಲೆಯಿದೆ.
ಹಾರ್ಡ್‌ ವರ್ಕ್‌ ನಂಬಿಕೊಂಡಿರುವ ಹುಡುಗಿ ನಯನ. ಶಕ್ತಿಗಿಂತ ಯುಕ್ತಿ ಮೇಲು ಅನ್ನುವುದು ಸಂತೋಷ್‌ ವಾದ. ಇಬ್ಬರೂ ಬೇರೆ ಬೇರೆ ಕಂಪೆನಿಯಲ್ಲಿ ಕೆಲಸ ಮಾಡುತ್ತಲೇ, ಆ್ಯಡ್‌ವೊಂದರ ಕಾಂಟ್ರ್ಯಾಕ್ಟ್ ಪಡೆಯಲು ಕಸರತ್ತು ಮಾಡುತ್ತಾರೆ. ವಾಮ ಮಾರ್ಗದ ಮೂಲಕ ಸಂತೋಷ ಕಾಂಟ್ರ್ಯಾಕ್ಟ್ ಪಡೆಯುತ್ತಿದ್ದಾನೆಂದು ಈಕೆಗೆ ಗೊತ್ತಾಗಿ, ಅದನ್ನು ತನ್ನದಾಗಿಸಲು ಬೇರೆ ದಾರಿ ಹಿಡಿಯುತ್ತಾಳೆ. ಆ್ಯಡ್‌ ಕೌನ್ಸಿಲ್‌ಗೆ ದೂರು ನೀಡುತ್ತಾಳೆ. ಅಲ್ಲಿಂದ ಇಬ್ಬರ ಮಧ್ಯೆ ಗಲಾಟೆ ನಡೆಯುತ್ತದೆ. ಈ ಮಧ್ಯೆ ಇಬ್ಬರೂ ಪ್ರೀತಿಸುತ್ತಾರೆ. ತಾನು ಇಷ್ಟಪಟ್ಟಿದ್ದ ಹುಡುಗ ತನಗೆ ಸುಳ್ಳು ಹೇಳುತ್ತಿದ್ದಾನೆಂದು ಆಕೆ ಗೊತ್ತಾಗಿ ರೋದಿಸುತ್ತಾಳೆ. ವಿರೋಧಿಸುತ್ತಿದ್ದ ಹುಡುಗನನ್ನು ಈಕೆ ಇಷ್ಟ ಪಡುವುದು ಹೇಗೆ? ಬೇರೆ ದಾರಿಯಲ್ಲಿ ಹೋದ ನಯನಗೆ ಕಾಂಟ್ರ್ಯಾಕ್ಟ್ ಸಿಗುತ್ತಾ? ಇಬ್ಬರ ಪ್ರೀತಿ ನಿಜವಾಗುತ್ತಾ ಅನ್ನುವುದೇ ಸಿನಿಮಾ.
ಇಡೀ ಸಿನಿಮಾವನ್ನು ಕಲರ್‌ಫುಲ್‌ ಆಗಿ ಕಟ್ಟಿಕೊಟ್ಟಿದ್ದಾರೆ ನಿರ್ದೇಶಕ ಪ್ರಶಾಂತ್‌ ರಾಜ್‌. ಇಟಲಿ, ಬೆಂಗಳೂರು ಮತ್ತಿತರ ಸುಂದರ ಸ್ಥಳಗಳಲ್ಲಿ ಶೂಟ್‌ ಮಾಡಿರುವುದರಿಂದ ಬಾಲಿವುಡ್‌ ಚಿತ್ರಕ್ಕೆ ಕಡಿಮೆ ಇಲ್ಲ ಅನ್ನುವಂತೆ ಪ್ರತಿ ದೃಶ್ಯ ಕಾಣುತ್ತದೆ. ಆದರೆ, ಎಡವಟ್ಟು ಮಾಡಿಕೊಂಡಿದ್ದು ಚಿತ್ರಕತೆಯಲ್ಲಿ. ಲಾಜಿಕ್‌ಗೆ ಯಾವುದೇ ಅವಕಾಶ ಕೊಡದೇ, ಕೇವಲ ಮ್ಯಾಜಿಕ್‌ ಮಾಡಿದ್ದಾರೆ ನಿರ್ದೇಶಕರು. ಹೀಗಾಗಿ ಚಿತ್ರದ ಮೊದಲರ್ಧ ತಮಾಷೆ, ದ್ವಿತೀಯಾರ್ಧದಲ್ಲಿ ಹೆಚ್ಚು ಡಬಲ್‌ ಮೀನಿಂಗ್‌ಗೆ ಪ್ರಾಶಸ್ತ್ಯವಿದೆ. ಅದರಲ್ಲೂ ಸಾಧು ಕೋಕಿಲಾ ಪಾತ್ರವನ್ನು ಡಬಲ್‌ ಮೀನಿಂಗ್‌ಗಾಗಿಯೇ ಸೃಷ್ಟಿ ಮಾಡಿದಂತಿದೆ. ಸಿಂಗಲ್‌ ಮೀನಿಂಗ್‌ನಲ್ಲೇ ಕಾಶೀನಾಥ್‌ ಗಮನ ಸೆಳೆಯುತ್ತಾರೆ.
ಕಾಮಿಡಿ ಟೈಮ್‌ಗೆ ಹೇಳಿ ಮಾಡಿಸಿದ ನಟ ಗಣೇಶ್‌. ಈ ಸಿನಿಮಾದಲ್ಲಿ ಡೈಲಾಗ್‌, ಫೈಟ್‌, ನಟನೆ, ಡಾನ್ಸ್‌ನಲ್ಲೂ ಮಿಂಚಿದ್ದಾರೆ. ಹಿಂದಿನ ಚಿತ್ರಗಳಿಗಿಂತಲೂ ಇವರು ಸ್ಟೈಲಿಶ್‌ ಆಗಿ ಕಂಡಿದ್ದಾರೆ. ರಾಧಿಕಾ ಪಂಡಿತ್‌ ಇದೇ ಮೊದಲ ಬಾರಿಗೆ ಗಣೇಶ್‌ ಜತೆ ತೆರೆ ಹಂಚಿಕೊಂಡಿರುವುದರಿಂದ, ನಾಜೂಕಾಗಿ ದೃಶ್ಯಗಳನ್ನು ಹೆಣೆದಿದ್ದಾರೆ ನಿರ್ದೇಶಕರು. ನಾಯಕ ಮತ್ತು ನಾಯಕಿಯ ಕಾಂಬಿನೇಷನ್‌ ಸೀನ್ಸ್‌ಗಿಂತ, ಗಣೇಶ್‌ ಮತ್ತು ಸಾಧು ದೃಶ್ಯಗಳೇ ಹೆಚ್ಚಿವೆ.
ಸಿನಿಮಾದ ಮತ್ತೊಂದು ಪ್ಲಸ್‌ ಪಾಯಿಂಟ್‌ ಹಾಡು. ಎಸ್‌.ಎಸ್‌. ತಮನ್‌ ಸಂಗೀತ ನಿರ್ದೇಶನದಲ್ಲಿ ಮೂಡಿಬಂದ ರಾಜಾದಿ ರಾಜಾ, ಹೇ ದಿವಾನಾ ಹಾಡುಗಳು ಇಷ್ಟವಾಗುತ್ತವೆ. ಸಂತೋಷ್‌ ರೈ ಪಾತಾಜೆ ಸಿನಿಮಾಟೋಗ್ರಫಿ ಕೂಡ ಬಣ್ಣದ ಓಕುಳಿ ಆಡಿದೆ. ಲಾಜಿಕ್‌ ಇಲ್ಲದೇ ಹೊಟ್ಟೆ ತುಂಬಾ ನಗಬೇಕು ಅನ್ನುವವರು ಜೂಮ್‌ ನೋಡಬಹುದು. ಕೊಂಚ ಡಬಲ್‌ ಮೀನಿಂಗ್‌ ಸಹಿಸಿಕೊಳ್ಳಬೇಕಷ್ಟೆ.
ಚಿತ್ರ : ಜೂಮ್‌ (ಕನ್ನಡ)