* ಪದ್ಮಿನಿ
ಹುಡುಗಿಯರು ಧರಿಸುವ ಡ್ರೆಸ್‌ಗಳೇ ಅತ್ಯಾಚಾರಕ್ಕೆ ಪ್ರೇರಣೆ ಎನ್ನುತ್ತದೆ 'ಡ್ರೆಸ್ ಕೋಡ್' ಸಿನಿಮಾ. ಈ ವಿಷಯವೇ ವಿವಾದಾಸ್ಪದ. ಹುಡುಗರದ್ದು ಏನೂ ತಪ್ಪಲ್ಲ, ಅದೇನಿದ್ದರೂ ಹುಡುಗಿಯರ ಬಟ್ಟೆಗಳ ಮೇಲೆ ಅವಲಂಭಿಸಿದೆ ಎನ್ನುವ ಬಾಲಿಶ ವಾದ ಚಿತ್ರದಲ್ಲಿದೆ. ಹೊಸಬರ ತಂಡದ ಚಿತ್ರದ ಬಗ್ಗೆ ನಿರೀಕ್ಷೆಗಳನ್ನು ಇಟ್ಟುಕೊಂಡು ಹೋದರೆ ನಿರಾಶೆ ಖಂಡಿತ.
ಚಿತ್ರದ ಹರಿವಿಗೆ ಕೊಂಡಿಯೇ ಇಲ್ಲ. ಕತೆ ಆರಂಭದಿಂದ ಕೊನೆಯವರೆಗೂ ತಲೆ ಬುಡ ಇಲ್ಲದೆ ಸಾಗುತ್ತದೆ. ಗಟ್ಟಿ ಕತೆ ಇಲ್ಲ. ಮೇಕಿಂಗ್ ಚೆನ್ನಾಗಿಲ್ಲ. ಎಡಿಟಿಂಗ್ ಬಗ್ಗೆ ಕೇಳುವ ಹಾಗೆಯೇ ಇಲ್ಲ, ನಟನೆಯಂತೂ ಕೇಳುವುದೇ ಬೇಡ. ಮುಖ್ಯವಾಗಿ ಚಿತ್ರದಲ್ಲಿ ಕತೆ ಏನು? ಏನನ್ನು ತೋರಿಸಲು ಹೊರಟಿದ್ದಾರೆ ಎಂಬುದೇ ಗೊತ್ತಾಗುವುದಿಲ್ಲ. ಒಟ್ಟು ಎರಡೂವರೆ ಗಂಟೆ ಏನೇನೋ ದೃಶ್ಯಗಳು ತೆರೆ ಮೇಲೆ ಹಾದು ಹೋಗುತ್ತಿರುವ ಅನುಭವಕ್ಕೆ ಅಯ್ಯೋ ಎನ್ನಬೇಕು.
ಕಾಡಿನಲ್ಲಿ ಸಿಕ್ಕಿ ಹಾಕಿಕೊಂಡ ಹುಡುಗ ಹುಡುಗಿಯರನ್ನು ಬೆನ್ನಟ್ಟಿ ಕೊಲ್ಲುವ ಸೈಕೋ ಪಾತ್ರದಾರಿಯ ನಟನೆ ಕೊಂಚ ನೋಡಬಹುದು. ಉಳಿದಂತೆ ಆ ಹುಡುಗಿಯರು, ಅವರಾಡುವ ಮಾತುಗಳು, ಮೆಟೀರಿಯಲಿಸ್ಟಿಕ್ ಲವ್ ಬಗ್ಗೆ ಅವರ ಡೈಲಾಗ್‌ಗಳು.. ಯಾವುದೂ ಪರಿಣಾಮಕಾರಿಯಾಗಿಲ್ಲ. ಬದಲಿಗೆ ಅವೆಲ್ಲ ಹೇಸಿಗೆ ಹುಟ್ಟಿಸುವಂತಿವೆ. ನಡು ನಡುವೆ ಅನಗತ್ಯವಾಗಿರುವ ಎರೋಟಿಕ್ ದೃಶ್ಯಗಳು ಇಷ್ಟವಾಗುವುದೇ ಇಲ್ಲ.
ಕಾಡಿನ ಒಳಗೆ ಚಿತ್ರೀಕರಣ ಮಾಡುವಾಗ ಭಯ ಹುಟ್ಟಿಸುವಂತೆ ಛಾಯಾಗ್ರಾಹಣ ಮಾಡುವ ಅವಕಾಶಗಳು ಇರುತ್ತವೆ. ಒಂದು ಹಾರರ್/ ಸಸ್ಪೆನ್ಸ್ ಚಿತ್ರದ ಗೆಲುವಿಗೆ ಹಿನ್ನಲೆ ಸಂಗೀತವೂ ಕಾಣಿಕೆ ನೀಡುತ್ತದೆ. ಹಾಸ್ಯವೂ ಇಲ್ಲದಿರುವುದು ಸಿನಿಮಾವನ್ನು ಇನ್ನಷ್ಟು ಬೋರಿಂಗ್ ಮಾಡಿದೆ. ಕೊನೆಪಕ್ಷ ಚಿತ್ರಕ್ಕೊಂದು ಗಟ್ಟಿ ಕತೆ ನೀಡಿ ಬೇರೆಲ್ಲ ಲೋಪಗಳನ್ನು ಗೆಲ್ಲಬಹುದಿತ್ತು. ಚಿತ್ರದಲ್ಲಿ ಇದು ಚೆನ್ನಾಗಿದೆ ಎಂದು ಹೇಳುವಂತದ್ದು ಏನೂ ಇಲ್ಲ.
ಕನ್ನಡ ಚಿತ್ರ