ಎನ್‌ಎಸ್‌ಜಿ ಕೈತಪ್ಪಿದರೂ ಎಂಟಿಸಿಆರ್‌ ಸಿಕ್ಕಿತು

*ಕ್ಷಿಪಣಿ ತಂತ್ರಜ್ಞಾನ ನಿಯಂತ್ರಣ ಕೂಟಕ್ಕೆ ಭಾರತ ಸೇರ್ಪಡೆ

ಹೊಸದಿಲ್ಲಿ: ಪರಮಾಣು ಪೂರೈಕೆದಾರರ ಗುಂಪು (ಎನ್‌ಎಸ್‌ಜಿ) ಸೇರ್ಪಡೆ ಪ್ರಯತ್ನದಲ್ಲಿ ಹಿನ್ನಡೆ ಅನುಭವಿಸಿದ ಕೆಲವೇ ದಿನಗಳಲ್ಲಿ ಭಾರತ ಪ್ರತಿಷ್ಠಿತ ಕ್ಷಿಪಣಿ ತಂತ್ರಜ್ಞಾನ ನಿಯಂತ್ರಣ ಕೂಟ(ಎಂಟಿಸಿಆರ್‌)ವನ್ನು ಸೇರುವಲ್ಲಿ ಯಶಸ್ವಿಯಾಗಿದೆ.

ಅತ್ಯಾಧುನಿಕ ಕ್ಷಿಪಣಿ ತಂತ್ರಜ್ಞಾನ ವರ್ಗಾವಣೆಯನ್ನು ಖಾತ್ರಿಪಡಿಸುವ ಮಾತ್ರವಲ್ಲ, ಶಸ್ತ್ರಾಸ್ತ್ರಗಳ ರಫ್ತಿಗೆ ಪರವಾನಗಿ ನೀಡುವ ಜಾಗತಿಕ ನಿಶ್ಯಸ್ತ್ರೀಕರಣ ಬಣದ 35ನೇ ಸದಸ್ಯ ರಾಷ್ಟ್ರವಾಗಿ ಭಾರತ ಸೋಮವಾರ ಸೇರ್ಪಡೆಗೊಂಡಿದೆ ಎಂದು ವಿದೇಶಾಂಗ ವ್ಯವಹಾರಗಳ ಖಾತೆ ತಿಳಿಸಿದೆ. ಕೂಟದ ಪೂರ್ಣಾವಧಿ ಸದಸ್ಯತ್ವ ಜಾಗತಿಕ ನಿಶ್ಯಸ್ತ್ರೀಕರಣ ಮಾನದಂಡಗಳ ಉತ್ತೇಜನಕ್ಕೂ ಲಾಭದಾಯಕವಾಗಲಿದೆ ಎಂದು ಅದು ಹೇಳಿದೆ.

ಫ್ರಾನ್ಸ್‌ನ ರಾಯಭಾರ ನಿಯೋಜಿತ ಅಲೆಕ್ಸಾಂಡರ್‌ ಝೀಗ್ಲರ್‌, ನೆದರ್ಲೆಂಡ್‌ನ ರಾಯಭಾರಿ ಅಲ್ಫೋನ್ಸಸ್‌ ಸ್ಟೀಲಿಂಗಾ ಮತ್ತು ಲುಕ್ಸೆನ್‌ಬರ್ಗ್‌ನ ಲೋರ್‌ ಹ್ಯುಬರ್ಟಿ ಅವರ ಉಪಸ್ಥಿತಿಯಲ್ಲಿ ಭಾರತದ ವಿದೇಶಾಂಗ ಕಾರ್ಯದರ್ಶಿ ಎಸ್‌. ಜೈಶಂಕರ್‌ ಅವರು ಈ ಒಡಂಬಡಿಕೆಗೆ ಸಹಿ ಹಾಕುವ ಮೂಲಕ ಭಾರತ ಇದೇ ಮೊದಲ ಬಾರಿಗೆ ಬಹುಪಕ್ಷೀಯ ಶಸ್ತ್ರಾಸ್ತ್ರ ರಫ್ತು ನಿಯಂತ್ರಣ ಕೂಟವನ್ನು ಪ್ರವೇಶಿಸಿತು.

1998ರ ಪರಮಾಣು ಪರೀಕ್ಷೆ ಬಳಿಕ ಭಾರತವನ್ನು ಕಾನೂನುಬದ್ಧ ಪರಮಾಣು ಶಕ್ತ ರಾಷ್ಟ್ರವಾಗಿ ಗುರುತಿಸುವ ನಿಟ್ಟಿನಲ್ಲಿ ಎಂಟಿಸಿಆರ್‌ ಸದಸ್ಯತ್ವ ಒಂದು ಹೆಜ್ಜೆ ಮುಂದಿಟ್ಟಂತಾಗಿದೆ. ಭಾರತ ಈ ಗುಂಪಿನ ಸದಸ್ಯತ್ವ ಬಯಸಿ 2008ರಲ್ಲಿ ಅರ್ಜಿ ಸಲ್ಲಿಸಿತ್ತು.

ಭಾರತದ ಪ್ರವೇಶಕ್ಕೆ ಆಕ್ಷೇಪ ಸಲ್ಲಿಸುವುದಕ್ಕೆ ಜೂ.6ರವರೆಗೆ ಅವಕಾಶ ನೀಡಲಾಗಿತ್ತಾದರೂ, 34 ಸದಸ್ಯರ ಪೈಕಿ ಯಾವ ರಾಷ್ಟ್ರವೂ ಆಕ್ಷೇಪ ಸಲ್ಲಿಸದೆ ಭಾರತವನ್ನು ಸ್ವಾಗತಿಸಿತ್ತು.

ಕಳೆದ ವರ್ಷ ಇಟಲಿ ಆಕ್ಷೇಪ: ಎಂಟಿಸಿಆರ್‌ ಸೇರುವ ಭಾರತದ ಪ್ರಯತ್ನಕ್ಕೆ ಕಳೆದ ವರ್ಷ ಇಟಲಿ ಆಕ್ಷೇಪವಿತ್ತು. 2012ರಲ್ಲಿ ಕೇರಳ ಕಡಲ ಭಾಗದಲ್ಲಿ ಇಬ್ಬರು ಭಾರತೀಯ ಮೀನುಗಾರರನ್ನು ಕೊಲೆ ಮಾಡಿದ ಆರೋಪದಲ್ಲಿ ಇಬ್ಬರು ಇಟಲಿ ನಾವಿಕರನ್ನು ಬಂಧಿಸಿದ್ದೇ ಇದಕ್ಕೆ ಕಾರಣ. 2016ರ ಮೇ 29ರಂದು ಅವರನ್ನು ಬಿಡುಗಡೆ ಮಾಡಿದ ಬಳಿಕ ಇಟಲಿ ಭಾರತಕ್ಕೆ ಬೆಂಬಲ ನೀಡಿತು.

.....

ಏನಿದು ಎಂಟಿಸಿಆರ್‌?

ಕ್ಷಿಪಣಿ ತಂತ್ರಜ್ಞಾನ ನಿಯಂತ್ರಣ ಕೂಟ(ಎಂಟಿಸಿಆರ್‌) ಸ್ಥಾಪನೆಯಾಗಿದ್ದು 1987ರಲ್ಲಿ. ಸಮೂಹ ವಿನಾಶದ ಶಸ್ತ್ರಾಸ್ತ್ರಗಳನ್ನು ಮಾನವರಹಿತ ವ್ಯವಸ್ಥೆಯ ಮೂಲಕ ಉಡಾಯಿಸುವ ಪ್ರಕ್ರಿಯೆಯನ್ನು ನಿಯಂತ್ರಿಸುವುದು ಉದ್ದೇಶ.

500 ಕೆಜಿ ತೂಕದ ಸಿಡಿತಲೆಗಳನ್ನು 300 ಕಿ.ಮೀ. ದೂರಕ್ಕೆ ಹಾರಿಸಬಲ್ಲ ಮಿಸೈಲ್‌ ಮತ್ತು ಕ್ಷಿಪಣಿ ಸಂಬಂಧಿ ತಂತ್ರಜ್ಞಾನಗಳ ಮಾರಾಟವನ್ನು ಎಂಟಿಸಿಆರ್‌ ನಿರ್ಬಂಧಿಸುತ್ತದೆ. ಇದರಲ್ಲಿ ಕ್ರೂಸ್‌ ಕ್ಷಿಪಣಿಗಳು ಮತ್ತು ದೊಡ್ಡ ಗಾತ್ರದ ಡ್ರೋನ್‌ಗಳು ಸೇರಿವೆ.

ಜಗತ್ತಿನಲ್ಲಿರುವ ನಾಲ್ಕು ಬಹುಪಕ್ಷೀಯ ಶಸ್ತ್ರಾಸ್ತ್ರ ರಫ್ತು ನಿಯಂತ್ರಣ ಕೂಟಗಳಲ್ಲಿ ಇದೂ ಒಂದು. ಎನ್‌ಎಸ್‌ಜಿ, ಆಸ್ಪ್ರೇಲಿಯಾ ಗ್ರೂಪ್‌ ಮತ್ತು ವಾಸ್ಸೆನಾರ್‌ ಅರೇಂಜ್‌ಮೆಂಟ್‌ ಇತರ ಮೂರು ಶಕ್ತಿಶಾಲಿ ಗುಂಪುಗಳು.

ಭಾರತ-ಅಮೆರಿಕ ನಾಗರಿಕ ಪರಮಾಣು ಸಹಕಾರ ಒಪ್ಪಂದದ ಭಾಗವಾಗಿ ಭಾರತ ಈ ನಾಲ್ಕೂ ಕೂಟಗಳನ್ನು ಸೇರಲು 2008ರಿಂದಲೇ ಪ್ರಯತ್ನಿಸುತ್ತಿದೆ.

.....

ಭಾರತಕ್ಕೆ ಏನು ಲಾಭ?

* ಎಂಟಿಸಿಆರ್‌ ಸದಸ್ಯತ್ವದಿಂದ ಬಾಹ್ಯಾಕಾಶ ಸಂಶೋಧನೆಯ ನಿಟ್ಟಿನಲ್ಲಿ ಕ್ರಯೋಜನಿಕ್‌ ರಾಕೆಟ್‌ ಎಂಜಿನ್‌ಗಳ ಅಭಿವೃದ್ಧಿಯಲ್ಲಿ ಇದುವರೆಗೆ ನಿರ್ಬಂಧಿತವಾಗಿದ್ದ ಅತ್ಯಾಧುನಿಕ ತಂತ್ರಜ್ಞಾನಗಳು ಭಾರತಕ್ಕೆ ದೊರಕಲಿವೆ.

* ಅಮೆರಿಕ ಅಫಘಾನಿಸ್ತಾನ ಮತ್ತು ಪಾಕಿಸ್ತಾನದಲ್ಲಿ ಭಯೋತ್ಪಾದನೆ ವಿರುದ್ಧ ಹೋರಾಟದಲ್ಲಿ ಬಳಸಿದ ಡ್ರೋನ್‌ಗಳನ್ನು ಭಾರತವೂ ಹೊಂದಬಹುದು.

* ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್‌ಡಿಒ) ಮತ್ತು ರಷ್ಯಾ ಜಂಟಿಯಾಗಿ ಅಭಿವೃದ್ಧಿಪಡಿಸಿದ ಬ್ರಹ್ಮೋಸ್‌ ಸೂಪರ್‌ಸೋನಿಕ್‌ ಕ್ರೂಸ್‌ ಕ್ಷಿಪಣಿಗಳ ಮಾರಾಟಕ್ಕೆ ಹೊಸ ಮಾರುಕಟ್ಟೆ ಹುಡುಕಬಹುದು.

* ಎರಡೂ ರಾಷ್ಟ್ರಗಳು ತೃತೀಯ ರಾಷ್ಟ್ರಗಳಿಗೆ ಬ್ರಹ್ಮೋಸ್‌ ಮಾರಾಟದ ಆಶಾವಾದ ಹೊಂದಿದ್ದು, ಭಾರತದ ಸದಸ್ಯತ್ವದಿಂದ ಇದು ಸುಲಭವಾಗಲಿದೆ. ಭಾರತ 200-300 ಕೆಜಿ ತೂಕದ ಸಿಡಿತಲೆಗಳನ್ನು 290 ಕಿ.ಮೀ. ದೂರಕ್ಕೆ ಹಾರಿಸಬಲ್ಲ ಬ್ರಹ್ಮೋಸ್‌ ಕ್ಷಿಪಣಿಗಳನ್ನು ವಿಯೆಟ್ನಾಂಗೆ ಮಾರಾಟ ಮಾಡುವ ನಿಟ್ಟಿನಲ್ಲಿ ಆಗಲೇ ಮಾತುಕತೆ ನಡೆಸಿದೆ.

.....

ಚೀನಾಕ್ಕೆ ಸದಸ್ಯತ್ವ ಸಿಕ್ಕಿಲ್ಲ

ಪರಮಾಣು ಪೂರೈಕೆದಾರರ ಗುಂಪನ್ನು ಸೇರುವ ಭಾರತದ ಪ್ರಯತ್ನಕ್ಕೆ ಅಡ್ಡಗಾಲು ಹಾಕಿದ ಚೀನಾ ಎಂಟಿಸಿಆರ್‌ ಸದಸ್ಯನಲ್ಲ.

ಬಹುಕಾಲದಿಂದ ಸದಸ್ಯತ್ವ ಪಡೆಯಲು ಬಯಸುತ್ತಿರುವ ಚೀನಾಕ್ಕೆ ಈಗ ಭಾರತವನ್ನೂ ಒಲಿಸಿಕೊಳ್ಳಬೇಕಾದ ಅನಿವಾರ್ಯತೆ ಒದಗಿದೆ. ಹಾಗಾಗಿ ಎನ್‌ಎಸ್‌ಜಿ ಮತ್ತು ಎಂಟಿಸಿಆರ್‌ ಸದಸ್ಯತ್ವದ ವಿಚಾರದಲ್ಲಿ ಚೀನಾ ಕೊಡುಕೊಳ್ಳುವಿಕೆಯ ಅನಿವಾರ್ಯ ನಿರ್ಧಾರಕ್ಕೆ ಬಂದರೆ ಅಚ್ಚರಿ ಇಲ್ಲ.