ಫಲ ನೀಡಲಾರಂಭಿಸಿದ ಕಾಳಧನದ ವಿರುದ್ಧ ಸಮರ ಹೊಸದಿಲ್ಲಿ: ಕಾಳಧನದ ವಿರುದ್ಧ ಸರಕಾರ ಸಾರಿರುವ ಸಮರ ನಿಧಾನವಾಗಿ ಫಲ ನೀಡಲಾರಂಭಿಸಿದೆ. ಭಾರತೀಯರು ವಿದೇಶಿ ಬ್ಯಾಂಕ್‌ಗಳ ಖಾತೆಗಳಲ್ಲಿ 13 ಸಾವಿರ ಕೋಟಿ ರೂ. ಅಘೋಷಿತ ಆದಾಯ ಇಟ್ಟಿರುವುದನ್ನು ಆದಾಯ ತೆರಿಗೆ ಇಲಾಖೆ ಪತ್ತೆ ಹಚ್ಚಿದೆ. 2011 - 13 ನೇ ಸಾಲಿನ ನಲ್ಲಿ ಕೇವಲ 2 ಸೆಟ್‌ ಮಾಹಿತಿಗಳಿಂದ ಈ ಅಂಶ ಬಯಲಾಗಿದೆ ಎಂಬುದು ಗಮನಾರ್ಹ. ಕನಿಷ್ಠ 400 ಪ್ರಕರಣಗಳಲ್ಲಿ ಭಾರತೀಯರು ಎಚ್‌ಎಸ್‌ಬಿಸಿ ಜಿನೇವಾ ಬ್ಯಾಂಕ್‌ನಲ್ಲಿ ಇಟ್ಟಿರುವ ಸುಮಾರು 8,186 ಕೋಟಿ ರೂ ಅಘೋಷಿತ ಆದಾಯ ಪತ್ತೆಯಾಗಿದೆ. ಫ್ರೆಂಚ್‌ ಸರಕಾರದಿಂದ ಈ ಮಾಹಿತಿ ಸ್ವೀಕರಿಸಲಾಗಿದೆ. ಎಚ್‌ಎಸ್‌ಬಿಸಿ ಬ್ಯಾಂಕ್‌ ಪ್ರಕರಣಗಳಲ್ಲಿ ಸುಮಾರು 628 ಖಾತೆಗಳ ಮಾಹಿತಿಯನ್ನು ಸರಕಾರ ಪಡೆದಿದ್ದು, ಇದರಲ್ಲಿ ಸುಮಾರು 213 ಖಾತೆಗಳ ಸ್ಥಗಿತಗೊಂಡಿವೆ. ಇಲ್ಲವೇ ಅವುಗಳಲ್ಲಿ ಯಾವುದೇ ಹಣವಿಲ್ಲ ಅಥವಾ ಅವೆಲ್ಲ ಅನಿವಾಸಿ ಭಾರತೀಯರ ಖಾತೆಗಳಾಗಿವೆ ಎನ್ನಲಾಗಿವೆ. ಆದರೆ ಐಟಿ ಇಲಾಖೆಯ ಈ ಎಲ್ಲ ಆರೋಪಗಳನ್ನು ಎಚ್‌ಎಸ್‌ಬಿಸಿ ಅಲ್ಲಗಳೆದಿದೆ. ಇನ್ನೊಂದು ಮೂಲದ ಪ್ರಕಾರ 2013 ರಲ್ಲಿ ಅಂತಾರಾಷ್ಟ್ರೀಯ ತನಿಖಾ ಪತ್ರಕರ್ತರ ಒಕ್ಕೂಟ ( ಐಸಿಐಜೆ) ದ ತನಿಖೆಯಿಂದ ಬಯಲಾದ ಮಾಹಿತಿ ಆಧರಿಸಿ, ಐಟಿ ನಡೆಸಿದ ತನಿಖೆಯಲ್ಲಿ ಸುಮಾರು 700 ಭಾರತೀಯರ ವಿದೇಶಿ ಖಾತೆಗಳಲ್ಲಿ ಸುಮಾರು 5 ಸಾವಿರ ಕೋಟಿ ರೂ. ಅಘೋಷಿತ ಆದಾಯ ಪತ್ತೆ ಹಚ್ಚಲಾಗಿದೆ. ಐಸಿಐಜೆ ತನಿಖೆ ಆಧಾರದ ಮೇಲೆ, ತೆರಿಗೆ ತಪ್ಪಿಸಲು ವಿದೇಶಿ ಬ್ಯಾಂಕ್‌ಗಳಲ್ಲಿ ಹಣ ಇಟ್ಟಿರುವ ಬಗ್ಗೆ ಐಟಿ ಇಲಾಖೆ ಸುಮಾರು 55 ದೂರುಗಳನ್ನು ಕೋರ್ಟ್‌ಗೆ ಸಲ್ಲಿಕೆ ಮಾಡಿದೆ. ಈ ಕುರಿತಂತೆ ದಾಖಲೆಗಳ ಪರಿಶೀಲನೆ ವೇಳೆ, ಸಂಸ್ಥೆಗಳು ತೆರಿಗೆ ತಪ್ಪಿಸಲು ಸುಳ್ಳು ಹೇಳಿಕೆ ನೀಡಿರುವುದು ಗೊತ್ತಾಗಿದೆ. ಎಚ್‌ಎಸ್‌ಬಿಸಿ ಜಿನೇವಾದ ಸುಮಾರು 75 ಪ್ರಕರಣಗಳಲ್ಲಿ ತೆರಿಗೆ ಅಧಿಕಾರಿಗಳು ಕಾನೂನು ಪ್ರಕ್ರಿಯೆ ಆರಂಭಿಸಿದ್ದಾರೆ.
↧
ವಿದೇಶಿ ಬ್ಯಾಂಕ್‌ಗಳಲ್ಲಿ 13 ಸಾವಿರ ಕೋಟಿ ರೂ ಕಪ್ಪು ಹಣ ಪತ್ತೆ
↧