ವಿಶ್ವ ಸಂಸ್ಥೆಯಲ್ಲಿ ಜಾಗತಿಕ ಯೋಗ ಸಂದೇಶ ವಿಶ್ವಸಂಸ್ಥೆ: ಯೋಗ ಜಗತ್ತಿಗೆ ಸಾಮರಸ್ಯದ ಸಂದೇಶವನ್ನು ಸಾರುತ್ತದೆ. ಜನರು ರಾಷ್ಟ್ರಗಳ ಎಲ್ಲೆ ಮೀರಿ, ಜಾತಿ, ಜನಾಂಗ, ನಂಬಿಕೆ, ಲಿಂಗ, ಲೈಂಗಿಕ ಒಲವಿನ ಮಿತಿಗಳನ್ನು ಮೀರಿ ಏಕತೆಗೆ ಬದ್ಧರಾಗಿರಬೇಕು ಎಂದು ವಿಶ್ವ ಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಬಾನ್‌ ಕಿ ಮೂನ್‌ ಜಗತ್ತನ್ನು ವಿನಂತಿಸಿದರು. ಆರೋಗ್ಯಕರ ಆಯ್ಕೆಗಳನ್ನು ಜೀವನ ಪದ್ಧತಿಯನ್ನು ಅಳವಡಿಸಿಕೊಳ್ಳಿ, ಸಹ ಮಾನವರ ಜತೆಗೆ ಏಕತೆಗೆ ಬದ್ಧರಾಗಿ. ನವೇಲ್ಲರೂ ಒಂದೇ ಮಾನವ ಕುಲದ ಬಂಧುಗಳು ಎಂಬುದನ್ನು ನೆನಪಿಟ್ಟುಕೊಂಡು ಪ್ರತಿ ದಿನವನ್ನೂ ಯೋಗ ದಿನವಾಗಿ ಆಚರಿಸೋಣ ಎಂದು ಬಾನ್‌ ಎರಡನೇ ಅಂತಾರಾಷ್ಟ್ರೀಯ ಯೋಗ ದಿನಾಚರಣೆಯ ಜಾಗತಿಕ ಪ್ರಧಾನ ಕಾರ್ಯಕ್ರಮದಲ್ಲಿ ಮನದುಂಬಿ ಹೇಳಿದರು. ಫ್ಲೊರಿಡಾದ ಸಲಿಂಗಿಗಳ ನೈಟ್‌ ಕ್ಲಬ್‌ನಲ್ಲಿ ಒಮರ್‌ ಮತೀನ್‌ ಎಂಬಾತ 49 ಮಂದಿಯನ್ನು ದಾರುಣವಾಗಿ ಗುಂಡಿಕ್ಕಿ ಕೊಲೆ ಮಾಡಿದ ಘಟನೆಯ ಹಿನ್ನೆಲೆಯಲ್ಲಿ ಬಾನ್‌ ಅವರ ಲಿಂಗ ತಾರತಮ್ಯ ಮತ್ತು ಲೈಂಗಿಕ ಒಲವಿನ ಮಾತುಗಳು ಹೆಚ್ಚು ಅರ್ಥಪೂರ್ಣವಾಗಿವೆ. ಭಾರತದಲ್ಲಿ ಹುಟ್ಟಿದ ಪ್ರಾಚೀನ ದೈಹಿಕ, ಮಾನಸಿಕ ಮತ್ತು ಆಧ್ಯಾತ್ಮಿಕ ಅಭ್ಯಾಸ ಧಾರೆ ಇದೀಗ ಇಡೀ ಜಗತ್ತಿಗೇ ಹರಡಿದೆ ಎಂದು ಹೇಳಿದ ಅವರು, ಯೋಗ ಮನಸು ಮತ್ತು ದೇಹ, ದೈಹಿಕ ಮತ್ತು ಮಾನಸಿಕ ಆರೋಗ್ಯವನ್ನು ಬ್ಯಾಲೆನ್ಸ್‌ ಮಾಡುತ್ತದೆ. ಜನರ ನಡುವೆ ಸಾಮರಸ್ಯವನ್ನು ಉತ್ತೇಜಿಸುತ್ತದೆ ಎಂದು ಹೇಳಿದರು. ಅಮೆರಿಕದ ಟೈಮ್ಸ್‌ ಸ್ಕ್ವೇರ್‌ ಸೇರಿದಂತೆ ನಾನಾ ಕಡೆಗಳಲ್ಲಿ ಯೋಗಾಭ್ಯಾಸ ನಡೆಯಿತು. ಜಗತ್ತಿನಾದ್ಯಂತ ಹಲವು ರಾಷ್ಟ್ರಗಳಲ್ಲಿ ಯೋಗ ದಿನ ಮೇಳೈಸಿತು.
↧
ಧರ್ಮ, ಲಿಂಗ, ನಂಬಿಕೆ ಮೀರಿ ಏಕತೆ ಇರಲಿ: ಬಾನ್‌
↧