ಹೊಸದಿಲ್ಲಿ: ಸ್ಕೃಲೈಟ್‌ ಹಾಸ್ಪಿಟಾಲಿಟಿ ಲಿಮಿಟೆಡ್‌ ಭೂಖರೀದಿ ಹಗರಣ ಸಂಬಂಧ ಕಾಂಗ್ರೆಸ್‌ ಅಧ್ಯಕ್ಷೆ ಸೋನಿಯಾ ಗಾಂಧಿ ಅವರ ಅಳಿಯ ರಾಬರ್ಟ್‌ ವಾದ್ರಾ ಅವರಿಗೆ ಜಾರಿ ನಿರ್ದೇಶನಾಲಯ ಮಂಗಳವಾರ ನೋಟಿಸ್‌ ಜಾರಿ ಮಾಡಿದೆ. ಕಠಿಣ ಅಕ್ರಮ ಹಣ ಲೇವಾದೇವಿ ತಡೆ ಕಾಯಿದೆ(ಪಿಎಂಎಲ್‌ಎ)ಯಡಿ ನೋಟಿಸ್‌ ಜಾರಿ ಮಾಡಲಾಗಿದ್ದು, ಇದಕ್ಕೆ ಉತ್ತರಿಸಲು ವಾದ್ರಾ ಸಂಸ್ಥೆಗೆ ಜೂನ್‌ 24ರವರೆಗೆ ಕಾಲಾವಕಾಶ ನೀಡಲಾಗಿದೆ. ವಾದ್ರಾ ಮಾಲೀಕತ್ವದ ಸ್ಕೈಲೈಟ್‌ ಹಾಸ್ಪಿಟಾಲಿಟಿ ಸಂಸ್ಥೆಯು ಡಿಎಲ್‌ಎಫ್‌ ಜತೆ ನಡೆಸಿದ ಭೂಮಿ ಖರೀದಿ ವ್ಯವಹಾರದ ಕುರಿತು ಜಾರಿ ನಿರ್ದೇಶನಾಲಯ ಬಹಳ ಹಿಂದಿನಿಂದಲೂ ಪರಿಶೀಲನೆ ನಡೆಸುತ್ತಿತ್ತು. ರಾಜಸ್ಥಾನದ ಬಿಕಾನೇರ್‌ ಜಿಲ್ಲೆಯಲ್ಲಿ ಸ್ಕೈಲೈಟ್‌ ಖರೀದಿಸಿದ ಭೂಮಿಯ ಮಾಲೀಕತ್ವದ ಕುರಿತಂತೆ ವಿವಾದ ತಲೆದೋರಿದೆ. ಸೇನಾ ಉದ್ದೇಶಕ್ಕೆ ನಡೆಸಿದ ಭೂಸ್ವಾಧೀನದಲ್ಲಿ ಭೂಮಿ ಕಳೆದುಕೊಂಡವರಿಗೆ ಮೀಸಲಿರಿಸಿದ್ದ ಜಮೀನನ್ನು ನಕಲಿ ಮಾಲೀಕರನ್ನು ಸೃಷ್ಟಿಸಿ ಅವರಿಂದ ಖರೀದಿಸಲಾಗಿದೆ ಎಂಬ ಆರೋಪ ಕೇಳಿಬಂದಿದೆ. ರಾಜಸ್ಥಾನದಲ್ಲಿ ಕಾಂಗ್ರೆಸ್‌ ಆಳ್ವಿಕೆಯಲ್ಲಿದ್ದ ಕಾಲದಲ್ಲಿ ನಡೆದ ಹಗರಣ ಇದಾಗಿದ್ದು, ವಸುಂಧರಾ ರಾಜೇ ಸರಕಾರ ಅಧಿಕಾರಕ್ಕೆ ಬಂದ ಬಳಿಕ ಈ ವ್ಯವಹಾರವನ್ನು ರದ್ದುಪಡಿಸಲಾಗಿತ್ತು.
↧
ಬಿಕಾನೇರ್‌ ಭೂ ಹಗರಣ: ವಾದ್ರಾಗೆ ಇಡಿ ನೋಟಿಸ್‌
↧