ಪದ್ಮಿನಿ ಜೈನ್‌ ಎಸ್‌. ಭಾರತೀಯ ಸಿನಿಮಾ ಹಾಗೂ ಮಳೆ ಕುಚುಕು ದೋಸ್ತ್‌ಗಳಿದ್ದ ಹಾಗೆ. ಇಲ್ಲಿ ಪ್ರತಿ ಸಿನಿಮಾದಲ್ಲೂ ಕೊನೇ ಪಕ್ಷ ಒಂದಾದರೂ ಮಳೆ ದೃಶ್ಯ ಇರ್ಲೇಬೇಕು. ಅದರಲ್ಲೂ ಮಳೆ ಹಾಡುಗಳು ಅಂದರೆ ನಮ್ಮ ಪ್ರೇಕ್ಷಕನಿಗೂ ಹಾಟ್‌ ಫೇವರಿಟ್‌. ಹೀರೋ ಹೀರೋಯಿನ್‌ ವೈಟ್‌ ಆ್ಯಂಡ್‌ ವೈಟ್‌ನಲ್ಲಿ ಕುಣಿದ್ರೆ ಥಿಯೇಟರ್‌ನಲ್ಲಿ ವಿಷಲ್‌ಗೆ ಬರ ಇಲ್ಲ. ಸ್ಯಾಂಡಲ್‌ವುಡ್‌ನಲ್ಲಂತೂ ಕೆಲವು ಚಿತ್ರಗಳಲ್ಲಿ ಮಳೆಯೇ ಕಥೆಯ ಎಳೆಯಾದರೆ, ಇನ್ನು ಕೆಲವು ಚಿತ್ರಗಳಲ್ಲಿ ಕೊನೆಯವರೆಗೂ ಮಳೆ ಹನಿಯುತ್ತಲೇ ಇರುವ ದೃಶ್ಯಗಳ ಸೊಬಗು. ಚಿತ್ರಗಳ ಹೆಸರಲ್ಲೇ ಮಳೆಯ ಕರಾಮತ್ತು ತೋರಿಸುವಂಥವು ಮತ್ತೆ ಹಲವು. ಸ್ಯಾಂಡಲ್‌ವುಡ್‌ನಲ್ಲಿ ಟೈಟಲ್‌ ಮೂಲಕ ಮಳೆ ಸುರಿಸಿದ ಕೆಲ ಚಿತ್ರಗಳು ಇಲ್ಲಿವೆ. ಮುಂಗಾರು ಮಳೆ: ಶತಕ ಬಾರಿಸಿ ಸಿನಿ ಪ್ರೇಮಿಗಳನ್ನು ನಿರಂತರ ಸೋನೆ ಮಳೆಯಲ್ಲಿ ತೋಯಿಸಿದ ಕೀರ್ತಿ ಮುಂಗಾರು ಮಳೆಯದ್ದು. ಇದು ಮ್ಯೂಸಿಕಲ್‌ ಹಿಟ್‌ ಚಿತ್ರ ಕೂಡ ಹೌದು. ಚಿತ್ರದ ಬಹುತೇಕ ದೃಶ್ಯಗಳಲ್ಲಿ ಗಣೇಶ್‌ ಮಳೆ ಹನಿಗಳ ಪ್ರೋಕ್ಷಣೆ ಮಾಡಿಸಿಕೊಂಡಿದ್ದಾರೆ. ಅಲ್ಲದೆ ಗಣೇಶ್‌ ಹಾಗೂ ಪೂಜಾ ಗಾಂಧಿ ಕೆಮಿಸ್ಟ್ರಿಗೆ ಪ್ರೇಕ್ಷಕ ಕ್ಲೀನ್‌ ಬೋಲ್ಡ್‌ ಆಗಿದ್ದ. ಇದೇ ಸಕ್ಸಸ್‌ ಮಂತ್ರವನ್ನು ಇಟ್ಟುಕೊಂಡು ಅದರ ಸೀಕ್ವೆಲ್‌ ಚಿತ್ರ ತಯಾರು ಮಾಡುತ್ತಿದ್ದಾರೆ ನಿರ್ದೇಶಕ ಶಶಾಂಕ್‌. 'ಮುಂಗಾರು ಮಳೆ 2' ಚಿತ್ರದಲ್ಲಿ ಗಣೇಶ್‌ಗೆ ಜೋಡಿಯಾಗಿ ಪೂಜಾ ಗಾಂಧಿ ಬದಲು ನೇಹಾ ಶೆಟ್ಟಿ ಕಾಣಿಸಿಕೊಳ್ಳಲಿದ್ದಾರೆ. ರವಿಚಂದ್ರನ್‌ ಕೂಡ ಮುಖ್ಯ ಪಾತ್ರವೊಂದನ್ನು ನಿರ್ವಹಿಸಿದ್ದಾರೆ. ಮಳೆ: ಪ್ರೇಮ್‌ ಹಾಗೂ ಅಮೂಲ್ಯ ಅಭಿನಯದ ಚಿತ್ರ ಬಿಡುಗಡೆಗೆ ಮುನ್ನ ಸದ್ದು ಮಾಡಿದಷ್ಟು ಬಿಡುಗಡೆಯ ನಂತರ ಮಾಡಲಿಲ್ಲ. ಚಿತ್ರದ ಬಗ್ಗೆ ಸಕಾರಾತ್ಮಕ ಮಾತುಗಳು ಕೇಳಿ ಬಂದರೂ ಚಿತ್ರ ಬಾಕ್ಸ್‌ ಆಫೀಸಿನಲ್ಲಿ ಗೆಲ್ಲಲಿಲ್ಲ. ಹೆಸರಿಗೆ ತಕ್ಕಂತೆ ಚಿತ್ರದಲ್ಲಿ ಮಳೆ ಇದೆ. ನಾಯಕನಿಗೆ ನಾಯಕಿಯ ಮೇಲೆ ಲವ್‌ ಅಟ್‌ ಫಸ್ಟ್‌ ಸೈಟ್‌ ಆಗುವುದು ಆಕೆಯನ್ನು ಮಳೆಯಲ್ಲಿ ಕಂಡಾಗ. ಆಕೆ ಆತನ ಪ್ರೀತಿಯನ್ನು ಒಪ್ಪುತ್ತಾಳಾ ಬಿಡುತ್ತಾಳಾ ಎಂದು ಡಿಸೈಡ್‌ ಆಗುವುದು ಕೂಡ ಮಳೆ ಬರುವಾಗ. ಹಾಗಾಗಿ ಚಿತ್ರದ ಹೆಸರಿಗೂ ಕತೆಗೂ ಲಿಂಕ್‌ ನೀಡಿದ್ದಾರೆ. ಮಳೆಯಲಿ ಜೊತೆಯಲಿ: ಪ್ರೀತಮ್‌ ಗುಬ್ಬಿ ನಿರ್ದೇಶನದ ಗಣೇಶ್‌ ಹಾಗೂ ಯುವನಿಕಾ ಚೌಧರಿ ಅಭಿನಯದ ಚಿತ್ರದಲ್ಲೂ ಮಳೆಗೆ ಪ್ರಾಮುಖ್ಯ ನೀಡಲಾಗಿದೆ. ಚಿಕ್ಕಮಗಳೂರು, ಸಕಲೇಶಪುರದ ಸುಂದರ ತಾಣಗಳಲ್ಲಿ ಶೂಟಿಂಗ್‌ ನಡೆಸಲಾಗಿದೆ. ಅಲ್ಲಿನ ವಾತಾವರಣಕ್ಕೆ ಸರಿಯಾಗಿ ಚಿತ್ರದಲ್ಲೂ ಆಗಾಗ ಮಳೆ ದೃಶ್ಯಗಳಿವೆ. ಇನ್ನು ಕತೆಯಲ್ಲಿ ಮಳೆಗೆ ಅಂತಹ ಪಾತ್ರವಿರದೇ ಹೋದರೂ ಮಳೆ ಚಿತ್ರದ ಸೌಂದರ್ಯ ಹೆಚ್ಚಿಸಿರುವುದು ನಿಜ. 'ಮಳೆಯಲಿ ಜೊತೆಯಲಿ' ಎಂಬ ಹಾಡು ಚಿತ್ರದ ಪ್ಲಸ್‌ ಪಾಯಿಂಟ್‌ ಕೂಡ ಹೌದು. ಮುತ್ತಿನ ಮಳೆಯಲಿ: ಮಂಜು ಸಾಗರ್‌ ಹಾಗೂ ರಮನೀತು ಚೌಧರಿ ಅಭಿನಯದ ಚಿತ್ರ 'ಮುತ್ತಿನ ಮಳೆಯಲಿ'. ಹೆಸರಿಗೆ ಹೊಂದುವಂತಹ ಕತೆಯೇನೂ ಚಿತ್ರದಲ್ಲಿ ಇರಲಿಲ್ಲ. ಅಲ್ಲದೆ ಚಿತ್ರವನ್ನು ಮಲೆನಾಡಿನ ಸುಂದರ ತಾಣಗಳಲ್ಲಿ ಶೂಟಿಂಗ್‌ ಮಾಡಲಾಗಿತ್ತಾದರೂ ಪ್ರಕೃತಿ ಸೌಂದರ್ಯವನ್ನು ಸೆರೆ ಹಿಡಿಯುವಲ್ಲಿ ಚಿತ್ರ ಸೋತಿದೆ. ಬಹುತೇಕ ಕಡೆ ಇಂಡೋರ್‌ ದೃಶ್ಯಗಳು, ಕ್ಲೋಸ್‌ಅಪ್‌ ಶಾಟ್ಸ್‌ನಿಂದಾಗಿ ಡಲ್‌ ಅನಿಸಿತ್ತು. 'ಮುತ್ತಿನ ಮಳೆ'ಯನ್ನು ಹೆಸರಿನಲ್ಲಷ್ಟೇ ಕಾಣಬಹುದು. ಮಳೆ ಬರಲಿ ಮಂಜೂ ಇರಲಿ: ಶ್ರೀನಗರ ಕಿಟ್ಟಿ, ನಾಗ್‌ ಕಿರಣ್‌ ಹಾಗೂ ಪಾರ್ವತಿ ಮೆನನ್‌ ಲೀಡ್‌ ಪಾತ್ರಗಳಲ್ಲಿ ಮಿಂಚಿದ ಚಿತ್ರ 'ಮಳೆ ಬರಲಿ ಮಂಜೂ ಇರಲಿ'. ತ್ರಿಕೋನ ಪ್ರೇಮಕತೆಯ ಚಿತ್ರವನ್ನು ಸದಾ ಮಂಜು ಹಾಗೂ ಮಳೆ ಸುರಿಯುವ ಜಾಗಗಳಲ್ಲೇ ಶೂಟ್‌ ಮಾಡಲಾಗಿತ್ತು. ಪಾರ್ವತಿ ಮೆನನ್‌ ಚಿನಕುರಳಿಯಂತೆ ನಟಿಸಿ ಎಲ್ಲರ ಮೆಚ್ಚುಗೆ ಪಡೆದರೆ ನಾಗ್‌ಕಿರಣ್‌ ಲವರ್‌ ಬಾಯ್‌ ಇಮೇಜಲ್ಲಿ ಮಿಂಚಿದ್ದರು. ಮೌನಿಯಾಗಿ ಕಿಟ್ಟಿಯ ಪಾತ್ರವೂ ಪ್ರೇಕ್ಷಕರ ಮೆಚ್ಚುಗೆ ಪಡೆದಿತ್ತು. ಕತೆಯಲ್ಲಿ ಮಳೆಗೆ ಅಂತಹ ಮುಖ್ಯ ಪಾತ್ರ ಇಲ್ಲದೇ ಹೋದರೂ ಇಡೀ ಚಿತ್ರ ಮಂಜು ಹಾಗೂ ಮಳೆಯ ಜೊತೆಗೇ ಸಾಗುತ್ತದೆ. ಮತ್ತೆ ಮುಂಗಾರು: ಪಾಕಿಸ್ತಾನಿ ಜೈಲಿನಲ್ಲಿ 21 ವರ್ಷಗಳ ಕಾಲ ಬದುಕು ಕಳೆದ ವ್ಯಕ್ತಿಯ ಬದುಕಿನ ನೈಜ ಘಟನೆಯನ್ನಾಧರಿಸಿದ ಚಿತ್ರ 'ಮತ್ತೆ ಮುಂಗಾರು'. ಶ್ರೀನಗರ ಕಿಟ್ಟಿ ಈ ಪಾತ್ರವನ್ನು ಸಮರ್ಥವಾಗಿ ನಿರ್ವಹಿಸಿದ್ದರು. ಬಹುಶಃ 'ಮತ್ತೆ ಮುಂಗಾರು' ಎಂಬುದು ಆತ ಅಷ್ಟು ವರ್ಷಗಳ ಜೈಲಿನಲ್ಲಿದ್ದು ಅಲ್ಲಿಂದ ಹೊರ ಬಂದು ಮತ್ತೆ ಹೊಸ ಜೀವನ ಆರಂಭಿಸುವ ಸಂಕೇತವಾಗಿರಬಹುದು. ಬಾಕ್ಸ್‌ ಆಫೀಸಿನಲ್ಲಿ ಜಾಸ್ತಿ ಸದ್ದು ಮಾಡದೇ ಹೋದರೂ ಕಿಟ್ಟಿ ಬದುಕಿನ ಉತ್ತಮ ಚಿತ್ರಗಳ ಪೈಕಿ ಇದೂ ಒಂದು.
↧
ಟೈಟಲ್‌ನಲ್ಲಿ ಮಳೆ ಲೀಲೆ
↧