ಬಹುನಿರೀಕ್ಷಿತ ಕನ್ನಡ ಸಿನಿಮಾ 'ಜಿಗರ್‌ಥಂಡ'ಕ್ಕೆ ವಿದೇಶದಲ್ಲಿ ಹಿನ್ನೆಲೆ ಸಂಗೀತ ಮಾಡಿರೋದು ಸ್ಯಾಂಡಲ್‌ವುಡ್‌ನಲ್ಲಿ ಭರ್ಜರಿ ಸುದ್ದಿಯಾಗಿದೆ. ಕನ್ನಡ ಚಿತ್ರವೊಂದರ ಹಿನ್ನೆಲೆ ಸಂಗೀತ ವಿದೇಶಿ ಸ್ಟುಡಿಯೋಗಳಲ್ಲಿ ರೆಕಾರ್ಡ್‌ ಆಗಿರೋದು ಇದೇ ಮೊದಲು. ಸ್ಪೈನ್‌, ಇಟಲಿ ಮತ್ತು ಅಮೆರಿಕದ ಸ್ಟುಡಿಯೋಗಳಲ್ಲಿ ಹಿನ್ನೆಲೆ ಸಂಗೀತ ಸಂಯೋಜಿಸಿದ್ದು, ಅಲ್ಲಿನ ತಂತ್ರಜ್ಞರೇ ಕಾರ್ಯನಿರ್ವಹಿಸಿದ್ದಾರೆ. 'ಈವರೆಗೆ ಯಾವ ಕನ್ನಡ ಚಿತ್ರದಲ್ಲಿಯೂ ಇಂತಹ ಪ್ರಯೋಗ ನಡೆದಿಲ್ಲ. ಬ್ಯಾಕ್‌ಗ್ರೌಂಡ್‌ ಸ್ಕೋರ್‌ಗಾಗಿ ನಾವು ಮುಂಬಯಿ, ಹೈದರಾಬಾದ್‌, ಚೆನ್ನೈಗೆ ಹೋಗುತ್ತಿದ್ದೆವು. 'ಜಿಗರ್‌ಥಂಡ'ಕ್ಕೆ ಸ್ಪೈನ್‌, ಇಟಲಿ, ಅಮೆರಿಕದ ಸ್ಟುಡಿಯೋಗಳಲ್ಲಿ ಕೆಲಸ ಮಾಡಿದ್ದೇವೆ. ವಿದೇಶಿ ಸಂಗೀತ ಉಪಕರಣಗಳನ್ನು ಬಳಸಿ ವಿಭಿನ್ನ ಪ್ರಯೋಗ ಮಾಡಿದ್ದೇವೆ' ಎನ್ನುತ್ತಾರೆ ಚಿತ್ರದ ಸಂಗೀತ ಸಂಯೋಜಕ ಅರ್ಜುನ್‌ ಜನ್ಯ. 'ವಿದೇಶಗಳ ಗುಣಮಟ್ಟದ ಸ್ಟುಡಿಯೋಗಳಲ್ಲಿ ಹಿನ್ನೆಲೆ ಸಂಗೀತ ಸಂಯೋಜಿಸುವ ಐಡಿಯಾ ಕುರಿತು ನಾವು ಸುದೀಪ್‌ ಅವರಲ್ಲಿ ಹೇಳಿದೆವು. ಸುದೀಪ್‌ ಕೂಡ ನಮ್ಮ ಯೋಜನೆಯನ್ನು ಬೆಂಬಲಿಸಿದರು. ವಿದೇಶಿ ಸ್ಟೂಡಿಯೋಗಳ ಗುಣಮಟ್ಟ ಚೆನ್ನಾಗಿರುತ್ತದೆ. ಹಾಗಾಗಿ ಚಿತ್ರ ವೀಕ್ಷಿಸುವಾಗ ಪ್ರೇಕ್ಷಕನಿಗೆ ಇಂಗ್ಲಿಷ್‌ ಚಿತ್ರ ನೋಡಿದ ಅನುಭವ ಸಿಗಲಿದೆ' ಎನ್ನುತ್ತಾರೆ ಅರ್ಜುನ್‌ ಜನ್ಯಾ. 'ಜಿಗರ್‌ಥಂಡ' ರಾಹುಲ್‌ಗೆ ಕಂಬ್ಯಾಕ್‌ ಚಿತ್ರ. ಬಹಳ ಕಾಲದಿಂದ ಅವರು ಕನ್ನಡ ಚಿತ್ರರಂಗದಿಂದ ದೂರ ಉಳಿದಿದ್ದರು. ಅಲ್ಲದೆ ನಾಯಕಿ ಸಂಯುಕ್ತಾ ವೃತ್ತಿ ಬದುಕಿಗೂ ಚಿತ್ರ ತಿರುವು ನೀಡಲಿದೆ ಎನ್ನಲಾಗಿದೆ.
↧
ವಿದೇಶಿ ಸ್ಟುಡಿಯೋಗಳಲ್ಲಿ ರೆಕಾರ್ಡ್‌ ಆದ ಹಿನ್ನೆಲೆ ಸಂಗೀತ
↧