ಹೆಯ್ಟಿ ವಿರುದ್ಧ 1-7 ಅಂತರದ ಭರ್ಜರಿ ಗೆಲುವು / ಈಕ್ವೆಡಾರ್‌-ಪೆರು ಪಂದ್ಯ ಡ್ರಾ ಒರ್ಲಾಂಡೊ: ಭರ್ಜರಿ ಪ್ರದರ್ಶನ ನೀಡಿದ 8 ಬಾರಿಯ ಚಾಂಪಿಯನ್‌ ಬ್ರೆಜಿಲ್‌, ಕೊಪ ಅಮೆರಿಕ ಫುಟ್ಬಾಲ್‌ ಟೂರ್ನಿಯ 'ಬಿ' ಗುಂಪಿನ ಪಂದ್ಯದಲ್ಲಿ ಹೆಯ್ಟಿ ವಿರುದ್ಧ 7-1 ಅಂತರದ ಭರ್ಜರಿ ಜಯ ದಾಖಲಿಸಿ ಕ್ವಾರ್ಟರ್‌ ಫೈನಲ್‌ ಹಾದಿಯನ್ನು ಸುಗಮವನ್ನಾಗಿಸಿಕೊಂಡಿದೆ. ಪಂದ್ಯದಲ್ಲಿ ಹೀನಾಯವಾಗಿ ಸೋತರೂ ಹೆಯ್ಟಿ ತಂಡಕ್ಕಿದ ಅವಿಸ್ಮರಣೀಯ ಸಂಗತಿ. ಏಕೆಂದರೆ, ಕೊಪ ಅಮೆರಿಕ ಫುಟ್ಬಾಲ್‌ ಟೂರ್ನಿಗೆ ಕೆರಿಬಿಯನ್‌ ಐಲೆಂಡ್ಸ್‌ನ ಹೆಯ್ಟಿ ರಾಷ್ಟ್ರ ಇದೇ ಮೊದಲ ಬಾರಿ ಅರ್ಹತೆ ಪಡೆದಿದೆ. ಹೆಯ್ಟಿಯಲ್ಲಿ ಬ್ರೆಜಿಲ್‌ ಫುಟ್ಬಾಲ್‌ ಅಭಿಮಾನಿಗಳೇ ಹೆಚ್ಚಿರುವುದರಿಂದ ತಮ್ಮ ನೆಚ್ಚಿನ ತಂಡದೆದುರು ಅಂತಾರಾಷ್ಟ್ರೀಯ ಮಟ್ಟದದಲ್ಲಿ ಸ್ಪರ್ಧಿಸಲು ಸಿಕ್ಕ ಅವಕಾಶದಲ್ಲಿ ಸೋತರೂ ಒಂದು ಗೋಲ್‌ ದಾಖಲಿಸುವ ಮೂಲಕ ಸ್ಮರಣೀಯವನ್ನಾಗಿಸಿಕೊಂಡಿತು. ಪಂದ್ಯದಲ್ಲಿ ಮಿಂಚಿನ ಆಟವಾಡಿದ ಬ್ರೆಜಿಲ್‌ ತಂಡದ ಆಕ್ರಮಣಕಾರಿ ಮಿಡ್‌ಫೀಲ್ಡರ್‌ ಫಿಲಿಪೆ ಕೊವ್ಟೀನೊ ಹ್ಯಾಟ್ರಿಕ್‌ ಗೋಲ್‌ ದಾಖಲಿಸಿದರೆ (14ನೇ, 29ನೇ ಮತ್ತು 90+2ನೇ ನಿ.), ಮತ್ತೊಬ್ಬ ಮಿಡ್‌ಫೀಲ್ಡರ್‌ ರೆನಾಟೊ ಅಗುಸ್ಟೋ (35ನೇ, 86ನೇ ನಿ.) ಎರಡು ಗೋಲ್‌ಗಳ ಕಾಣಿಕೆ ನೀಡಿದರು. ಉಳಿದಂತೆ ಫಾರ್ವರ್ಡ್‌ ಆಟಗಾರ ಗೇಬ್ರಿಯಲ್‌ ಬಾರ್ಬೊಸಾ (59ನೇ ನಿ.) ಮತ್ತು ಮಿಡ್‌ಫೀಲ್ಡರ್‌ ಲೂಕಾಸ್‌ ಲೀಮಾ (67ನೇ ನಿ.) ತಲಾ ಒಂದು ಗೋಲ್‌ ತಂದುಕೊಡುವ ಮೂಲಕ ತಂಡದ ಭರ್ಜರಿ ಗೆಲುವಿಗೆ ಕಾರಣರಾದರು. ಪಂದ್ಯದ ಮೊದಲಾರ್ಧದಲ್ಲಿಯೇ ಮೂರು ಗೋಲ್‌ಗಳನ್ನು ದಾಖಲಿಸಿ ಗೆಲುವನ್ನು ಖಾತ್ರಿ ಪಡಿಸಿಕೊಂಡಿದ್ದ ಬ್ರೆಜಿಲ್‌ ತಂಡ ದ್ವಿತೀಯಾರ್ಧದಲ್ಲಿ ಮತ್ತೂ 4 ಗೋಲ್‌ಗಳನ್ನು ಖಾತೆಗೆ ಸೇರಿಸಿ ಕ್ವಾರ್ಟರ್‌ ಫೈನಲ್‌ಗೆ ದಾಪುಗಾಲಿರಿಸಿತು. ಹೆಯ್ಟಿ ಪರ ಮಿಡ್‌ಫೀಲ್ಡರ್‌ ಜೇಮ್ಸ್‌ ಮೆರ್ಸೆಲಿನ್‌ 70ನೇ ನಿಮಿಷದಲ್ಲಿ ಏಕೈಕ ಗೋಲ್‌ ದಾಖಲಿಸುವ ಮೂಲಕ ಅವಿಸ್ಮರಣೀಯ ಅನುಭವವನ್ನು ತಮ್ಮದಾಗಿಸಿಕೊಂಡರು. ಬ್ರೆಜಿಲ್‌ ತಂಡ ಗ್ರೂಪ್‌ ಹಂತದಲ್ಲಿನ ತನ್ನ ಕೊನೆಯ ಪಂದ್ಯದಲ್ಲಿ ಕ್ವಾರ್ಟರ್‌ ಫೈನಲ್‌ ನಿರೀಕ್ಷೆಯಲ್ಲಿರುವ ಪೆರು ವಿರುದ್ಧ ಪೈಪೋಟಿ ನಡೆಸಲಿದ್ದು, ಮತ್ತೊಂದೆಡೆ ಹೆಯ್ಟಿ ತಂಡ ಸತತ ಎರಡು ಪಂದ್ಯಗಳಲ್ಲಿ ಡ್ರಾ ಫಲಿತಾಂಶ ಕಂಡಿರುವ ಈಕ್ವೆಡಾರ್‌ ವಿರುದ್ಧ ಪೈಪೋಟಿ ನಡೆಸಲಿದೆ. ಆಡಿದ ಎರಡು ಪಂದ್ಯಗಳಲ್ಲಿ ಸೋಲುಂಡಿರುವ ಹೆಯ್ಟಿ ಈಗಾಗಲೆ ಸ್ಪರ್ಧೆಯಿಂದ ಹೊರಬಿದ್ದಿದೆ. ** ಫೀನಿಕ್ಸ್‌ (ಆರಿಜೋನಾ): ಬಲಿಷ್ಠ ಬ್ರೆಜಿಲ್‌ ಎದುರು ಆಡಿದ ಮೊದಲ ಪಂದ್ಯದಲ್ಲಿ ಗೋಲ್‌ ರಹಿತ ಡ್ರಾ ಫಲಿತಾಂಶ ಕಂಡಿದ್ದ ಈಕ್ವೆಡಾರ್‌ ತಂಡ, 'ಬಿ' ಗುಂಪಿನ ತನ್ನ 2ನೇ ಪಂದ್ಯದಲ್ಲಿ ಪೆರು ಎದುರು 2-2 ಅಂತರದ ಸಮಬಲ ಸಾಧಿಸಿತು. ಪಂದ್ಯದ ಮೊದಲಾರ್ಧದಲ್ಲಿ ಪೆರು ತಂಡದ ಪರ ಫಾರ್ವರ್ಡ್‌ ಆಟಗಾರರಾದ ಕ್ರಿಸ್ಟಿಯಾನ್‌ ಕ್ಯೂವಾ (5ನೇ ನಿ.) ಮತ್ತು ಎಡಿಸ್ಸನ್‌ ಫ್ಲೋರ್ಸ್‌ (13ನೇ ನಿ.) 2-0 ಅಂತರದಲ್ಲಿ ಮುನ್ನಡೆ ಒದಗಿಸಿದರು. ಆದರೆ, ಪ್ರಥಮಾರ್ಧದ ಅಂತ್ಯದ ಹೊತ್ತಿಗೆ ಈಕ್ವೆಡಾರ್‌ ಪರ ಫಾರ್ವರ್ಡ್‌ ಆಟಗಾರ ಎನ್ನರ್‌ ವಲೆನ್ಸಿಯಾ (39ನೇ ನಿ.) ಖಾತೆ ತೆರೆದು ಚೇತರಿಕೆ ನೀಡಿದರು. ಬಳಿಕ ದ್ವಿತಿಯಾರ್ಧದ ಆರಂಭದಲ್ಲಿಯೇ ಸ್ಟ್ರೈಕರ್‌ ಮಿಲ್ಲರ್‌ ಬೊಲಾನೊಸ್‌ (48ನೇ ನಿ.) ಚೆಂಡನ್ನು ಗುರಿ ಮುಟ್ಟಿಸಿ 2-2 ಅಂತರದ ಸಮಬಲ ತಂದುಕೊಟ್ಟರಾದರೂ, ನಂತರ ಯಾವುದೇ ಗೋಲುಗಳು ಮೂಡಿಬರದೇ ಇದ್ದುದರಿಂದ ಪಂದ್ಯ ಸಮಬಲದಲ್ಲಿ ಅಂತ್ಯಗೊಂಡಿತು.
ಸಮಬಲದಲ್ಲಿ ಪೆರು-ಈಕ್ವೆಡಾರ್‌
↧
ಬಲಿಷ್ಠ ಬ್ರೆಜಿಲ್‌ಗೆ ಭರ್ಜರಿ ಗೆಲುವು
↧