ದಾರಿದೀಪ: ದಾಂಪತ್ಯ ವಿರಸ

1. ದಾಂಪತ್ಯ ವಿರಸವಾಗಿದೆ. ಮಗುವಿದೆ. ಪತಿಯ ತಿರಸ್ಕಾರದಿಂದ ನೊಂದಿರುವೆ. ದಾರಿ ತೋರಿ.

ಪ್ರಮೀಳಾ ಶ್ರೀರಂಗಪಟ್ಟಣ

ಬಹಳ ವಿಷಯಗಳನ್ನು ನೊಂದಿ ಬರೆದಿರುವಿರಿ. ನಮ್ಮ ಸಹಾನೂಭೂತಿ ಮತ್ತು ದೇವರ ಆರ್ಶೀವಾದ ನಿಮಗಿದೆ. ಒಲ್ಲದ ಗಂಡನಿಗೆ ಮತ್ತು ಹೆಂಡತಿಗೂ ಅನ್ಯರು ಬುದ್ಧಿ ಹೇಳಲಾಗದು. ಕೊರಗಿ ಬಾಳುವುದಕ್ಕಿಂತ ಮಗುವಿನ ಶ್ರೇಯಸ್ಸಿಗೆ ನೀವು ಸ್ವತಂತ್ರ ಜೀವನ ನಡೆಸುವುದೇ ಒಳ್ಳೆಯದು. ನೀವು ವಿದ್ಯಾವಂತರಾಗಿದ್ದು ಕೆಲಸವೂ ಇದೆ. ಆದ್ದರಿಂದ ಕಾನೂನಿನ ಆಶ್ರಯದಿಂದ ಹಾಗೂ ಧೈರ್ಯದಿಂದ ಮುಂದಡಿಯಿಡಿ.

2. ನನ್ನ ಎಂಟು ವರ್ಷದ ಮಗಳಿಗೆ ಸದಾ ಕಣ್ಣಲ್ಲಿ ನೀರು ಸುರಿಯುವುದು. ವಿವರ ನೋಡಿ ಪರಿಹಾರ ಹೇಳಿ.

ನಿರ್ಮಲ, ಮಾಗಡಿ ರಸ್ತೆ

ಇದು ಜನ್ಮ ದೋಷ ಅಂದರೆ ಗರ್ಭಗತ ದೋಷ. ಗರ್ಭಗತ, ಕಾಲ, ಗ್ರಹಾಚಾರ, ಸ್ವಯಂಕೃತ ಮತ್ತು ದೈವ ಎಂಬ ಪಂಚದೋಷ ಸೂತ್ರಗಳನ್ನು ಶಾಸ್ತ್ರ ಹೇಳಿದೆ. ಹಗಲಿನ ಅಮಾವಾಸ್ಯೆ ಸ್ಪರ್ಶ, ಕೇತುಗ್ರಸ್ತ ಚಂದ್ರನನ್ನು ಹಿಂದಿನಿಂದ ರವಿ ನೋಡುವುದು, ವಕ್ರೀ ಕುಜ-ರಾಹು ಚಂದ್ರನನ್ನು ನೋಡುವುದು ಇತ್ಯಾದಿ ದೋಷಗಳಿಂದ ಕಣ್ಣಿನ ಇಂಥ ಅನೇಕ ತೊಂದರೆಗಳು ಬರುತ್ತವೆ. ವೈದ್ಯರು ಸದಾ ಉಪಯೋಗಿಸಿ ಅಂತ ಕೊಟ್ಟ ಔಷಧ ಹಾಕುತ್ತಾ ಹೋದರೆ ಮುಂದೆ ಕಣ್ಣು ಇತರ ದೋಷಕ್ಕೆ ಈಡಾಗುವುದು. ಹಾಗಾಗಿ ಹೆಚ್ಚಿನ ಚಿಕಿತ್ಸೆಗೆ ಅತ್ಯುತ್ತಮ ವೈದ್ಯರನ್ನೋ, ಆಸ್ಪತ್ರೆಯನ್ನೋ ಅರಸುವುದು ಮತ್ತು ಅದಕ್ಕೆ ಸೂಕ್ತವಾದ ಯೋಗಾಸನ, ಶ್ರೀಗೌರಿ ಮಂತ್ರ ಪ್ರಯೋಗಗಳಿಂದ ಕ್ರಮೇಣ ಈ ಸಮಸ್ಯೆ ಪರಿಹಾರ ಸಾಧ್ಯವಿದೆ.

3. ಇಬ್ಬರು ಗಂಡು ಮಕ್ಕಳ ಮದುವೆ, ಆರೋಗ್ಯ ಸಮಸ್ಯೆ ಪರಿಹಾರವಾಗುವುದೇ?

ಮಾಲತೇಶ್‌, ಹರಿಹರ

ಚಿಕ್ಕ ಮತ್ತು ಸ್ಪಷ್ಟ ವಿವರ ಕಳಿಸಿದರೆ ಉತ್ತರವೂ ಬೇಗ ಬರುವುದು ಎಂದು ನೆನಪಿರಲಿ. ಮೊದಲ ಮಗನ ವಿವಾಹ ಇದೇ ವರ್ಷ ಆಗುತ್ತದೆ. ಅನಾರೋಗ್ಯ ವಿವರವನ್ನು ಪ್ರತ್ಯೇಕವಾಗಿ ಬರೆಯಿರಿ. ಪರಿಶೀಲನೆ ನಡೆಸಿ ಉತ್ತರಿಸಲಾಗುವುದು.

4. ಉನ್ನತ ಶಿಕ್ಷ ಣ ಮುಗಿದು ಖಾಸಗಿ ಕೆಲಸ ಸಿಕ್ಕಿದೆ. ಮುಂದೆ ಏನು ಮಾಡಬೇಕೆಂಬ ಗೊಂದಲವಿದೆ.

ಮನೀಷಾ ಎಸ್‌. ಕೊಂಡೆ

ನಿಮ್ಮ ಸದ್ಯದ ಡಿಗ್ರಿಗಳಿಂದ ಸರ್ಕಾರಿ ಕೆಲಸ ಸಿಗುವುದು ಕಷ್ಟ. ಕರ್ಕ ಲಗ್ನ ಮತ್ತು ಶುಕ್ರ-ಕುಜ ಬಲ ಉತ್ತಮವಿದೆ. ಸರ್ಕಾರದ ಆಡಳಿತಾತ್ಮಕ ಪರೀಕ್ಷೆಗೆ ತಯಾರಿ ನಡೆಸಿ, ಉನ್ನತ ಹುದ್ದೆಗೆ ಪ್ರಯತ್ನ ಕೈಗೂಡುವುದು. ಶ್ರೀವೆಂಕಟೇಶ್ವರ ದರ್ಶನ ಮತ್ತು ಸೇವೆ ಮಾಡುತ್ತಿರಿ.

5. ಮಗಳಿಗೆ ಮದುವೆ ವಯಸ್ಸು ಮೀರುತ್ತಿದೆ. ಎಲ್ಲಾ ಪ್ರಯತ್ನ, ಪೂಜೆಗಳು ಫಲ ನೀಡಿಲ್ಲ. ದಾರಿ ತೋರಿ.

ರಂಜನಿ, ಮೈಸೂರು

ಯಾರು ಏನು ಹೇಳಿದರೋ ಆ ವಿಚಾರವಾಗಿ ಎಲ್ಲಾ ಪೂಜೆ, ದೇವರುಗಳಿಗೆ ಸುತ್ತಿದ್ದೀರಿ. ದೋಷ ಏನೆಂದೇ ನಿಮಗೆ ಹೇಳಿದವರಿಗೆ ಮತ್ತು ನಿಮಗೂ ಗೊತ್ತಿಲ್ಲ. ನೋವಿರುವುದು ಎಲ್ಲೋ, ಔಷಧ ಹಚ್ಚಿದ್ದು ಎಲ್ಲೋ ಎಂಬಂತಾಗಿದೆ. ಇದೂ ಸಹ ಜಾತಕಳ ಕರ್ಮಫಲವೇ ಸರಿ. ಕಳತ್ರ ದೋಷ, ಶುಕ್ರ ದೋಷ ರವಿಯಿಂದ ಬಾಧಿತವಾಗಿದೆ. ಇದಕ್ಕೆ ಬೇರೆಯದೇ ಪ್ರಶ್ನಾವಳಿ ಮತ್ತು ಪ್ರಾಯಶ್ಚಿತಗಳಾಗಬೇಕು. ಬೇರೆ ದಾರಿಯಿಲ್ಲ.