ಮೋದಿ ಈ ದೇಶದ ಪ್ರಧಾನಿ, ಸಾಮ್ರಾಟ್‌ ಅಲ್ಲ ಎಂದ ಸೋನಿಯಾಗೆ ಬಿಜೆಪಿ ತಿರುಗೇಟು ಹೊಸದಿಲ್ಲಿ: ಎರಡನೇ ವರ್ಷಾಚರಣೆ ನಡೆಸುತ್ತಿರುವ ಎನ್‌ಡಿಎ ಸರಕಾರದ ನಿಲುವನ್ನು ತರಾಟೆಗೆ ತೆಗೆದುಕೊಂಡಿರುವ ಕಾಂಗ್ರೆಸ್‌ ಅಧ್ಯಕ್ಷೆ ಸೋನಿಯಾ ಗಾಂಧಿ, ನರೇಂದ್ರ ಮೋದಿ ಅವರು 'ಶಹೆನ್‌ಷಾ'(ಸಾಮ್ರಾಟ್‌) ಎಂಬಂತೆ ವರ್ತಿಸುತ್ತಿದ್ದಾರೆ ಎಂದು ವ್ಯಂಗ್ಯವಾಡಿದ್ದಾರೆ. ಇದಕ್ಕೆ ತೀಕ್ಷ್ಣ ಪ್ರತಿಕ್ರಿಯೆ ನೀಡಿರುವ ಬಿಜೆಪಿ, ಸೋನಿಯಾ ಗಾಂಧಿ ದೊಡ್ಡ ಕುಟುಂಬದ ಸೊಸೆಯಾದ ಮಾತ್ರಕ್ಕೆ ಮಹಾರಾಣಿ ಆಗುವುದಿಲ್ಲ. ಚಕ್ರವರ್ತಿಗಳಂತೆ ವರ್ತಿಸಿದ್ದು ಕಾಂಗ್ರೆಸ್‌ ನಾಯಕರೇ ಹೊರತು ಚಹಾ ಮಾರುವ ಹಂತದಿಂದ ಮೇಲೆದ್ದು ಬಂದ ನರೇಂದ್ರ ಮೋದಿಯಲ್ಲ ಎಂದು ತಿರುಗೇಟು ನೀಡಿದೆ. 'ನಾನು ಹಿಂದೆಂದೂ ಇಂಥ ವಿದ್ಯಮಾನ ನೋಡಿಲ್ಲ. ಈ ದೇಶದಲ್ಲಿರುವುದು ಪ್ರಧಾನ ಮಂತ್ರಿಯೋ ಚಕ್ರವರ್ತಿಯೋ ಎಂಬ ಸಂಶಯ ಮೂಡುವಂತಿದೆ. ದೇಶದಲ್ಲಿ ಎಷ್ಟೊಂದು ಬಡತನವಿದೆ, ಬರವಿದೆ, ರೈತರು ಸಂಕಷ್ಟದಲ್ಲಿದ್ದಾರೆ. ಸರಕಾರ ಈ ರೀತಿ ವೈಭವೀಕರಣ ಮಾಡುವುದು ಸೂಕ್ತ ಅಂತ ನನಗೆ ಅನಿಸುವುದಿಲ್ಲ', ಎಂದು ರಾಯ್‌ ಬರೇಲಿಯಲ್ಲಿ ಸೋನಿಯಾ ಹೇಳಿದ್ದರು. ಇದಕ್ಕೆ ಪ್ರತಿಕ್ರಿಯೆ ನೀಡಿರುವ ಬಿಜೆಪಿ ವಕ್ತಾರ ಸಂಬಿತ್‌ ಪಾತ್ರ, ನರೇಂದ್ರ ಮೋದಿ ಅವರು ಚಹಾ ಮಾರುವ ಹಂತದಿಂದ ಪ್ರಧಾನಿ ಪಟ್ಟಕ್ಕೆ ಬಂದಿರುವುದನ್ನು ಸಹಿಸಲಾಗದೆ ಕಾಂಗ್ರೆಸ್‌ ಅಧ್ಯಕ್ಷೆ ಈ ರೀತಿ ಹೇಳಿಕೆ ನೀಡಿದ್ದಾರೆ ಎಂದು ಟೀಕಿಸಿದರು. 'ದಶಕಗಳ ಆಡಳಿತಾವಧಿಯಲ್ಲಿ ರಾಷ್ಟ್ರವನ್ನು ತನ್ನ ಖಾಸಗಿ ಆಸ್ತಿಯಂತೆ ಆಳಿದ ಕಾಂಗ್ರೆಸ್‌ 'ಶಹೆನ್‌ಷಾ' ಪದದ ಅರ್ಥವನ್ನು ಮೊದಲು ತಿಳಿದುಕೊಳ್ಳಬೇಕು. ಯಾರು ರಾಷ್ಟ್ರ ಮತ್ತು ಪಕ್ಷವನ್ನು ತನ್ನ ಖಾಸಗಿ ಆಸ್ತಿ ಎಂದು ಭಾವಿಸುತ್ತಾನೋ ಅವನು ಶಹೆನ್‌ಷಾ ಎನಿಸಿಕೊಳ್ಳುತ್ತಾನೆ. ಗಾಂಧಿಗಳನ್ನು ಬಿಟ್ಟು ಬೇರೆ ಯಾರನ್ನು ಶಹೆನ್‌ಷಾ ಅಂತ ಹೇಳಬಹುದು ಹೇಳಿ? ಇಂದಿರಾ ಗಾಂಧಿ ಈ ದೇಶದಲ್ಲಿ ತುರ್ತು ಪರಿಸ್ಥಿತಿಗೆ ಕಾರಣರಾದರು. ಅದು ಚಕ್ರವರ್ತಿತ್ವ. ಅದು ವಂಶಾಡಳಿತ'', ಎಂದು ಸಂಬಿತ್‌ ಪಾತ್ರ ಹೇಳಿದರು. 'ಪ್ರಧಾನ ಮಂತ್ರಿ ಒಬ್ಬ ಬಡ ಮನುಷ್ಯ. ತನ್ನ ಕಠಿಣ ಪರಿಶ್ರಮದಿಂದ ನಿಧಾನವಾಗಿ ಮೇಲೆದ್ದು ಬಂದವರು. ಭಾರತದ ಜನರ ಆಶೀರ್ವಾದದಿಂದ ಅವರು ಪ್ರಧಾನಿಯಾಗಿದ್ದಾರೆ. ಒಬ್ಬ ಬಡವ ದೇಶದ ಪ್ರಧಾನಿಯಾಗುವುದು ವಂಶಾಡಳಿತಗಾರರಿಗೆ ಜೀರ್ಣಿಸಿಕೊಳ್ಳಲು ಕಷ್ಟವಾಗುತ್ತದೆ. ಇಂಥ ಹತಾಶೆಯಿಂದ ಸೋನಿಯ ಗಾಂಧಿ ಮತ್ತು ಕಾಂಗ್ರೆಸ್‌ ಇಂಥ ಆರೋಪಗಳನ್ನು ಮಾಡುತ್ತಿದೆ', ಎಂದು ಪಾತ್ರ ನುಡಿದರು. ಇದೊಂದು ಷಡ್ಯಂತ್ರ. ಆರೋಪ ನಿಜವೇ ಆದರೆ ನಿಷ್ಪಕ್ಷಪಾತ ತನಿಖೆ ನಡೆಸಿ. ದೂಧ್‌ ಕಾ ದೂಧ್‌ ಔರ್‌ ಪಾನಿ ಕಾ ಪಾನಿ ಹೋಜಾಯೇಗಾ (ಕಟ್ಟುಕಥೆಯಿಂದ ನಿಜದ ಜರಡಿ ತೆಗೆಯಲಿ). -ಸೋನಿಯಾ ಗಾಂಧಿ, ಕಾಂಗ್ರೆಸ್‌ ಅಧ್ಯಕ್ಷೆ ದೊಡ್ಡ ಕುಟುಂಬದ ಸೊಸೆಯಾದ ಮಾತ್ರಕ್ಕೆ ಸೋನಿಯಾ ಗಾಂಧಿ ಮಹಾರಾಣಿಯಾಗುವುದಿಲ್ಲ. - ರಾಧಾ ಮೋಹನ್‌ ಸಿಂಗ್‌, ಕೇಂದ್ರ ಕೃಷಿ ಮಂತ್ರಿ ಶಹೆನ್‌ಷಾ (ಚಕ್ರವರ್ತಿ), ಶೆಹಜಾದಾ (ರಾಜಕುಮಾರ) ಇವೆಲ್ಲ ಕಾಂಗ್ರೆಸ್‌ ಸಂಸ್ಕೃತಿಯ ಪ್ರತೀಕಗಳು. ನಮ್ಮ ಪ್ರಧಾನ ಮಂತ್ರಿ ದೇಶದ ಪ್ರಧಾನ ಸೇವಕ. - ಶಹನವಾಜ್‌ ಹುಸೇನ್‌, ಬಿಜೆಪಿ ನಾಯಕ
↧
ಶಹೆನ್‌ಷಾ ವರ್ಸಸ್‌ ಮಹಾರಾಣಿ
↧