ಹೊಸದಿಲ್ಲಿ: ಸಹಾರಾ ಗ್ರೂಪ್‌ ಮುಖ್ಯಸ್ಥ ಸುಬ್ರತಾ ರಾಯ್‌ ಅವರ ತಾಯಿ ನಿಧನರಾಗಿದ್ದಿ. ಅವರ ಅಂತಿಮ ವಿಧಿ ಪೂರೈಸುವ ನಿಮಿತ್ತ ರಾಯ್‌ಗೆ ಸುಪ್ರೀಂ ಕೋರ್ಟ್‌ ಸುಕ್ರವಾರ ನಾಲ್ಕು ವಾರಗಳ ಪೆರೋಲ್‌ ನೀಡಿದೆ. ಮುಖ್ಯ ನ್ಯಾಯಮೂರ್ತಿ ಟಿ.ಎಸ್‌.ಠಾಕೂರ್‌ ನೇತೃತ್ವದ ನ್ಯಾಯಪೀಠವು ಪೆರೋಲ್‌ಗೆ ಅಸ್ತು ಎಂದಿತು. ಈ ವೇಳೆ ನ್ಯಾ.ಠಾಕೂರ್‌ ಅವರು, ''ಸಾವಿನಲ್ಲೂ ತಾಯಿಯು ತನ್ನ ಮಕ್ಕಳ ಯೋಗಕ್ಷೇಮ ನೋಡಿಕೊಳ್ಳುತ್ತಾಳೆ,'' ಎನ್ನುವ ವಾಕ್ಯವನ್ನು ನುಡಿದರು. ಸಾವಿರಾರು ಸಣ್ಣ ಹೂಡಿಕೆದಾರರಿಗೆ 35,000 ಕೋಟಿ ರೂ.ಗಳನ್ನು ವಾಪಸ್‌ ಮಾಡುವಂತೆ ಕೋರ್ಟ್‌ ಈ ಹಿಂದೆ ರಾಯ್‌ಗೆ ಸೂಚಿಸಿತ್ತು. ಆದೇಶವನ್ನು ಪಾಲಿಸಲಾಗದೆ ಅವರು ಕಳೆದ ಎರಡು ವರ್ಷಗಳಿಂದ ತಿಹಾರ್‌ ಜೈಲಿನಲ್ಲಿದ್ದರು. ಪ್ರಕರಣ ಸಂಬಂಧ ಜೈಲಿನಲ್ಲಿದ್ದ ಸಹಾರಾ ಇಂಡಿಯಾ ಮಂಡಳಿಯ ಮತ್ತೊಬ್ಬ ನಿರ್ದೇಶಕ ಅಶೋಕ್‌ ರಾಯ್‌ ಚೌಧರಿ ಅವರಿಗೂ ಪೆರೋಲ್‌ ನೀಡಲಾಗಿದೆ. ಅವರು ಸುಬ್ರತಾ ಕುಟುಂಬದ ಸದಸ್ಯರು. ಸಾಮಾನ್ಯ ಉಡುಪಿನ ಪೊಲೀಸರು ಸುಬ್ರತಾ ಜತೆ ಇರಲಿದ್ದು, ನಾಲ್ಕು ವಾರಗಳ ನಂತರ ಅವರನ್ನು ಮತ್ತೆ ಜೈಲಿಗೆ ಕರೆತರಲಿದ್ದಾರೆ. ಸುಬ್ರತಾ ಅವರು ದೇಶ ಬಿಟ್ಟು ಓಡಿ ಹೋಗುವುದಿಲ್ಲ ಎಂದು ಕೋರ್ಟ್‌ಗೆ ವಕೀಲ ಕಪಿಲ್‌ ಸಿಬಲ್‌ ಅವರು ಭರವಸೆ ನೀಡಿದರು. ಈಗಾಗಲೇ ಅಧಿಕಾರಿಗಳು ಸುಬ್ರತಾ ಅವರ ಪಾಸ್‌ಪೋರ್ಟ್‌ ಅನ್ನು ಮುಟ್ಟುಗೋಲು ಹಾಕಿಕೊಂಡಿದ್ದಾರೆ. ಕಳೆದ ಎರಡು ವರ್ಷಗಳಿಂದ ಅನಾರೋಗ್ಯದಿಂದ ಬಳಲುತ್ತಿದ್ದ ಸುಬ್ರತಾ ಅವರ ತಾಯಿ ಛಾಬಿ ರಾಯ್‌(95) ಅವರು ಗುರುವಾರ ರಾತ್ರಿ ಕೊನೆ ಉಸಿರೆಳೆದರು.
↧
ಸುಬ್ರತಾ ರಾಯ್‌ಗೆ ನಾಲ್ಕು ವಾರಗಳ ಪರೋಲ್‌
↧