ಕನ್ನಡದ ಸ್ಟಾರ್‌ ಕ್ರಿಕೆಟ್‌ ಲೀಗ್‌ ಮತ್ತೆ ಬರಲಿದೆ. ಕಳೆದ ಬಾರಿ ಕನ್ನಡ ನೃತ್ಯ ನಿರ್ದೇಶಕರ ಸಂಘ ಡಾ. ರಾಜ್‌ಕುಮಾರ್‌ ಹೆಸರಿನಲ್ಲಿ ಟೂರ್ನಮೆಂಟ್‌ ಆಯೋಜಿಸಿದ್ದರೆ, ಈ ಬಾರಿ ಕನ್ನಡ ಚಲನಚಿತ್ರ ನಿರ್ದೇಶಕರ ಸಂಘ (ಕಾನ್ಫಿಡಾ) ಸ್ಟಾರ್‌ ಕ್ರಿಕೆಟ್‌ ಲೀಗ್‌ ಆಯೋಜಿಸುತ್ತಿದೆ. ಇದರ ಇನ್ನೊಂದು ವಿಶೇಷವೆಂದರೆ, ಹೆಣ್ಣು ಮಗು ನಮ್ಮ ನಗು ಎಂಬ ವೀಡಿಯೋ ಸಾಂಗ್‌ ಸಿದ್ಧಪಡಿಸಲು ಆಲೋಚಿಸಿದೆ. ಇತ್ತೀಚೆಗೆ ಲೋಗೋ ಲಾಂಚ್‌ ಮಾಡಲಾಯಿತು. ಈ ಬಾರಿಯ ಸ್ಟಾರ್‌ ಕ್ರಿಕೆಟ್‌ ಲೀಗ್‌ ವಿಶೇಷತೆಯಿಂದ ಕೂಡಿದೆ. 8 ತಂಡಗಳು ಆಡಲಿದ್ದು, ಜೂನ್‌ ಅಥವಾ ಜುಲೈನಲ್ಲಿ ಟೂರ್ನಮೆಂಟ್‌ ನಡೆಯಲಿದೆ. ಪ್ರತಿಯೊಂದು ತಂಡಕ್ಕೂ ಕನ್ನಡದ ಜನಪ್ರಿಯ ನಟರ ಹೆಸರನ್ನು ಇಟ್ಟಿರುವುದು ವಿಶೇಷ. ಈ ತಂಡಗಳಿಗೆ ಸೂಪರ್‌ ಸ್ಟಾರ್‌ಗಳು ಕ್ಯಾಪ್ಟರ್‌ ಆಗಿದ್ದಾರೆ. ಡಾ. ರಾಜ್‌ ಕುಮಾರ್‌, ಡಾ. ವಿಷ್ಣುವರ್ಧನ್‌, ವಜ್ರಮುನಿ, ಶಂಕರ್‌ನಾಗ್‌, ತೂಗುದೀಪ ಶ್ರಿನಿವಾಸ್‌, ಸುಂದರ್‌ ಕೃಷ್ಣ ಅರಸ್‌, ಶಕ್ತಿಪ್ರಸಾದ್‌, ಸುಧೀರ್‌ ಹೆಸರುಗಳನ್ನು ತಂಡಕ್ಕೆ ಇಡಲಾಗಿದೆ. ಡಾ. ರಾಜ್‌ ಕುಮಾರ್‌ ತಂಡಕ್ಕೆ ರಾಘವೇಂದ್ರ ರಾಜ್‌ಕುಮಾರ್‌ ಕ್ಯಾಪ್ಟನ್‌ ಆದರೆ, ವಿಷ್ಣುವರ್ಧನ್‌ ತಂಡಕ್ಕೆ ಶಿವರಾಜ್‌ಕುಮಾರ್‌ ಕ್ಯಾಪ್ಟನ್‌ ಆಗಿರುವುದು ವಿಶೇಷ. ಉಪೇಂದ್ರ ಶಂಕರ್‌ ನಾಗ್‌ ಟೀಮ್‌ ಲೀಡ್‌ ಮಾಡಲಿದ್ದಾರೆ. ಆಟೋ ಡ್ರೈವರ್ಸ್‌ ಶಂಕರ್‌ ನಾಗ್‌ ನಂತರ ಉಪೇಂದ್ರರಿಗೆ ಫ್ಯಾನ್‌ ಆಗಿರುವುದು ಗಮನಕ್ಕೆ ಬಂತು ಎಂದು ನಿರ್ದೇಶಕ ಪಿ. ಶೇಷಾದ್ರಿ ಹೇಳಿದ್ದಾರೆ. ಚಿತ್ರರಂಗದ ಸುಮಾರು 120ಕ್ಕೂ ಹೆಚ್ಚು ನಟರು ಕ್ರಿಕೆಟ್‌ ಆಡಲಿದ್ದಾರೆ. ಪುನೀತ್‌ ರಾಜ್‌ಕುಮಾರ್‌, ಉಪೇಂದ್ರ, ದರ್ಶನ್‌, ಯಶ್‌, ಶಿವರಾಜ್‌ಕುಮಾರ್‌, ಸುದೀಪ್‌, ವಿಜಯ್‌, ಶ್ರೀಮುರಳಿ, ಗಣೇಶ್‌, ಪ್ರೇಮ್‌, ಪ್ರಜ್ವಲ್‌ ದೇವರಾಜ್‌, ಧನಂಜಯ್‌ ಮತ್ತಿತರರು ಈ ತಂಡಗಳಲ್ಲಿರುತ್ತಾರೆ. ಮೈಸೂರು ಮತ್ತು ಹುಬ್ಬಳ್ಳಿಗಳಲ್ಲಿ ಮ್ಯಾಚ್‌ ನಡೆಯಲಿದೆ. ಎಲ್ಲಕ್ಕಿಂತ ವಿಶೇಷವೆಂದರೆ ಫೈನಲ್‌ ಪಂದ್ಯ ದುಬೈನಲ್ಲಿ ನಡೆಯಲಿದೆ ಎಂದು ಸಂಘದ ಅಧ್ಯಕ್ಷ ಎಂ.ಎಸ್‌. ರಮೇಶ್‌ ತಿಳಿಸಿದ್ದಾರೆ.
↧
ಮತ್ತೆ ಕ್ರಿಕೆಟ್‌ ಆಡಲಿದ್ದಾರೆ ಸ್ಟಾರ್‌ ನಟರು
↧