ಶಿಕ್ಷಕರ ವರ್ಗಾವಣೆ : ಪ್ರಕಟವಾಗದ ಮಾರ್ಗಸೂಚಿ

ಇನ್ನೂ ಪ್ರಕಟವಾಗದ ಮಾರ್ಗಸೂಚಿ | ಶಾಲಾರಂಭದ ವೇಳೆಗೆ ಮುಗಿದೀತೆ ಪ್ರಕ್ರಿಯೆ

ಬೆಂಗಳೂರು: ಈ ಬಾರಿಯ ಸಾಮೂಹಿಕ ವರ್ಗಾವಣೆ ವಿಷಯಕ್ಕೆ ಸಂಬಂಧಿಸಿದಂತೆ ಇನ್ನೂ ಮಾರ್ಗಸೂಚಿ ಪ್ರಕಟವಾಗದೆ ಇರುವುದರಿಂದ ಶಿಕ್ಷಕ ಸಮುದಾಯದಲ್ಲಿ ಆತಂಕ ಮೂಡಿದೆ.

ಸಾಮಾನ್ಯವಾಗಿ ಪ್ರತಿ ವರ್ಷ ಮೇ ತಿಂಗಳಲ್ಲಿ ಶಿಕ್ಷಕರ ವರ್ಗಾವಣೆ ಕೈಗೊಳ್ಳಲಾಗುತ್ತದೆ. ಹಾಗಾಗಿ ಈ ಹೊತ್ತಿಗೆ ಮಾರ್ಗಸೂಚಿ ಹೊರಬಿದ್ದಿರಬೇಕಿತ್ತು. ಈ ನಿಟ್ಟಿನಲ್ಲಿ ಸರಕಾರ ಕಾಳಜಿ ತೋರದೆ ಇರುವುದರಿಂದ ಶಾಲೆ ಪ್ರಾರಂಭದ ವೇಳೆಗೆ ವರ್ಗಾವಣೆ ಪ್ರಕ್ರಿಯೆ ಅಂತ್ಯಗೊಳ್ಳುವ ಬಗ್ಗೆ ಶಂಕೆ ಉಂಟಾಗಿದೆ.

ಸರಕಾರದ ಇತರ ಇಲಾಖೆಗಳಿಗೆ ಹೋಲಿಸಿದರೆ ಶಿಕ್ಷಣ ಇಲಾಖೆಯ ವರ್ಗಾವಣೆಯ ಪ್ರಕ್ರಿಯೆಯ ಪ್ರಮಾಣ ಅಗಾಧವಾದುದು. ಪ್ರಾಥಮಿಕ ಹಂತದಿಂದ ಪದವಿ ಪೂರ್ವ ಶಿಕ್ಷಣದವರೆಗೆ ಸುಮಾರು 1 ಲಕ್ಷ ಶಿಕ್ಷಕರು ವರ್ಗಾವಣೆಯ ನಿರೀಕ್ಷೆಯಲ್ಲಿ ಇರುತ್ತಾರೆ. ಹಾಗಾಗಿ ಈ ಕಾರ್ಯಕ್ಕೆ ಸಾಕಷ್ಟು ಮುಂಚಿತವಾಗಿ ಸಿದ್ಧತೆ ಮಾಡಿಕೊಳ್ಳುವುದು ಅವಶ್ಯಕ. ಏಪ್ರಿಲ್‌ನಲ್ಲಿಯೇ ಮಾರ್ಗಸೂಚಿ ಪ್ರಕಟಿಸಿದರೆ ಎಲ್ಲರಿಗೂ ಅನುಕೂಲ ಎಂಬುದು ಶಿಕ್ಷಕರ ಅನಿಸಿಕೆ.

ಆದರೆ ಈ ವಿಚಾರದಲ್ಲಿ ನಿರ್ದಿಷ್ಟ ಕಾಲಮಿತಿ ಹಾಕಿಕೊಳ್ಳುವುದರಲ್ಲಿ ಸರಕಾರ ಎಡವುತ್ತಿದೆ. ದೂರದೃಷ್ಟಿಯಿಂದ ಈ ಪ್ರಕ್ರಿಯೆ ಕೈಗೊಂಡರೆ ಮಾತ್ರ ಜೂನ್‌ ಮೊದಲ ವಾರದೊಳಗೆ ಶಿಕ್ಷಕರು ಹೊಸದಾಗಿ ನಿಯುಕ್ತಿಗೊಂಡ ಸ್ಥಳಗಳಿಗೆ ತಲುಪಲು ಸಾಧ್ಯವಾಗುತ್ತದೆ. ಶಾಲೆ ಆರಂಭದ ಬಳಿಕವೂ ಈ ಪ್ರಕ್ರಿಯೆ ನಡೆಯುತ್ತಿದ್ದರೆ ಮಕ್ಕಳ ವಿದ್ಯಾಭ್ಯಾಸಕ್ಕೆ ತೊಂದರೆಯಾಗುತ್ತದೆ. ಶಿಕ್ಷಕರೂ ವಸತಿ ಮತ್ತಿತರ ವ್ಯವಸ್ಥೆ ಮಾಡಿಕೊಳ್ಳುವ ಒತ್ತಡಕ್ಕೆ ಸಿಲುಕುತ್ತಾರೆ. ಇಷ್ಟೆಲ್ಲ ಜಂಜಡದ ಅರಿವಿದ್ದರೂ ಈ ಬಾರಿ ವರ್ಗಾವಣೆ ಪ್ರಕ್ರಿಯೆ ವಿಳಂಬವಾಗುವ ಲಕ್ಷಣಗಳು ಕಾಣಿಸುತ್ತಿವೆ.

ಕೆಪಿಸಿಸಿ ಕಚೇರಿಯಲ್ಲಿ ಸೋಮವಾರ ಸುದ್ದಿಗಾರರ ಜತೆ ಮಾತನಾಡಿದ ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ ಸಚಿವ ಕಿಮ್ಮನೆ ರತ್ನಾಕರ್‌, ನಿಯಮಾನುಸಾರ ಮೇ ಅಂತ್ಯದೊಳಗೆ ವರ್ಗಾವಣೆ ಪೂರ್ಣಗೊಳಿಸುವ ಭರವಸೆ ನೀಡಿದ್ದಾರೆ. ಹಾಗೆಯೇ ಜೂನ್‌ನಲ್ಲಿ ಡಿಡಿಪಿಐ, ಬಿಇಓಗಳ ವರ್ಗಾವಣೆಯಾಗಲಿದೆ. ಈ ಅಧಿಕಾರಿಗಳು ತವರು ಜಿಲ್ಲೆಯಲ್ಲಿ ಕಾರ್ಯ ನಿರ್ವಹಿಸದಂತೆ ನೋಡಿಕೊಳ್ಳಲಾಗುವುದು ಎಂದಿದ್ದಾರೆ.

ಶಿಕ್ಷಣ ಇಲಾಖೆಯ ಮೂಲಗಳ ಪ್ರಕಾರ, ಈ ಬಾರಿಯೂ ಶೇ. 5ರಷ್ಟು ವರ್ಗಾವಣೆಗೆ ಮಾತ್ರ ಈ ಪ್ರಕ್ರಿಯೆ ಸೀಮಿತವಾಗಲಿದೆ. ಹಾಗಾಗಿ ಪತಿ-ಪತ್ನಿ ಪ್ರಕರಣ, ಗಂಭೀರ ಕಾರಣ ಹೊಂದಿದವರಿಗೆ ಹೆಚ್ಚಿನ ಪ್ರಮಾಣದಲ್ಲಿ ವರ್ಗಾವಣೆಯ ಅವಕಾಶ ಈ ಬಾರಿಯೂ ಮರೀಚಿಕೆಯಾಗಲಿದೆ ಎಂದು ಹೇಳಲಾಗುತ್ತಿದೆ. ಆದರೆ ಮಾರ್ಗಸೂಚಿ ಯಾವಾಗ ಪ್ರಕಟಿಸಲಾಗುತ್ತದೆ ಎಂಬುದೇ ಈಗಿರುವ ಪ್ರಶ್ನೆ.