ಹೊಸದಿಲ್ಲಿ: ಪ್ರಧಾನಿಗೆ ಮೀಸಲಿರುವ 'ಏರ್‌ ಇಂಡಿಯಾ ಒನ್‌' ವಿಶೇಷ ವಿಮಾನ ಜಗತ್ತಿನಾದ್ಯಂತ ಹಾರಾಟ ನಡೆಸುವ ಮೂಲಕ ಅತ್ಯಂತ ಪ್ರತಿಷ್ಠಿತ ವಿಮಾನ ಎನಿಸಿಕೊಂಡಿದೆ. ಈ ಮೊದಲು ಪ್ರಧಾನಿಯವರ ವಿದೇಶ ಪ್ರವಾಸದ ವೇಳೆ ಅವರ ಜತೆ ಪಯಣಿಸುವ ಅಧಿಕಾರಿಗಳು, ರಾಜತಾಂತ್ರಿಕರು ಹಾಗೂ ಪತ್ರಕರ್ತರಿಗೆ ಭೂರಿ ಭೋಜನ ಜತೆಗೆ ವಿದೇಶಿ ಬ್ರ್ಯಾಂಡ್‌ನ ಮದ್ಯವೂ ಪೂರೈಕೆಯಾಗುತ್ತಿತ್ತು. ಆದರೆ ಈಗ ನರೇಂದ್ರ ಮೋದಿ ಪ್ರಧಾನಿಯಾದ ನಂತರ ಈ ವಿಮಾನದಲ್ಲಿ ಮದ್ಯಕ್ಕೆ ಬ್ರೇಕ್‌ ಬಿದ್ದಿದೆ ಎನ್ನುತ್ತವೆ ಉನ್ನತ ಮೂಲಗಳು. 'ಮೇಕ್‌ ಇನ್‌ ಇಂಡಿಯಾ'ದ ಕನಸು ಹೊತ್ತು ಹಾಗೂ ಅಂತಾರಾಷ್ಟ್ರೀಯ ಸಮಾವೇಶಗಳಲ್ಲಿ ಪಾಲ್ಗೊಳ್ಳಲು ಮೋದಿ ಸಾಕಷ್ಟು ಬಾರಿ ವಿದೇಶ ಪ್ರವಾಸ ಕೈಗೊಂಡಿರುವರು. ಸಮಯ ಉಳಿಸಲೆಂದು ಅಗತ್ಯ ಸಂದರ್ಭದಲ್ಲೆಲ್ಲಾ ರಾತ್ರಿ ಹೊತ್ತಿನ ಪಯಣದಲ್ಲೇ ನಿದ್ರಿಸುವ ಮೋದಿ, ವಿಮಾನದಲ್ಲೇ ಕಾರ್ಯ ಕಲಾಪ ನಡೆಸುವುದು ಈಗ ಎಲ್ಲರಿಗೂ ಗೊತ್ತಿರುವ ಸಂಗತಿ. ಇತ್ತೀಚಿನ ಬೆಲ್ಜಿಯಂ, ಅಮೆರಿಕ, ಸೌದಿ ಅರೇಬಿಯಾ ಪ್ರವಾಸದ ವೇಳೆ ಈ ಸಮಯ ಉಳಿತಾಯದ ತಂತ್ರ ಬಯಲಿಗೆ ಬಂದಿತ್ತು. ಈಗ ಮದ್ಯ ಸೇವನೆಗೂ ಬ್ರೇಕ್‌ ಬಿದ್ದಿದ್ದು, ಅಷ್ಟು ಸುಲಭಕ್ಕೆ ಅದು ಪೂರೈಕೆಯಾಗುವುದಿಲ್ಲ. ಇನ್ನು ಆಹಾರ ಪೂರೈಕೆ ವಿಚಾರಕ್ಕೆ ಬಂದರೆ ಮೋದಿ ಸರಳವಾದ ಸಸ್ಯಾಹಾರವನ್ನೇ ಆಯ್ಕೆ ಮಾಡಿಕೊಳ್ಳುವುದು ರೂಢಿ. ಆದರೆ ಬೇರೆಯವರು ಮಾಂಸಾಹಾರ ಸೇವಿಸಲು ಯಾವುದೇ ನಿರ್ಬಂಧವಿಲ್ಲ. ಹೀಗಾಗಿ ಈಗ ಏರ್‌ ಇಂಡಿಯಾ ಒನ್‌ ವಿಮಾನದಲ್ಲಿ ಮೋದಿ ಜತೆ ಪಯಣಿಸುವ ಅಧಿಕಾರಿಗಳಿಗೆ ಮಾಂಸಾಹಾರ ಪೂರೈಕೆಯಾದರೂ ಮದ್ಯದ ಕಿಕ್‌ ಸಿಗದೇ ಪರಿತಪಿಸುವಂತಾಗಿದೆಯಂತೆ.
↧
ಕಿಕ್‌ ಕೊಡದ ಪ್ರಧಾನಿ ವಿಮಾನ!
↧