ಹೈದರಾಬಾದ್‌: ಭಾರತೀಯ ಐಟಿ ಉದ್ಯಮದಲ್ಲಿನ ನೇಮಕಾತಿಗಳಲ್ಲಿ ಈ ವರ್ಷ ಶೇ.20ರಷ್ಟು ಕುಸಿತ ಕಂಡು ಬರಲಿದೆ ಎಂದು ಐಟಿ ಉದ್ಯಮದ ಸಂಸ್ಥೆ ನಾಸ್ಕಾಮ್‌ ಹೇಳಿದೆ. ದೇಶೀಯ ಸಾಫ್ಟ್‌ವೇರ್‌ ಉದ್ಯಮವು 2016-17ನೇ ಸಾಲಿನಲ್ಲಿ 2.74 ಲಕ್ಷ ಉದ್ಯೋಗಿಗಳನ್ನು ನೇಮಕ ಮಾಡಿಕೊಳ್ಳುತ್ತದೆ. ಕಳೆದ ವರ್ಷಕ್ಕೆ ಹೋಲಿಸಿದರೆ(2.3 ಲಕ್ಷ ನೇಮಕ) ಪ್ರಸಕ್ತ ವರ್ಷ ಹೆಚ್ಚಿನ ನೇಮಕಾತಿಗಳು ನಡೆಯುತ್ತವೆ ಎಂದು ಕಳೆದ ಜೂನ್‌ನಲ್ಲಿ ನಾಸ್ಕಾಮ್‌ ಹೇಳಿತ್ತು. ಅದನ್ನು ಬದಲಿಸಿರುವ ನಾಸ್ಕಾಮ್‌, ಈಗ ಹೊಸ ಲೆಕ್ಕಾಚಾರವನ್ನು ಮಂಡಿಸಿದೆ. ಟಾಟಾ ಕನ್ಸಲ್ಟೆನ್ಸಿ ಸವೀರ್‍ಸಸ್‌(ಟಿಸಿಎಸ್‌) ಮತ್ತು ಇನ್ಫೋಸಿಸ್‌ಗಳು ಹೆಚ್ಚು ಯಂತ್ರೀಕೃತ ವ್ಯವಸ್ಥೆಗೆ ಒತ್ತು ನೀಡಲಿದ್ದು, ಉದ್ಯೋಗಿಗಳ ನೇಮಕ ಪ್ರಮಾಣವನ್ನು ತಗ್ಗಿಸಲಿವೆ ಎಂದು ನಾಸ್ಕಾಮ್‌ ಅಂದಾಜು ಮಾಡಿದೆ. ನಾಸ್ಕಾಮ್‌ ಅಧ್ಯಕ್ಷ ಮತ್ತು ಟೆಕ್‌ ಮಹಿಂದ್ರಾ ಮುಖ್ಯ ಕಾರ್ಯನಿರ್ವಾಹಕ ಸಿ.ಪಿ.ಗುರುನಾನಿ ಅವರು, ''ನೇಮಕಾತಿ ಪ್ರಕ್ರಿಯೆಗಳು ಕುಸಿಯುವುದರಿಂದ ಉದ್ಯಮದ ಆದಾಯದ ಬೆಳವಣಿಗೆ ಮೇಲೆ ಪರಿಣಾಮವಾಗುವುದಿಲ್ಲ. ನಿರೀಕ್ಷೆಯಂತೆಯೇ ಶೇ.10-12ರಷ್ಟು ಪ್ರಗತಿ ಸಾಧ್ಯವಾಗುತ್ತದೆ,'' ಎಂದು ಹೇಳಿದ್ದಾರೆ. ''ಡಿಜಿಟಲ್‌ ಜಗತ್ತು ಯಾಂತ್ರೀಕೃತಗೊಳ್ಳುತ್ತಿದ್ದು, ಮನುಷ್ಯನ ಉದ್ಯೋಗಾವಕಾಶಗಳು ಕಡಿಮೆಯಾಗುತ್ತಿವೆ. ಡಿಜಿಟಲ್‌ ಎಂದರೆ ಗ್ರಾಹಕನಿಗೆ ಅತಿ ಸಮೀಪದಲ್ಲಿರುವುದು ಎಂದರ್ಥ,'' ಎಂದು ಅಭಿಪ್ರಾಯಪಟ್ಟಿದ್ದಾರೆ.
↧
ಐಟಿ ಉದ್ಯಮ: ಶೇ.20ರಷ್ಟು ಉದ್ಯೋಗ ಕುಸಿತ
↧