* ತಂದೆಯೊಂದಿಗೆ ನೀವು ನಟಿಸಲಿರುವ ಸಿನಿಮಾ ಸೆಟ್ಟೇರುವುದು ಖಾತ್ರಿಯಾಗಿದೆ...
- ಹೌದು, ಸುದ್ದಿಯೀಗ ಅ-ಕೃತವಾಗಿದೆ. ಪ್ರಾಥಮಿಕ ಮಾಹಿತಿಯನ್ವಯ ಅಪ್ಪನ ರಾಜ್‌ಕಮಲ್‌ ಬ್ಯಾನರ್‌ನಡಿ ತಯಾರಾಗಲಿರುವ ಚಿತ್ರವನ್ನು ರಾಜೀವ್‌ ಕುಮಾರ್‌ ನಿರ್ದೇಶಿಸಲಿದ್ದಾರೆ. ಇದೊಂದು ಸಂಪೂರ್ಣ ಹಾಸ್ಯಚಿತ್ರವಾಗಿದ್ದು ಬಹುಪಾಲು ಚಿತ್ರೀಕರಣ ಅಮೆರಿಕದಲ್ಲಿ ನಡೆಯಲಿದೆ. ನನ್ನ ಪಾತ್ರದ ಬಗ್ಗೆ ನನಗಿನ್ನೂ ಸ್ಪಷ್ಟವಾದ ಚಿತ್ರಣ ಸಿಕ್ಕಿಲ್ಲ. ತಂದೆಯೊಂದಿಗೆ ನಟಿಸುವ ಖುಷಿಗಿಂತ, ಸಿನಿಮಾರಂಗದಲ್ಲಿ ದೊಡ್ಡ ಸಾಧನೆ ಮಾಡಿದ ವ್ಯಕ್ತಿಯೊಂದಿಗೆ ಹತ್ತಿರದಿಂದ ಒಡನಾಡುವ ಅವಕಾಶವೇ ನನಗೆ ಥ್ರಿಲ್‌ ನೀಡುತ್ತದೆ. ಅಪ್ಪ ಮತ್ತು ನಾನು ಚಿತ್ರವೊಂದರಲ್ಲಿ ಜತೆಯಾಗಿ ನಟಿಸಲಿದ್ದೇವೆ ಎನ್ನುವ ವದಂತಿಗಳು ಹಲವಾರು ವರ್ಷಗಳಿಂದ ಹರಿದಾಡುತ್ತಿದ್ದವು. ನಾನು ನಟಿಯಾಗಿ ಗುರುತಿಸಿಕೊಳ್ಳುವವರೆಗೆ ಜತೆಯಾಗಿ ನಟಿಸುವುದು ಬೇಡವೆಂದು ಅಪ್ಪನಿಗೆ ಸ್ಪಷ್ಟವಾಗಿ ಹೇಳಿದ್ದೆ. ಅಪ್ಪನ ನೆರಳಿನಲ್ಲಿ ಗುರುತಿಸಿಕೊಳ್ಳುವುದು ನನಗಿಷ್ಟವಿರಲಿಲ್ಲ. ಅಪ್ಪ ನನ್ನ ಮಾತುಗಳನ್ನು ಅರ್ಥ ಮಾಡಿಕೊಂಡು ನನ್ನ ಅಭಿಪ್ರಾಯಕ್ಕೆ ಬೆಲೆ ಕೊಟ್ಟಿದ್ದರು. ಇದೀಗ ಕಾಲ ಕೂಡಿ ಬಂದಿದ್ದು ಇಬ್ಬರೂ ಚಿತ್ರವೊಂದರಲ್ಲಿ ನಟಿಸಲಿದ್ದೇವೆ. ನಾನಂತೂ ಚಿತ್ರೀಕರಣ ಆರಂಭವಾಗುವುದನ್ನೇ ಎದುರು ನೋಡುತ್ತಿದ್ದೇನೆ.
* ನಟಿಯಾಗಿ ಯಶಸ್ಸಿನ ಹಾದಿಯಲ್ಲಿದ್ದೀರಿ...
- ಚೊಚ್ಚಲ ಸಿನಿಮಾ 'ಲಕ್‌'ನಲ್ಲಿ ನಟಿಸುವಾಗ ನಟನೆ ಬಗ್ಗೆ ನನಗೇನೂ ಗೊತ್ತಿರಲಿಲ್ಲ. ಆಗಷ್ಟೇ ಅಮೆರಿಕದಲ್ಲಿ ಓದು ಮುಗಿಸಿಕೊಂಡು ಭಾರತಕ್ಕೆ ಮರಳಿದ್ದೆ. ಸಂಗೀತದಲ್ಲಿ ಏನಾದರೂ ಸಾಧನೆ ಮಾಡಬೇಕೆನ್ನುವ ಗುರಿಯಿತ್ತು. ಅಪ್ಪ ನೆರವಿಗೆ ನಿಂತಿದ್ದರೂ, ಆರ್ಥಿಕವಾಗಿ ಸದೃಢವಾಗಿ ನೆಲೆ ಕಂಡುಕೊಳ್ಳುವುದು ನನ್ನ ಮೊದಲ ಆದ್ಯತೆಯಾಗಿತ್ತು. 'ಲಕ್‌' ಸಿನಿಮಾ ನಟನೆಯಲ್ಲಿನ ನನ್ನ ಲೋಪಗಳನ್ನು ತೋರಿಸಿಕೊಟ್ಟಿತು. ಸಿನಿಮಾದಲ್ಲಿ ನಟಿಸಲು ನಾನು ಸೂಕ್ತ ತಯಾರಿಯನ್ನೂ ಮಾಡಿಕೊಂಡಿರಲಿಲ್ಲ. ನಟನೆ ನನಗೆ ಒಗ್ಗುವುದಿಲ್ಲ ಎಂದು ಸ್ನೇಹಿತರು ಅಣಕವಾಡಿದ್ದರು. ಆದರೆ ನಾನು ಸುಲಭವಾಗಿ ಸೋಲೊಪ್ಪಿಕೊಳ್ಳುವ ಪೈಕಿಯಲ್ಲ. ಸಿನಿಮಾವನ್ನು ಶ್ರದ್ಧೆಯಿಂದ ಪರಿಗಣಿಸಿ ಉತ್ತಮ ಸ್ಕಿ್ರಪ್ಟ್‌ಗಳನ್ನು ಆಯ್ಕೆ ಮಾಡಿಕೊಂಡು ನಟಿಸುತ್ತಾ ಹೋದೆ. ದಿನಬೆಳಗಾಗುವುದರೊಳಗೆ ನಾನು ನಟಿಯಾಗಿಲ್ಲ.
* ನಟನೆಗೆ ಹೆಚ್ಚು ಸ್ಕೋಪ್‌ ಇರುವ ನಾಯಕಿಪ್ರಧಾನ ಚಿತ್ರಗಳ ಬಗ್ಗೆ ನಿಮಗೆ ಆಸಕ್ತಿಯಿಲ್ಲವೆ?
- ಎಂದಿನ ಕಮರ್ಷಿಯಲ್‌ ಚಿತ್ರಗಳಲ್ಲಿ ನಾಯಕಿಯರಿಗೆ ಅಭಿನಯಕ್ಕೆ ಹೆಚ್ಚು ಅವಕಾಶ ಇರೋಲ್ಲ ಎನ್ನುವುದನ್ನು ನಾನು ಒಪ್ಪುವುದಿಲ್ಲ. ಇತ್ತೀಚಿನ 'ವೇದಾಲಮ್‌'ನಲ್ಲಿ ನನ್ನ ಪಾತ್ರಕ್ಕೆ ಕಾಮಿಡಿ ಟಚ್‌ ಇದೆ. ಅಳಿಸುವುದಕ್ಕಿಂತ ಜನರನ್ನು ನಗಿಸುವುದು ತುಂಬಾ ಕಷ್ಟ ಎಂದು ಅಪ್ಪ ಹೇಳುತ್ತಿರುತ್ತಾರೆ. ಹಾಗಾಗಿ ನಾನು ಹಾಸ್ಯ ಮತ್ತು ಟ್ರ್ಯಾಜಿಕ್‌ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲು ಅಪೇಕ್ಷಿಸುತ್ತೇನೆ.
* ನಿಮ್ಮ ಧ್ವನಿ, ಡಬ್ಬಿಂಗ್‌ಗೆ ಹೊಂದಿಕೆಯಾಗೋಲ್ಲ ಎನ್ನುವ ಕುರಿತು...
- ಹೌದು, ನಾನು ಡಬ್‌ ಮಾಡಿದಾಗ ಕೆಲವು ಇಂತಹ ಆರೋಪಗಳು ಕೇಳಿಬಂದವು. ನನ್ನ ಪ್ರಕಾರ, ಪಾತ್ರ ನಿರ್ವಹಿಸಿದ ಕಲಾವಿದರೇ ತಮ್ಮ ಪಾತ್ರಗಳಿಗೆ ಡಬ್‌ ಮಾಡಬೇಕು. ಆಗಷ್ಟೇ ಪಾತ್ರಕ್ಕೆ ನ್ಯಾಯ ಒದಗಿಸಲು ಸಾಧ್ಯ. ಮುಂದಿನ ದಿನಗಳಲ್ಲಿ ಡಬ್ಬಿಂಗ್‌ನಲ್ಲಿ ಸುಧಾರಣೆ ಕಂಡುಕೊಳ್ಳಲು ಶ್ರಮಿಸುತ್ತೇನೆ.
ಪುತ್ರಿ ಶ್ರುತಿಯೊಂದಿಗೆ ತಾವು ನಟಿಸಲಿರುವ ಸಿನಿಮಾ ಈ ತಿಂಗಳಾಂತ್ಯಕ್ಕೆ ಆರಂಭವಾಗಲಿದೆ ಎಂದು ಕಮಲ್‌ ಹಾಸನ್‌ ಟ್ವೀಟ್‌ ಮಾಡಿದ್ದಾರೆ. ಅಪ್ಪ-ಮಗಳ ಸಿನಿಮಾದ ಅ-ಕೃತ ಸುದ್ದಿ ಹೊರಬಿದ್ದಿದ್ದು, ಶ್ರುತಿ ಹಾಸನ್‌ ಈ ಸಿನಿಮಾ ಹಾಗೂ ಇನ್ನಿತರೆ ಸಂಗತಿಗಳ ಬಗ್ಗೆ ಮಾತನಾಡಿದ್ದು ಇಲ್ಲಿದೆ.