ಇತ್ತೀಚೆಗೆ ಕತೆ, ಚಿತ್ರಕತೆ, ನಿರ್ದೇಶನ ಪುಟ್ಟಣ್ಣ ಚಿತ್ರದಿಂದ ಯಶಸ್ಸನ್ನು ಕಂಡ ನಿರ್ದೇಶಕ ಶ್ರೀನಿವಾಸ ರಾಜು ಈಗ ಇನ್ನೊಂದು ವಿಭಿನ್ನ ಸಿನಿಮಾ ಕೈಗೆತ್ತಿಕೊಂಡಿದ್ದಾರೆ. ಈ ಹಿಂದಿನ ಸಿನಿಮಾದಂತೆಯೇ ಇದಕ್ಕೂ ಉದ್ದ ಹೆಸರನ್ನು ಆಯ್ಕೆ ಮಾಡಿರುವುದು ವಿಶೇಷ. ಹೊಸ ಚಿತ್ರಕ್ಕೆ 'ಸುರಭಿ.. ಕೇರ್‌ ಆಫ್‌ ಸುಬ್ಬು ಡ್ರಾಮಾ ಕಂಪನಿ' ಎಂದು ಹೆಸರಿಟ್ಟಿದ್ದು, ಹೀರೋ ಆಗಿ ರವಿಶಂಕರ್‌ ನಟಿಸಲಿದ್ದಾರೆಂದು ಗೊತ್ತಾಗಿದೆ.
ನಟ ಸಾಯಿ ಕುಮಾರ್‌ ಸಹೋದರರಾದ ರವಿಶಂಕರ್‌ ಡಬ್ಬಿಂಗ್‌ ಆರ್ಟಿಸ್ಟ್‌ ಆಗಿ ಖ್ಯಾತಿ ಗಳಿಸಿದ ನಂತರ ಪೋಷಕ ಪಾತ್ರಗಳಲ್ಲಿ ಮಿಂಚತೊಡಗಿದ್ದರು. ಇವರಿಗೆ ಬ್ರೇಕ್‌ ನೀಡಿದ್ದು ಕೆಂಪೇಗೌಡ ಚಿತ್ರ. ಈಗ ತಮ್ಮ 50ನೇ ವಯಸ್ಸಿನಲ್ಲಿ ನಾಯಕ ಆಗುವ ಕನಸನ್ನು ನನಸು ಮಾಡಿಕೊಳ್ಳುತ್ತಿದ್ದಾರೆ ರವಿಶಂಕರ್‌.
ಮೊದಲು ಖಳನಾಯಕರಾಗಿ ಬಂದು ನಂತರ ಹೀರೋ ಆದವರ ದೊಡ್ಡ ಪಟ್ಟಿಯೇ ಇದೆ. ಈಗ ಈ ಲಿಸ್ಟಿಗೆ ರವಿಶಂಕರ್‌ ಕೂಡ ಸೇರಲಿದ್ದಾರೆ.
ಕನ್ನಡದಲ್ಲಿ ವಿಲನ್‌ ಆಗಿ ಹೆಸರು ಮಾಡಿರುವ ನಟ ರವಿಶಂಕರ್‌ ಈಗ ಹೀರೋ. ಹಲವು ವರ್ಷಗಳಿಂದ ನಾಯಕನಾಗುವ ಕನಸು ಹೊತ್ತುಕೊಂಡಿದ್ದ ಅವರನ್ನು ಹೀರೋ ಮಾಡುತ್ತಿರುವುದು ನಿರ್ದೇಶಕ ಶ್ರೀನಿವಾಸ ರಾಜು.