ವಡೋದರಾ : ಅದು ಬರೋಬ್ಬರಿ 20 ಸಾವಿರ ಕೋಟಿ ರೂ. ಮೌಲ್ಯದ ಆಸ್ತಿಗಾಗಿ 23 ವರ್ಷ ನಡೆದ ಕಾನೂನು ಸಮರ. ವಡೋದರಾ ಸಿವಿಲ್‌ ಕೋರ್ಟ್‌, ಕಂಪನಿ ಲಾ ಬೋರ್ಡ್‌, ಗುಜರಾತ್‌ ಹೈಕೋರ್ಟ್‌, ಸುಪ್ರೀಂಕೋರ್ಟ್‌ ...ಹೀಗೆ ಎಲ್ಲ ಕಾನೂನು ಹೋರಾಟದಲ್ಲೂ ಬಗೆಹರಿಯದ ಬರೋಡಾ ಮಹಾರಾಜ ಗಾಯಕವಾಡ್‌ ಅರಸು ಮನೆತನದ ವ್ಯಾಜ್ಯ ಬಿಕ್ಕಟ್ಟು ಕೊನೆಗೆ ಕುಟುಂಬ ಸದಸ್ಯರ ನಡುವಿನ ಸಂಧಾನದ ಮೂಲಕ ಇತ್ಯರ್ಥಗೊಂಡಿದೆ.
ಕುಟುಂಬದ 23 ಸದಸ್ಯರು ಮಾಡಿಕೊಂಡU ಒಡಂಬಡಿಕೆಯನ್ನು ವಡೋದರಾ ಸಿವಿಲ್‌ ಕೋರ್ಟ್‌ ಬುಧವಾರ ಮಾನ್ಯ ಮಾಡಿದೆ. ಈ ವೇಳೆ ಕೋರ್ಟ್‌ನಲ್ಲಿ ರಾಜಮಾತೆ ಶುಭಾಂಗಿನಿರಾಜೆ ಸೇರಿದಂತೆ ಕುಟುಂಬ ಸದಸ್ಯರು ಹಾಜರಿದ್ದರು.
ಗಾಯಕವಾಡ್‌ ಅರಸು ಮನೆತನವು ಸ್ವಾತಂತ್ರ್ಯ ಪೂರ್ವ ಭಾರತದಲ್ಲಿಯೇ ಅತ್ಯಂತ ಸಿರಿವಂತ ಸಂಸ್ಥಾನ ಎಂದು ಪ್ರಸಿದ್ಧಿಯಾಗಿತ್ತು. ಗತಕಾಲದ ಇತಿಹಾಸ ಸಾರುವ ವಡೋದರಾದ ಲಕ್ಷ್ಮಿ ವಿಲಾಸ ಪ್ಯಾಲೇಸ್‌, ನಜಾರ್‌ಬಾಗ್‌ ಪ್ಯಾಲೇಸ್‌, ಇಂದುಮತಿ ಪ್ಯಾಲೇಸ್‌ ಅಲ್ಲದೇ ಮುಂಬಯಿಯಲ್ಲೂ ಬಂಗಲೆಗಳ ಸಹಿತ ಸಾಕಷ್ಟು ಸ್ವತನ್ನು ಹೊಂದಿದೆ. ಇದರ ಜತೆಗೆ ಅಲೌಕಿಕ್‌ ಟ್ರೇಡಿಂಗ್‌ ಕಂಪನಿಯಡಿ ಕುಟುಂಬ ನಡೆಸುತ್ತಿದ್ದ ರಿಯಲ್‌ ಎಸ್ಟೇಟ್‌ ವ್ಯವಹಾರವೂ ಸಾಕಷ್ಟಿದೆ. ಈ ಎಲ್ಲ ಸ್ವತ್ತಿನ ಇಂದಿನ ಬೆಲೆ 20 ಸಾವಿರ ಕೋಟಿ ರೂ.ಗಿಂತಲೂ ಅಧಿಕ. ಗಾಯಕ್‌ವಾಡ್‌ ಮನೆತನದ ಮಹಾರಾಜ 3ನೇ ಸಯ್ಯಾಜಿ ರಾವ್‌ ಗಾಯಕ್‌ವಾಡ್‌ ಅವರ ಮೊಮ್ಮಗ ಪ್ರತಾಪ್‌ಸಿನ್ಹಾ ಇದಕ್ಕೆಲ್ಲ ಒಡೆಯರಾಗಿದ್ದರು. ಅವರು ನಂತರದಲ್ಲಿ ಆಸ್ತಿಯ ಹಕ್ಕುಗಳನ್ನು ಹಿರಿಯ ಮಗ ಫತೇಸಿನ್ಹಾರಾವ್‌ ಗಾಯಕ್‌ವಾಡ್‌ಗೆ ಹಸ್ತಾಂತರಿಸಿದ್ದರು.
ಫತೇಸಿನ್ಹಾರಾವ್‌ ಗಾಯಕ್‌ವಾಡ್‌ ಅವಿವಾಹಿತರಾಗಿದ್ದ ಕಾರಣ ನಂತರ ಇದರ ಅಧಿಪತ್ಯವೆಲ್ಲವೂ ಅವರ ಕಿರಿಯ ಸಹೋದರ ರಂಜಿತ್‌ಸಿನ್ಹಾ ಪಾಲಿಗೆ ಬಂದಿತ್ತು. ಆದರೆ ದಿನಕಳೆದಂತೆ ರಂಜಿತ್‌ ಅವರ ಕಿರಿಯ ಸಹೋದರ ಸಂಗ್ರಾಮ್‌ಸಿನ್ಹಾ ಆಸ್ತಿ ಹಕ್ಕಿಗಾಗಿ ಕೋರ್ಟ್‌ ಮೆಟ್ಟಿಲೇರಿದರು. ಅಲ್ಲಿಂದ ಕಾನೂನು ಸಮರ ಶುರುವಾಗಿತ್ತು. 23 ವರ್ಷಗಳ ಕಾನೂನು ಸಮರದ ಬಳಿಕ ಕುಟುಂಬ ಸದಸ್ಯರು ತೀರ್ಮಾನಕ್ಕೆ ಬಂದು ಸಂಧಾನದ ಮೂಲಕ ಒಡಂಬಡಿಕೆ ಮಾಡಿಕೊಂಡಿದ್ದರು.
ಈಗ ರಂಜಿತ್‌ಸಿನ್ಹಾ ಗಾಯಕ್‌ವಾಡ್‌ ಅವರ ಮಗ ಸಮರಜಿತ್‌ಸಿನ್ಹಾ ಕುಟುಂಬದ ಪಾಲಿಗೆ ಲಕ್ಷ್ಮಿ ವಿಲಾಸ್‌ ಪ್ಯಾಲೇಸ್‌ ಮತ್ತು ಸುತ್ತಮುತ್ತಲಿನ 600 ಎಕರೆ ಪ್ರದೇಶ ದೊರೆತಿದ್ದರೆ, ಸಂಗ್ರಾಮ್‌ ಸಿನ್ಹಾ ಕುಟುಂಬದ ಪಾಲಿಗೆ ಇಂದುಮತಿ ಅರಮನೆ ಹಾಗೂ ಮುಂಬಯಿ ಮತ್ತು ವಡೋದರಾದಲ್ಲಿರುವ ಸ್ವತ್ತುಗಳು ಬಂದಿವೆ.
ಲಕ್ಷ್ಮೇ ವಿಲಾಸ...
ವಡೋದರಾದ ಲಕ್ಷ್ಮಿ ವಿಲಾಸ್‌ ಪ್ಯಾಲೇಸ್‌ನ ನಿರ್ಮಾತೃ ಮೇಜರ್‌ ಚಾರ್ಲ್ಸ್ ಮ್ಯಾಂಟ್‌. ಬರೋಡಾ ಮಹಾರಾಜ 3ನೇ ಸಯ್ಯಾಜಿರಾವ್‌ ಅವರು 1890ರಲ್ಲಿ ಕಟ್ಟಿಸಿದ್ದರು. ಆ ಕಾಲದಲ್ಲಿಯೇ ಇದರೊಳಗೆ ಎಲಿವೇಟರ್‌ಗಳನ್ನು ಅಳವಡಿಸಲಾಗಿತ್ತು. ಹೆಸರಿಗೆ ತಕ್ಕಂತೆ ಇದೊಂದು ಸುಖದ ಸುಪ್ಪತ್ತಿಗೆಯ ಲಕ್ಷ್ಮೇ ವಿಲಾಸವೇ ಆಗಿತ್ತು. ಲಂಡನ್‌ನ ಬಕಿಂಗ್‌ಹ್ಯಾಮ್‌ ಪ್ಯಾಲೇಸ್‌ಗಿಂತಲೂ ನಾಲ್ಕು ಪಟ್ಟು ದೊಡ್ಡದಾಗಿದೆ. ಕಟ್ಟಡದ ಹೊರತಾಗಿ 600 ಎಕರೆ ವಿಶಾಲ ಜಾಗವಿದ್ದು, ಗಾಲ್‌ಧಿ ಮೈದಾನವಿದೆ. ದೇಶದ ಅತಿದೊಡ್ಡ ಖಾಸಗಿ ಸ್ವತ್ತು ಎಂಬ ಹಿರಿಮೆಗೆ ಪಾತ್ರವಾಗಿದೆ.
ಸಂಧಾನದ ಮೂಲಕ ಬಗೆಹರಿದ 20 ಸಾವಿರ ಕೋಟಿ ರೂ. ಮೌಲ್ಯದ ಸ್ವತ್ತಿನ ಹಕ್ಕು