*ಪಿತೃ ಕಾರ್ಯದ ಬಗ್ಗೆ ಸಲಹೆ ನೀಡಿದ್ದೀರಿ-ಯಾವಾಗ, ಎಲ್ಲಿ ಮಾಡಬೇಕು ದಯವಿಟ್ಟು ತಿಳಿಸಿ. ಹೇಮಂತ್ ಕೆ, ವಿಜಾಪುರ ನಿಮಗೆ ಉತ್ತರಿಸಿ ಮೂರು ತಿಂಗಳೇ ಆಯ್ತು. ಈಗ ಇನ್ನೂ ವಿವರ ಕೇಳುತ್ತಿರುವಿರಿ! ಸತ್ಕರ್ಮಗಳೇ ಹಾಗೆ, ತಿಳಿವುದು ಕಷ್ಟ. ತಿಳಿದವರು ಸಿಗುವುದು ಕಷ್ಟ, ಸಿಕ್ಕರೂ ಮಾಡುವುದು ಇನ್ನೂ ಕಷ್ಟ! ಆದರೆ ಯಾರು ಕಷ್ಟಕ್ಕೆ ಅಂಜುವುದಿಲ್ಲವೋ ಅವರು ಕರ್ಮ ಜಯಿಸುವುದು, ಇತರರಲ್ಲ. ಜನವರಿ ಉತ್ತರಾಯಣದ ಒಳಗೆ ಯಾವುದೇ ಕೃಷ್ಣ ಪಕ್ಷ ಕೊನೆಯಲ್ಲಿ ನಿಮ್ಮ ಊರಿನ ಹತ್ತಿರದ ಕ್ಷೇತ್ರದಲ್ಲಿ ಉತ್ತಮ ಪುರೋಹಿತರಿಂದ ಮಾಡಿಸಿ. ಏನು, ಎತ್ತ ಎಂದು ಆಗಲೇ ಹೇಳಿ ಆಗಿದೆ.
*ಮನೆಯಲ್ಲಿ ಅತ್ತೆ-ಸೊಸೆಗೆ ಆಗಿ ಬರುವುದಿಲ್ಲ. ನನಗೆ ಏನು ಮಾಡುವುದು ತೋಚುತ್ತಿಲ್ಲ. ಶ್ರೀಧರ್ ದಂಪತಿ, ಕೋಲಾರ ವಿವರ ಬಹಳ ಬರೆದಿರುವಿರಿ! ಅದನ್ನೇ ತುಸು ಧೈರ್ಯ ಮಾಡಿ ಪತ್ನಿ, ತಾಯಿಯೊಂದಿಗೆ ಪ್ರತ್ಯೇಕ ಮಾತನಾಡಿ. ಸ್ವಲ್ಪ ನಿಷ್ಠುರವಾಗಿ, ಒಳ್ಳೆಯದೇ! ನಿಮ್ಮದು ಹೊರತಾಗಿ, ಮಕ್ಕಳು-ಅತ್ತೆ-ಸೊಸೆ ಎಲ್ಲರದೂ ಪಾಪ ದೆಸೆ ಬೇರೆ ನಡೆದು, ಕೆಲ ದೋಷಗಳಿವೆ. ಆಪ್ತ ಸಲಹೆ, ಕೆಲ ಪ್ರಾಯಶ್ಚಿತ್ತ ಪೂಜಾ-ಜಪಗಳ ಮಾಡಬೇಕು.
*ಟ್ರಾಕ್ ರೆಕಾರ್ಡ್ ಸರಿಯಲ್ಲದವನನ್ನು ಪ್ರೀತಿಸಿ, ಈಗ ಮದುವೆಗೆ ಹೊಯ್ದಾಟ ನಡೆದಿದೆ. ಏನು ಮಾಡಲಿ? ಮೀನಾ, ಭದ್ರಾವತಿ ಪ್ರೀತಿ-ದ್ವೇಷ-ಎರಡಕ್ಕೂ ವಿವೇಚನೆ ಎಂಬುದಿರದು. ಆದ ಮೇಲೆ ಎರಡರಲ್ಲೂ ಪಶ್ಚಾತ್ತಾಪವೇ ಅನುಭವಕ್ಕೆ ಬರುವುದು. ನಡತೆ ಸರಿಯಿಲ್ಲ ಎಂದರೆ ಏನೇನು?! ಎಂದು ವಿವರ ತಿಳಿಸಿಲ್ಲ. ಆತನಿಗೆ ಪ್ರತ್ಯೇಕ ಆಪ್ತ ಸಲಹೆಯ ಅವಶ್ಯಕತೆ ಇದೆ. ಹಿರಿಯರೊಂದಿಗೆ ಮಾತನಾಡಿ, ಜಗಳವಿಲ್ಲದೇ ಕಾರ್ಯ ಸಾಧಿಸುವ ಬುದ್ಧಿಮತ್ತೆ ನಿಮಗಿದ್ದು ಮುಂದುವರಿಯಿರಿ.
*ನನ್ನ ಕುಟುಂಬದ ಜಾತಕ ಹೇಗಿದೆ. ಏನು, ಎತ್ತ ಎಂದು ತಿಳಿಸಬೇಕಾಗಿ ವಿನಂತಿ. ಹೇಮಾ ಬಾಯಿ, ಬೆಂಗಳೂರು ನೀರಿಗಿಳಿಯದೆ ಆಳ ಎಷ್ಟಿದೆ ಎಂದು ಲೆಕ್ಕ ಹಾಕಿದಂತೆ! ನಿಮ್ಮ ಪ್ರಶ್ನೆ. ನಿರ್ದಿಷ್ಟ ವ್ಯಕ್ತಿ-ಸಮಸ್ಯೆ-ಜ್ಯೋತಿಷ್ಯ ಜಿಜ್ಞಾಸೆಗೆ ಮಾತ್ರ ಉತ್ತರ ಪಡೆಯಬಹುದೇ ಹೊರತು ಗ್ರೂಪ್ ಚಾಟ್‌ನಂತೆ ಅಲ್ಲ.
*ಬಹಳ ಅಪಮಾನ, ಹಣಕಾಸಿನ ತೊಂದರೆ ಗುರುಗಳೇ. ದಾರಿ ತೋರಿ. ರವಿಕುಮಾರ್ ಎನ್, ಬೆಂಗಳೂರು ಲಗ್ನಾ ಗುರುವೂ, ಶನಿ ಭಾಗ್ಯ ಯೋಗವೂ, ಅಧಿಯೋಗ ಕುಜನೂ ಸೇರಿ, ಅನೇಕ ಸಾಮರ್ಥ್ಯದ ವ್ಯಕ್ತಿ ನೀವು. ನಿಮ್ಮ ಸಮಕ್ಕೆ ಜನರು ಹಾತೊರೆವರೇ ಹೊರತು, ಸಹಕರಿಸರು! ಅದೇ ಸಮಸ್ಯೆ. ಶನಿ ದೆಸೆಯ ಕೊನೆ ವರ್ಷ ನಡೆದು, ಹಂತ ಹಂತವಾಗಿ ಪರಿಹಾರ ಆಗುವುದು. ದೇವರಾಯನ ದುರ್ಗ-ನರಸಿಂಹ ದೇವರ ದರ್ಶನ-ಮನೆಯಲ್ಲಿ ಮೂಲಮಂತ್ರ ಹೋಮಗಳಿಂದ ಪ್ರಗತಿ.
- ದಾರಿದೀಪ: ಹರೀಶ್‌ ಕಾಶ್ಯಪ್