ವೃತ್ತಿ ಬದುಕಿನ 750ನೇ ಪಂದ್ಯ ಗೆದ್ದ ಸೆರೆನಾ

9ನೇ ಮಿಯಾಮಿ ಟ್ರೋಫಿಯತ್ತ ವಿಶ್ವದ ನಂ.1 ಆಟಗಾರ್ತಿಯ ಚಿತ್ತ
ಮಿಯಾಮಿ: ಕಜಕಸ್ತಾನದ ಜರಿನಾ ಡಿಯಾಸ್ ಅವರನ್ನು ಮಣಿಸುವ ಮೂಲಕ ವೃತ್ತಿ ಬದುಕಿನಲ್ಲಿ 750ನೇ ಪಂದ್ಯ ಜಯಿಸಿದ ಅಮೆರಿಕದ ಸೆರೆನಾ ವಿಲಿಯಮ್ಸ್ 9ನೇ ಮಿಯಾಮಿ ಓಪನ್ ಕಿರೀಟ ಗೆಲ್ಲುವತ್ತ ದಾಪುಗಾಲಿಟ್ಟಿದ್ದಾರೆ.

ಪ್ಲೋರಿಡಾದಲ್ಲಿ ಶನಿವಾರ ತಡರಾತ್ರಿ ನಡೆದ ಮಹಿಳೆಯರ ಸಿಂಗಲ್ಸ್ ವಿಭಾಗದ ಮೂರನೇ ಸುತ್ತಿನ ಪಂದ್ಯದಲ್ಲಿ ವಿಶ್ವದ ಅಗ್ರಮಾನ್ಯ ಆಟಗಾರ್ತಿ ಸೆರೆನಾ 7-5, 6-3 ನೇರ ಗೇಮ್‌ಗಳಿಂದ ಗೆದ್ದು ನಾಲ್ಕನೇ ಸುತ್ತಿಗೆ ಲಗ್ಗೆಯಿಟ್ಟರು. ಈ ಮೂಲಕ ವೃತ್ತಿ ಬದುಕಿನ ಗೆಲುವು-ಸೋಲಿನ ದಾಖಲೆಯನ್ನು 750-125ಕ್ಕೆ ವಿಸ್ತರಿಸಿದ ಅಮೆರಿಕ ಆಟಗಾರ್ತಿ, ಲಿಂಡ್ಸೆ ಡೆವನ್‌ಪೋರ್ಟ್ (753) ಅವರಿಗಿಂತ ಮೂರು ಪಂದ್ಯ ಹಿಂದಿದ್ದರೆ, ಸಾರ್ವಕಾಲಿಕ ಪಟ್ಟಿಯಲ್ಲಿ ಮಾರ್ಟಿನಾ ನವ್ರಾಟಿಲೋವಾ(1,442 ಜಯ) ಅಗ್ರಸ್ಥಾನದಲ್ಲಿದ್ದಾರೆ.

34 ವರ್ಷದ ಬಲಿಷ್ಠ ಆಟಗಾರ್ತಿ ಸೆರೆನಾ ನಾಲ್ಕನೇ ಸುತ್ತಿನಲ್ಲಿ ರಷ್ಯಾದ ಸ್ವೆಟ್ಲಾನಾ ಕುಜ್ನೆತ್ಸೊವಾ ಅವರನ್ನು ಎದುರಿಸಲಿದ್ದಾರೆ. 15ನೇ ಶ್ರೇಯಾಂಕಿತೆ ಸ್ವೆಟ್ಲಾನಾ ಮೂರನೇ ಸುತ್ತಿನಲ್ಲಿ 4-6, 6-2, 7-6(6) ಸೆಟ್‌ಗಳಿಂದ ಕ್ಯಾರೋಲಿನ್ ಗಾರ್ಸಿಯಾ ಅವರನ್ನು ಮಣಿಸಿ 4ನೇ ಸುತ್ತು ತಲುಪಿದ್ದಾರೆ. ಮೊದಲ ಸೆಟ್ ಜಯಿಸಲು ಸಾಕಷ್ಟು ಬೆವರು ಸುರಿಸಿದ ಸೆರೆನಾ ದ್ವಿತೀಯ ಸೆಟ್‌ನಲ್ಲಿ ಅಂತಹ ಅವಕಾಶಗಳಿಗೆ ಎಡೆ ಮಾಡಿಕೊಡದೆ ಸುಲಭವಾಗಿ ಸೆಟ್ ಗೆದ್ದು ಪಂದ್ಯ ವಶಪಡಿಸಿಕೊಂಡರು.

ವಿಲಿಯಮ್ಸ್ ಮತ್ತು ಕುಜ್ನೆತ್ಸೊವಾ ಅವರಲ್ಲದೆ, ಪೋಲೆಂಡ್‌ನ ಆಗ್ನೇಸ್ಕಾ ರಾಡ್ವಾಂಸ್ಕಾ, ರೊಮೇನಿಯಾದ ಸಿಮೊನಾ ಹ್ಯಾಲೆಪ್, ಸ್ವಿಜರ್ಲೆಂಡ್‌ನ ಟೈಮಿಯಾ ಬಾಕ್ಸಿನ್ಸಜ್ಕಿ, ರಷ್ಯಾದ ಎಕಟರಿನಾ ಮಕರೋವಾ ಮತ್ತು ವೈಲ್ಡ್ ಕಾರ್ಡ್ ವಿಜೇತೆ ಗ್ರೇಟ್ ಬ್ರಿಟನ್‌ನ ಹೇದರ್ ವ್ಯಾಟ್ಸನ್ ಕೂಡ ಕ್ರಮವಾಗಿ ತಮ್ಮ ಎದುರಾಳಿಗಳನ್ನು ಮಣಿಸಿ ನಾಲ್ಕನೇ ಸುತ್ತು ಪ್ರವೇಶಿಸಿದ್ದಾರೆ.

30ನೇ ಶ್ರೇಯಾಂಕಿತೆ ಮಕರೋವಾ 6-4, 6-4ರಲ್ಲಿ ಜೆಕ್ ಗಣರಾಜ್ಯದ ಪೆಟ್ರಾ ಕ್ವಿಟೋವಾ ಅವರನ್ನು ಸೋಲಿಸಿದರೆ, ಹ್ಯಾಲೆಪ್ 6-4, 6-1ರಿಂದ ಜೂಲಿಯಾ ಜಾರ್ಜಿಯಾ ವಿರುದ್ಧ, ಮೂರನೇ ಶ್ರೇಯಾಂಕಿತೆ ರಾಡ್ವಾಂಸ್ಕಾ 6-3, 6-2 ಸೆಟ್‌ಗಳಿಂದ ಮ್ಯಾಡಿಸನ್ ಬ್ರೆಂಗ್ಲೆ ವಿರುದ್ಧ ಹಾಗೂ ಉಕ್ರೇನಿನ ಎಲಿನಾ ಸ್ವಿಟೊಲಿನಾ 5-7, 6-4, 7-6(7-1) ಸೆಟ್‌ಗಳಿಂದ ಡೆನ್ಮಾರ್ಕ್‌ನ ಕ್ಯಾರೋಲಿನಾ ವೊಜ್ನಿಯಾಕಿ ವಿರುದ್ಧ ಗೆದ್ದು ಸಂಭ್ರಮಿಸಿದರು.

ಮರ‌್ರೆ, ಸೋಂಗಾಗೆ ಮುನ್ನಡೆ

ವಿಶ್ವದ ಎರಡನೇ ರ‌್ಯಾಂಕಿನ ಬ್ರಿಟನ್ ಆಟಗಾರ ಆ್ಯಂಡಿ ಮರ‌್ರೆ ಪುರುಷರ ಸಿಂಗಲ್ಸ್ ವಿಭಾಗದ ಎರಡನೇ ಪಂದ್ಯದಲ್ಲಿ 6-3, 7-5 ನೇರ ಸೆಟ್‌ಗಳಿಂದ ಡೆನಿಸ್ ಇಸ್ಟೊಮಿನ್ ವಿರುದ್ಧ ಪ್ರಯಾಸದ ಜಯದೊಂದಿಗೆ ಮೂರನೇ ಸುತ್ತು ಪ್ರವೇಶಿಸಿದರು. ಇವರಲ್ಲದೆ, ಫ್ರಾನ್ಸ್‌ನ ಜೊ ವಿಲ್ಫ್ರೆಡ್ ಸೋಂಗಾ, ಡಿಮಿಟ್ರೊವ್ ಮೂರನೇ ಸುತ್ತಿಗೆ ದಾಪುಗಾಲಿಟ್ಟರು. ಆದರೆ ಸ್ಪೇನ್‌ನ ಸ್ಟಾರ್ ರಾಫೆಲ್ ನಡಾಲ್, ಜಾನ್ ಇಸ್ನಾರ್ ಎರಡನೇ ಸುತ್ತಿನಲ್ಲೇ ತಮ್ಮ ಹೋರಾಟ ಕೊನೆಗೊಳಿಸಿದರು.

ಪ್ರಮುಖಾಂಶಗಳು

* ಸೆರೆನಾ ವೃತ್ತಿ ಬದುಕಿನ ಗೆಲುವು-ಸೋಲಿನ ದಾಖಲೆ: 750-125

* ಲಿಂಡ್ಸೆ ಡೆವನ್‌ಪೊರ್ಟ್(753)ಗಿಂತ ಸೆರೆನಾ ಮೂರು ಗೆಲುವುಗಳ ಹಿನ್ನಡೆ

* ಸಾರ್ವಕಾಲಿಕ ದಾಖಲೆ ಪಟ್ಟಿಯ ಅಗ್ರಸ್ಥಾನದಲ್ಲಿ ಮಾರ್ಟಿನಾ ನವ್ರಾಟಿಲೋವಾ(1,442).