ಮಿಯಾಮಿ: ಅಗ್ರ ಶ್ರೇಯಾಂಕಿತ ನೊವಾಕ್ ಜೊಕೊವಿಕ್ ಇಲ್ಲಿ ನಡೆಯುತ್ತಿರುವ ಮಿಯಾಮಿ ಓಪನ್ ಟೆನಿಸ್ ಟೂರ್ನಿಯಲ್ಲಿ ಶುಕ್ರವಾರ ಶುಭಾರಂಭ ಮಾಡಿದ್ದಾರೆ. ಈ ಮೂಲಕ ಸತತ ಮೂರನೇ ಬಾರಿ ಪ್ರಶಸ್ತಿ ಜಯಿಸಲು ಹಾದಿಯಲ್ಲಿ ಭರ್ಜರಿ ಆರಂಭ ಕಂಡಿದ್ದಾರೆ. ಆದರೆ ಸ್ವಿಸ್ ತಾರೆ ರೋಜರ್ ಫೆಡರರ್ ಪಂದ್ಯ ಆರಂಭಕ್ಕೂ ಮುನ್ನವೇ ಹೊಟ್ಟೆ ನೋವಿನಿಂದಾಗಿ ಟೂರ್ನಿಯಿಂದ ಹಿಂದೆ ಸರಿದಿದ್ದಾರೆ.
ಶುಕ್ರವಾರ ತಡರಾತ್ರಿ ನಡೆದ ಪುರುಷರ ಸಿಂಗಲ್ಸ್ ವಿಭಾಗದ ಎರಡನೇ ಸುತ್ತಿನಲ್ಲಿ ಸರ್ಬಿಯಾದ ನೊವಾಕ್ ಜೊಕೊವಿಕ್ 6-3, 6-3 ನೇರ ಸೆಟ್‌ಗಳಿಂದ 87ನೇ ರ‌್ಯಾಂಕಿನ ಬ್ರಿಟನ್ನಿನ ಕೈಲ್ ಎಡ್ಮಂಡ್ ಅವರನ್ನು ಸೋಲಿಸಿ ಮುನ್ನಡೆದರು. ಪಂದ್ಯದ ಬಳಿಕ ಪ್ರತಿಕ್ರಿಯಿಸಿದ ಜೊಕೊವಿಕ್,''ನಾನು ಅತ್ಯುತ್ತಮ ಪ್ರದರ್ಶನ ನೀಡಿದೆ, ಆರಂಭದಿಂದಲೇ ಉತ್ತಮ ಆಟ ತೋರಿದೆ. ಕೆಲ ಸಂದರ್ಭದಲ್ಲಿ ಏರಿಳಿತ ಕಂಡು ಬಂದರೂ ಯಾವುದೇ ಹಿನ್ನಡೆಯಾಗಲಿಲ್ಲ,'' ಎಂದರು.
11 ಗ್ರ್ಯಾನ್ ಸ್ಲ್ಯಾಮ್‌ಗಳ ವಿಜೇತ ಜೊಕೊವಿಕ್ ಮೂರನೇ ಸುತ್ತಿನಲ್ಲಿ ಭಾನುವಾರ ಪೋರ್ಚುಗಲ್‌ನ ಜೊಯೋ ಸೌಸಾ ಅವರನ್ನು ಎದುರಿಸಲಿದ್ದಾರೆ.
ಹಿಂದೆ ಸರಿದ ಫೆಡರರ್
ವಿಶ್ವದ ಮೂರನೇ ರ‌್ಯಾಂಕಿನ ಹಾಗೂ 17 ಗ್ರ್ಯಾನ್ ಸ್ಲ್ಯಾಮ್‌ಗಳ ಒಡೆಯ ರೋಜರ್ ಫೆಡರರ್ ಪಂದ್ಯಕ್ಕೆ ಕೆಲವೇ ಗಂಟೆಗಳು ಬಾಕಿ ಇರುವಾಗ ಟೂರ್ನಿಯಿಂದ ಹಿಂದೆ ಸರಿಯುವ ನಿರ್ಧಾರ ಪ್ರಕಟಿಸಿದರು. ಕಳೆದ ತಿಂಗಳು ಮೊಣಕಾಲಿನ ಶಸ್ತ್ರಚಿಕಿತ್ಸೆಗೆ ಒಳಗಾಗಿ ಚೇತರಿಸಿಕೊಂಡಿದ್ದ ಫೆಡರರ್, ಹೊಟ್ಟೆ ನೋವಿನಿಂದಾಗಿ ಹಿಂದೆ ಸರಿಯುತ್ತಿರುವುದಾಗಿ ತಿಳಿಸಿದರು. ಅಲ್ಲದೆ ತಮ್ಮ ಅಲಭ್ಯತೆಗೆ ಅಭಿಮಾನಿಗಳು, ಸಂಘಟಕರಲ್ಲಿ ಕ್ಷಮೆ ಯಾಚಿಸಿದರು.
ಮೂರನೇ ಸುತ್ತಿಗೆ ವಿನ್ಸಿ
ಇಟಲಿಯ ರಾಬರ್ಟ ವಿನ್ಸಿ ಮಹಿಳೆಯರ ಸಿಂಗಲ್ಸ್‌ನಲ್ಲಿ ಮೂರನೇ ಸುತ್ತು ಪ್ರವೇಶಿಸಿದ್ದಾರೆ. ಶನಿವಾರ ನಡೆದ ಎರಡನೇ ಸುತ್ತಿನ ಪಂದ್ಯದಲ್ಲಿ 9ನೇ ಶ್ರೇಯಾಂಕಿತೆ ವಿನ್ಸಿ 1-6, 6-4, 7-6(7-5) ಸೆಟ್‌ಗಳಿಂದ ಜೆಕ್ ರಿಪಬ್ಲಿಕ್‌ನ ಲೂಸಿಯಾ ಹ್ರಾಡೆಕ್ ಅವರನ್ನು ಮಣಿಸಿದರು. ಮತ್ತೊಂದು ಪಂದ್ಯದಲ್ಲಿ ಬೆಲರೂಸ್‌ನ ವಿಕ್ಟೋರಿಯಾ ಅಜಾರೆಂಕಾ 6-2, 6-4 ಸೆಟ್‌ಗಳಿಂದ ಮೊನಿಕಾ ಪುಯಿಗ್ ವಿರುದ್ಧ ಗೆದ್ದು ಮೂರನೇ ಸುತ್ತಿಗೆ ಲಗ್ಗೆ ಹಾಕಿದರು.
ಮಿಯಾಮಿ ಓಪನ್ ಟೆನಿಸ್ ಟೂರ್ನಿ