ಕಿಯಾನಾನ್(ಚೀನಾ): ಒಲಿಂಪಿಕ್ ಕಂಚಿನ ಪದಕ ವಿಜೇತೆ ಎಂ.ಸಿ. ಮೇರಿ ಕೋಮ್(51ಕೆಜಿ ) ಮತ್ತು ವಿಶ್ವ ಚಾಂಪಿಯನ್‌ಷಿಪ್ ಕಂಚಿನ ಪದಕ ವಿಜೇತ ಶಿವಥಾಪ (56ಕೆಜಿ) ಶುಕ್ರವಾರದಿಂದ ಆರಂಭಗೊಂಡ ಏಷ್ಯಾ ಒಲಿಂಪಿಕ್ ಬಾಕ್ಸಿಂಗ್ ಅರ್ಹತಾ ಟೂರ್ನಿಯಲ್ಲಿ ಪ್ರಮುಖ ಆಕರ್ಷಣೆಯಾಗಿದ್ದಾರೆ.
ಕಾಮನ್‌ವೆಲ್ತ್ ಗೇಮ್ಸ್ ಬೆಳ್ಳಿ ಪದಕ ವಿಜೇತ ಎಲ್. ದೇವೇಂದ್ರೊ ಸಿಂಗ್ (49ಕೆಜಿ ವಿಭಾಗ) ಮತ್ತು ಏಷ್ಯಾ ಬೆಳ್ಳಿ ಪದಕ ವಿಜೇತ ವಿಕಾಸ್ ಕೃಷ್ಣಾ (75ಕೆಜಿ ವಿಭಾಗ) ಶ್ರೇಯಾಂಕ ಪಡೆದಿರುವ ಇತರ ಭಾರತೀಯ ಬಾಕ್ಸರ್‌ಗಳಾಗಿದ್ದಾರೆ. ಈ ಟೂರ್ನಿಯಲ್ಲಿ 30 ಮಂದಿ ಪುರುಷರು ಮತ್ತು ಆರು ಮಂದಿ ಮಹಿಳಾ ಬಾಕ್ಸರ್‌ಗಳು ರಿಯೊ ಒಲಿಂಪಿಕ್ಸ್‌ಗೆ ಅರ್ಹತೆ ಪಡೆಯಲಿದ್ದಾರೆ. ಪುರುಷರ ವಿಭಾಗದಲ್ಲಿ ಪ್ರತಿ ಕೆಜಿ ವಿಭಾಗದಲ್ಲಿ ಅಗ್ರ ಮೂವರು ರಿಯೊಗೆ ಅರ್ಹತೆ ಗಳಿಸಲಿದ್ದರೆ, ಮಹಿಳಾ ವಿಭಾಗದಲ್ಲಿ ಅಗ್ರ ಇಬ್ಬರು ಅರ್ಹತೆ ಪಡೆಯಲಿದ್ದಾರೆ. ಭಾರತೀಯ ಬಾಕ್ಸರ್‌ಗಳ ಹೋರಾಟ ಶನಿವಾರದಿಂದ ಆರಂಭವಾಗಲಿದ್ದು, ಇಬ್ಬರು ಪುರುಷರು ಮತ್ತು ಓರ್ವ ಮಹಿಳಾ ಬಾಕ್ಸರ್ ಕಣಕ್ಕಿಳಿಯಲಿದ್ದಾರೆ.
ಕಾಮನ್‌ವೆಲ್ತ್ ಕ್ರೀಡಾಕೂಟದ ಮಾಜಿ ಸ್ವರ್ಣ ಪದಕ ವಿಜೇತ ಮನೋಜ್ ಕುಮಾರ್ (64ಕೆಜಿ) ಮತ್ತು ಮತ್ತೆ ಬಾಕ್ಸಿಂಗ್ ರಿಂಗ್‌ಗೆ ಮರಳಿರುವ ಸುಮಿತ್ ಸಾಂಗ್ವಾನ್ (81ಕೆಜಿ) ಮೊದಲ ಸುತ್ತಿನಲ್ಲಿ ಕ್ರಮವಾಗಿ ಕಜಕಸ್ತಾನದ ಜುಸ್ಸುಪೋವ್ ಅಬ್ಲೈಖಾನ್ ಮತ್ತು ಕೊರಿಯಾದ ಹೀಗೌನ್ ಯಾಂಗ್ ಅವರ ಸವಾಲು ಎದುರಿಸಲಿದ್ದಾರೆ. ಇವರ ಜತೆಗೆ ಮಹಿಳಾ ವಿಭಾಗದಲ್ಲಿ ಏಷ್ಯನ್ ಗೇಮ್ಸ್ ಕಂಚಿನ ಪದಕ ವಿಜೇತೆ ಪೂಜಾ ರಾಣಿ(75ಕೆಜಿ) ಕೂಡ ಶನಿವಾರ ತಜಕಿಸ್ತಾನ್‌ನ ಶೋಯಿರಾ ಜುಲ್ಕಾಯ್ನಾರೊವಾ ಅವರನ್ನು ಮುಖಾಮುಖಿಯಾಗಲಿದ್ದಾರೆ.
ಡ್ರಾ ಅನ್ವಯ ಮೊದಲ ಸುತ್ತಿನಲ್ಲಿ ಬೈ ಪಡೆದಿರುವ ಶಿವಥಾಪ ಪ್ರಿ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಕೊರಿಯಾದ ಮೆಯಾಂಗ್‌ಕೌನ್ ಲೀ ಮತ್ತು ತಜಕಿಸ್ತಾನದ ಓರಾಜ್ ಅವ್ಜಾಲ್‌ಸೋಯೇವ್ ಅವರ ನಡುವಿನ ವಿಜೇತರನ್ನು ಎದುರಿಸಲಿದ್ದಾರೆ. ಐದು ಬಾರಿಯ ವಿಶ್ವ ಚಾಂಪಿಯನ್ ಮೇರಿ ಕೋಮ್ ಮೊದಲ ಸುತ್ತಿನಲ್ಲಿ ಕಜಕಸ್ತಾನದ ನಜೀಂ ಕಿಜೈಬಿ ಅವರ ಸವಾಲು ಪಡೆದಿದ್ದಾರೆ. ಇವರಲ್ಲದೆ, ಅನುಭವಿ ಹಾಗೂ ಮಾಜಿ ಏಷ್ಯನ್ ಚಾಂಪಿಯನ್ ಎಲ್. ಸರೀತಾ ದೇವಿ(60ಕೆಜಿ) ಆರಂಭಿಕ ಸುತ್ತಿನಲ್ಲಿ ಜಪಾನ್‌ನ ಟೊಮಾಕೊ ಕುಗಿಮಿಯಾ ವಿರುದ್ಧ ಕಣಕ್ಕಿಳಿಯಲಿದ್ದಾರೆ.
ದೇವೇಂದ್ರೊಗೆ ರೆಡ್ಜುವಾನ್ ಸವಾಲು
ದೇವೇಂದ್ರೊ ಪುರುಷರ ವಿಭಾಗದ ಮೊದಲ ಸುತ್ತಿನಲ್ಲಿ ಮಲೇಷ್ಯಾದ ಮೊಹಮ್ಮದ್ ರೆಡ್ಜುವಾನ್ ಫೌದ್ ಬಿನ್ ಅವರನ್ನು ಮುಖಾಮುಖಿಯಾಗಲಿದ್ದರೆ, ವಿಕಾಸ್ ಕೃಷ್ಣಾ ಸ್ಥಳೀಯ ಫೇವರಿಟ್ ಜಾಯೋ ಮಿಂಗಾಗಾಂಗ್ ಅವರ ಕಠಿಣ ಸವಾಲು ಎದುರಿಸಬೇಕಾಗಿದೆ. ಕಾಮನ್‌ವೆಲ್ತ್ ಗೇಮ್ಸ್ ಬೆಳ್ಳಿ ಪದಕ ವಿಜೇತ ಮಂದೀಪ್ ಜಂಗ್ರಾ(69ಕೆಜಿ) ಥಾಯ್ಲೆಂಡ್‌ನ ಸಾಯ್ಲೊಮ್ ಆರ್ಡೀ ವಿರುದ್ಧವು, ಗೌರವ್ ಬಿಧೂರಿ (52ಕೆಜಿ) ಮುಹಮ್ಮದ್ ಬಿನ್ ನೂರ್ ಮತ್ತು ಜಪಾನ್‌ನ ರೇಮೀ ತನಕಾ ನಡುವಿನ ವಿಜೇತರನ್ನು ಎದುರಿಸಲಿದ್ದಾರೆ. ಇವರ ಜತೆಗೆ ಧೀರಜ್, ಪ್ರವೀಣ್ ಕುಮಾರ್ ಮತ್ತು ಸತೀಶ್ ಕುಮಾರ್ ಮೊದಲ ಸುತ್ತಿನಲ್ಲಿ ಸುಲಭ ಸವಾಲು ಪಡೆದಿದ್ದಾರೆ.
ಆಗಸ್ಟ್ ನಲ್ಲಿ ನಡೆಯಲಿರುವ ರಿಯೊ ಒಲಿಂಪಿಕ್ಸ್‌ಗೆ ಅರ್ಹತೆ ಪಡೆಯಲು ಸುಮಾರು 30ಕ್ಕೂ ಅಧಿಕ ದೇಶಗಳ 226 ಬಾಕ್ಸರ್‌ಗಳು ಈ ಟೂರ್ನಿಯಲ್ಲಿ ತಮ್ಮ ಸಾಮರ್ಥ್ಯ ಪಣಕ್ಕಿಡಲಿದ್ದಾರೆ.
ಏಷ್ಯಾ ಒಲಿಂಪಿಕ್ ಅರ್ಹತಾ ಟೂರ್ನಿ / ಇಂದಿನಿಂದ ಭಾರತೀಯರ ಹೋರಾಟ