ಉತ್ತರಪ್ರದೇಶ ಚುನಾವಣೆ: ಮುಲಾಯಂ ಕಿರಿ ಸೊಸೆ ಕಣಕ್ಕೆ

ಲಖನೌ: ಉತ್ತರಪ್ರದೇಶದಲ್ಲಿ ಈಗಾಗಲೇ ಸಾಮಾಜಿಕ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳ ಮೂಲಕ ಹೆಸರು ಮಾಡಿರುವ ಸಮಾಜವಾದಿ ಪಕ್ಷದ ಮುಖ್ಯಸ್ಥ ಮುಲಾಯಂ ಸಿಂಗ್ ಯಾದವ್ ಕಿರಿ ಸೊಸೆ ಅಪರ್ಣಾ ಯಾದವ್ ರಾಜಕೀಯ ಪ್ರವೇಶಿಸುವುದು ಬಹುತೇಕ ಖಚಿತವಾಗಿದೆ.

'ಮುಂದಿನ ವರ್ಷ ನಡೆಯುವ ವಿಧಾನಸಭಾ ಚುನಾವಣೆಯಲ್ಲಿ ಲಖನೌ ಕಂಟೋನ್ಮೆಂಟ್ ವಿಧಾನಸಭಾ ಕ್ಷೇತ್ರದಿಂದ 26 ವರ್ಷದ ಅಪರ್ಣಾ ಕಣಕ್ಕಿಳಿಯಲಿದ್ದಾರೆ,' ಎಂದು ಹಿರಿಯ ಸಚಿವ ಹಾಗೂ ಮುಲಾಯಂ ಸಹೋದರ ಶಿವಪಾಲ್ ಸಿಂಗ್ ಯಾದವ್ ಹೇಳಿದ್ದಾರೆ.

ಪ್ರಸ್ತುತ ಕಾಂಗ್ರೆಸ್‌ನ ರೀತಾ ಬಹುಗುಣ ಜೋಷಿ ಈ ಕ್ಷೇತ್ರವನ್ನು ಪ್ರತಿನಿಧಿಸುತ್ತಿದ್ದಾರೆ.

ಮುಲಾಯಂ ಕಿರಿಯ ಮಗ ಪ್ರತೀಕ್ ಯಾದವ್ ಪತ್ನಿ ಅಪರ್ಣಾ. ಹಿರಿ ಸೊಸೆ ಡಿಂಪಲ್ ಯಾದವ್, ಸೋದರಳಿಯ ಧರ್ಮೇಂದ್ರ ಯಾದವ್, ಅಕ್ಷಯ್ ಪ್ರತಾಪ್ ಮತ್ತು ತೇಜ್ ಪ್ರತಾಪ್ ಲೋಕಸಭಾ ಸದಸ್ಯರು. ಮತ್ತೊಬ್ಬ ಸಹೋದರ ರಾಮ್‌ಗೋಪಾಲ್ ಯಾದವ್ ರಾಜ್ಯಸಭಾ ಸದಸ್ಯರಾದರೆ, ಹಿರಿಯ ಮಗ ಅಖಿಲೇಶ್ ಯಾದವ್ ಉತ್ತರಪ್ರದೇಶ ಮುಖ್ಯಮಂತ್ರಿಯಾಗಿದ್ದಾರೆ.