ಹಸೆಮಣೆ ಏರಲಿರುವ ಭಾವನಾ

* ಪದ್ಮಾ ಶಿವಮೊಗ್ಗ

ದಕ್ಷಿಣ ಭಾರತದ ಎಲ್ಲ ಭಾಷೆಗಳಲ್ಲಿ 10 ವರ್ಷಗಳಿಂದ ನಟಿಸುತ್ತ ಬಂದಿರುವ ಮಲಯಾಳಂ ನಟಿ ಭಾವನಾ ಇದೀಗ ಹಸೆಮಣೆ ಏರಲು ಸಿದ್ಧವಾಗಿದ್ದಾರೆ.

ಇವರು ಕನ್ನಡದಲ್ಲೂ ಹೆಸರು ಮಾಡಿದವರು. ವಿಷ್ಣುವರ್ಧನ, ಜಾಕಿ, ರೋಮಿಯೋ, ಯಾರೇ ಕೂಗಾಡಲಿ ಚಿತ್ರಗಳನ್ನು ನೋಡಿದವರು ಅವರನ್ನು ಮರೆಯುವುದಿಲ್ಲ. ನಟ ನವೀನ್ ಜತೆ ಭಾವನಾ ದಾಂಪತ್ಯಗೀತೆ ಹಾಡಲಿದ್ದಾರೆ. ಈ ನವೀನ್ ಇನ್ಯಾರೂ ಅಲ್ಲ, ನಾಯಕ ಚಿತ್ರದಲ್ಲಿ ರಾಗಿಣಿಗೆ ಹೀರೋ ಆಗಿ ನಟಿಸಿದ್ದವರು.

ನಾಯಕ ಚಿತ್ರ ನವೀನ್‌ರ ಮೊದಲ ಸಿನಿಮಾ. ಆನಂತರ ಅವರು ಯಾವ ಚಿತ್ರದಲ್ಲೂ ನಟಿಸಿಲ್ಲ. ಈ ಸಿನಿಮಾ ನಂತರ ಭಾವನಾ ಜತೆಗಿನ ಭೇಟಿ, ಸ್ನೇಹಕ್ಕೆ ತಿರುಗಿತ್ತು. ಕಳೆದ ನಾಲ್ಕು ವರ್ಷಗಳಿಂದ ಇವರಿಬ್ಬರೂ ಪ್ರೀತಿಸುತ್ತಿದ್ದರೆನ್ನಲಾಗಿದೆ. ನವೀನ್ ತಂದೆ ಸೆಕ್ಯುರಿಟಿ ಗಾರ್ಡ್ ಬಿಸ್ನೆಸ್ ನಡೆಸುತ್ತಿದ್ದಾರೆ.

ನಾಲ್ಕೈದು ತಿಂಗಳ ಹಿಂದೆ ಭಾವನಾ ತಂದೆ ವಿಧಿವಶರಾದರು. ಆ ನಂತರ ಈ ನಟಿ ಮದುವೆ ವಿಚಾರವನ್ನು ಗಂಭೀರವಾಗಿ ಪರಿಗಣಿಸಿದ್ದಾರೆ.

ಮಲೆಯಾಳಂ ಚಾನೆಲ್‌ಗೆ ನೀಡಿದ ಸಂದರ್ಶನದಲ್ಲಿ ನಿರ್ಮಾಪಕನನ್ನು ವಿವಾಹವಾಗುತ್ತಿರುವುದಾಗಿ ಹೇಳಿದ್ದಾರೆ. 2014ರಲ್ಲೇ ಮದುವೆಯಾಗಲು ಬಯಸಿದ್ದರಂತೆ. ಈಗಾಗಲೇ ಮನೆಯವರು ಮಾತುಕತೆ ಮಾಡಿದ್ದು, ಸದ್ಯದಲ್ಲೇ ಅವರು ವಿವಾಹವಾಗಲಿರುವುದು ಖಚಿತವಾದಂತಾಗಿದೆ.