ಪದಕ ಬೇಟೆಯಲ್ಲಿ ಭಾರತ ತ್ರಿಶತಕ

ದಕ್ಷಿಣ ಏಷ್ಯಾ ಕ್ರೀಡಾಕೂಟ: ಭಾರತಕ್ಕೆ ಅಗ್ರಸ್ಥಾನ ಮೇರಿ ಕೋಮ್, ಸರಿತಾದೇವಿ ಸ್ವರ್ಣ ಸಾಧನೆ
ಶಿಲ್ಲಾಂಗ್: ಭಾರತದ ಸ್ಟಾರ್ ಮಹಿಳಾ ಬಾಕ್ಸರ್ ಎಂ.ಸಿ.ಮೇರಿ ಕೋಮ್, ಪೂಜಾ ರಾಣಿ ಮತ್ತು ಸರೀತಾ ದೇವಿ, ಇಲ್ಲಿ ಮುಕ್ತಾಯಗೊಂಡ 12ನೇ ದಕ್ಷಿಣ ಏಷ್ಯಾ ಕ್ರೀಡಾಕೂಟದಲ್ಲಿ ಚಿನ್ನದ ಸಾಧನೆ ಮಾಡಿದ್ದಾರೆ. ಇದರೊಂದಿಗೆ ಭಾರತ ಮಹಿಳೆಯರ ಬಾಕ್ಸಿಂಗ್ ವಿಭಾಗದಲ್ಲಿ ಎಲ್ಲಾ ಮೂರು ಚಿನ್ನದ ಪದಕಗಳನ್ನು ಬಗಲಿಗೆ ಹಾಕಿಕೊಂಡಿತು.

ಕೂಟದ ಅಂತಿಮ ದಿನವಾದ ಮಂಗಳವಾರ ಕೂಡ ಚಿನ್ನದ ಬೇಟೆ ಮುಂದುವರಿಸಿದ ಆತಿಥೇಯ ಕ್ರೀಡಾಪಟುಗಳು 7 ಬಂಗಾರಕ್ಕೆ ಕೊರಳೊಡ್ಡಿದರು. 188 ಚಿನ್ನ, 90 ಬೆಳ್ಳಿ ಮತ್ತು 30 ಕಂಚಿನ ಪದಕದೊಂದಿಗೆ ಒಟ್ಟಾರೆ 308 ಪದಕಗಳನ್ನು ಗೆದ್ದ ಭಾರತ ಪದಕ ಪಟ್ಟಿಯಲ್ಲಿ ಅಗ್ರಸ್ಥಾನದೊಂದಿಗೆ ಅತ್ಯುತ್ತಮ ಸಾಧನೆ ತೋರಿತು.

ಭಾರತದ ಆಥ್ಲೀಟ್‌ಗಳಿಗೆ ಪೈಪೋಟಿ ನೀಡಿದ ಶ್ರೀಲಂಕಾ 25 ಚಿನ್ನ, 63 ಬೆಳ್ಳಿ ಮತ್ತು 98 ಕಂಚಿನೊಂದಿಗೆ ಒಟ್ಟಾರೆ 186 ಪದಕ ಗೆದ್ದು ಎರಡನೇ ಸ್ಥಾನ ಗಳಿಸಿದರೆ; 12 ಸ್ವರ್ಣ, 37 ರಜತ ಮತ್ತು 57 ಕಂಚು ಗೆದ್ದ ಪಾಕಿಸ್ತಾನ 106 ಪದಕಗಳೊಂದಿಗೆ ಮೂರನೇ ಸ್ಥಾನ ಗಳಿಸಿತು.

ಭುಜದ ಗಾಯದಿಂದ ಇತ್ತೀಚೆಗೆ ಚೇತರಿಸಿಕೊಂಡಿರುವ ಲಂಡನ್ ಒಲಿಂಪಿಕ್ಸ್ ಪದಕ ವಿಜೇತೆ ಮೇರಿ ಕೋಮ್ ಮಹಿಳೆಯರ 51ಕೆ.ಜಿ ವಿಭಾಗದ ಫೈನಲ್‌ನಲ್ಲಿ ಶ್ರೀಲಂಕಾದ ಎದುರಾಳಿ ಅನುಷಾ ಕೊಡಿತುವಾಕ್ಕು ಅವರಿಗೆ ಬಲಿಷ್ಠ ಪಂಚ್‌ಗಳನ್ನು ನೀಡುವ ಮೂಲಕ ಗಮನ ಸೆಳೆದರು. ಅದರಲ್ಲೂ ಟೆಕ್ನಿಕಲ್ ನಾಕೌಟ್‌ನಲ್ಲಿ ಮಿಂಚಿದ ಮೇರಿ ಕೋಮ್ ಕೇವಲ 90 ಸೆಕೆಂಡ್‌ಗೂ ಕಡಿಮೆ ಅವಧಿಯಲ್ಲಿ ಎದುರಾಳಿಯನ್ನು ಪರಾಭವಗೊಳಿಸಿದರು. ಮೋರಿ ಅವರ ಶಕ್ತಿಯುತ ಪಂಚ್‌ಗೆ ಬೆಚ್ಚಿ ಬಿದ್ದ ಲಂಕಾ ಬಾಕ್ಸರ್ ಮೊಣಕಾಲಿನ ನೋವಿಗೆ ಒಳಗಾಗಿ ಪಂದ್ಯದ ಮಧ್ಯೆ ವೈದ್ಯಕೀಯ ವಿಶ್ರಾಂತಿಗೂ ಮೊರೆ ಹೋದರು. ಅಷ್ಟರಲ್ಲಾಗಲೇ ಪಂದ್ಯದ ಮೇಲೆ ಬಹುತೇಕ ಹಿಡಿದ ಸಾಧಿಸಿದ್ದ ಮೇರಿ ಮತ್ತಷ್ಟು ಆತ್ಮವಿಶ್ವಾಸದೊಂದಿಗೆ ಲಂಕಾ ಬಾಕ್ಸರ್ ಮೇಲೆ ಸವಾರಿ ಮಾಡಿದರು.

ಫೈನಲ್‌ಗೂ ಮುನ್ನ ಹೈಡ್ರಾಮಾ

ಮಹಿಳಾ ಬಾಕ್ಸಿಂಗ್‌ನ ಫೈನಲ್ ಪಂದ್ಯಗಳಿಗೂ ಮುನ್ನ ಹೈಡ್ರಾಮಾ ನಡೆಯಿತು. ವೇತನ ನೀಡುವಲ್ಲಿ ಸಂಘಟನಾ ಸಮಿತಿ ವಿಳಂಬ ಧೋರಣೆ ಅನುಸರಿಸುತ್ತಿದೆ ಎಂದು ಆರೋಪಿಸಿ ಎಐಬಿಎ ನೇಮಿಸಿದ್ದ ಅಡೋಕ್ ಸಮಿತಿಯ ಅಧಿಕಾರಿಗಳು ಸ್ಪರ್ಧೆಯಿಂದ ಹೊರಗುಳಿಯುವ ಬೆದರಿಕೆವೊಡ್ಡಿದರು. ಹೀಗಾಗಿ ಫೈನಲ್ ಪಂದ್ಯಗಳು ಸುಮಾರು 40 ನಿಮಿಷ ತಡವಾಗಿ ಆರಂಭಗೊಂಡವು. ಬಳಿಕ ಮಾತುಕತೆ ಮೂಲಕ ಎಲ್ಲಾ ವಿವಾದಗಳು ಇತ್ಯರ್ಥ್ಯವಾಗಿದೆ ಎಂದು ಶಿಲ್ಲಾಂಗ್ ಸಂಘಟನಾ ಸಮಿತಿ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಆರ್.ಕೆ. ಶರ್ಮಾ ತಿಳಿಸಿದರು.

ಜುಡೋದಲ್ಲಿ ಮತ್ತೆ ನಾಲ್ಕು ಪದಕ

ಜವಾಹರ್ ಲಾಲ್ ನೆಹರು ಒಳಾಂಗಣ ಕ್ರೀಡಾಂಗಣದಲ್ಲಿ ಮಂಗಳವಾರ ನಡೆದ ಜುಡೋ ಸ್ಪರ್ಧೆಯಲ್ಲಿ ಭಾರತ ತಲಾ ಎರಡು ಚಿನ್ನ ಮತ್ತು ಬೆಳ್ಳಿ ಪದಕ ಗೆಲ್ಲುವ ಮೂಲಕ ಅಗ್ರಸ್ಥಾನಿಯಾಗಿ ಅಭಿಯಾನ ಕೊನೆಗೊಳಿಸಿತು. ಸ್ಪರ್ಧೆಯ ಅಂತಿಮ ದಿನ ಇದ್ದ ಜುಡೋ ವಿಭಾಗದ ನಾಲ್ಕು ಸ್ಪರ್ಧೆಗಳಲ್ಲೂ ಭಾರತ ಪದಕ ಗೆಲ್ಲುವಲ್ಲಿ ಯಶಸ್ವಿಯಾಯಿತು.

ಪುರುಷರ 90 ಕೆ.ಜಿ ವಿಭಾಗದಲ್ಲಿ ಅವತಾರ್ ಸಿಂಗ್ ಆಫಘಾನಿಸ್ತಾನದ ಮೊಹಮ್ಮದ್ ಇಸ್ಮಾಯಿಲ್ ವಿರುದ್ಧ ಕೇವಲ 49 ಸೆಕೆಂಡ್‌ಗಳಲ್ಲಿ ಜಯ ಗಳಿಸಿ ಚಿನ್ನಕ್ಕೆ ಕೊರಳೊಡ್ಡಿದರೆ, ಮಹಿಳೆಯರ 70ಕೆ.ಜಿ ಒಳಗಿನವರ ವಿಭಾಗದಲ್ಲಿ ಪೂಜಾ, ಪಾಕಿಸ್ತಾನದ ಬೀನಿಶ್ ಖಾನ್ ಎದುರು ಗೆದ್ದು ಸಂಭ್ರಮಿಸಿದರು.

ಮಹಿಳೆಯರ 78ಕೆ.ಜಿ ಒಳಗಿನವರ ವಿಭಾಗದಲ್ಲಿ ಅರುಣಾ, ಪಾಕಿಸ್ತಾನದ ಫೌಜಿಯಾ ಮುಮ್ತಾಜ್ ವಿರುದ್ಧ ಸೋತು ಬೆಳ್ಳಿಗೆ ತೃಪ್ತಿಪಟ್ಟುಕೊಂಡರೆ, ಪುರುಷರ 100 ಕೆ.ಜಿ ಫೈನಲ್‌ನಲ್ಲಿ ಶುಭಂ ಕುಮಾರ್, ಪಾಕಿಸ್ತಾನದ ಹುಸೈನ್ ಶಾ ವಿರುದ್ಧ ಗೆದ್ದು ಸ್ವರ್ಣ ಪದಕ ತಮ್ಮದಾಗಿಸಿಕೊಂಡರು. ಭಾರತ ಒಟ್ಟಾರೆ ಜುಡೋದ 12 ಸ್ಪರ್ಧೆಗಳಲ್ಲಿ 9 ಚಿನ್ನ, ಮೂರು ಬೆಳ್ಳಿ ಗೆದ್ದುಕೊಂಡಿತು.