ಬೆಂಗಳೂರು: ಅರಮನೆ ನಗರಿ ಮೈಸೂರು, ಪುರುಷ ಮತ್ತು ಮಹಿಳೆಯರ 66ನೇ ಹಿರಿಯರ ರಾಷ್ಟ್ರೀಯ ಬಾಸ್ಕೆಟ್‌ಬಾಲ್ ಚಾಂಪಿಯನ್‌ಷಿಷ್‌ಗೆ ಆತಿಥ್ಯ ವಹಿಸಿದೆ.
ಇಲ್ಲಿನ ಚಾಮುಂಡಿ ವಿಹಾರ್ ಕ್ರೀಡಾಂಗಣದ ಸಂಕಿರಣದಲ್ಲಿ ಜ.9ರಿಂದ 16ರವರೆಗೆ ಚಾಂಪಿಯನ್‌ಷಿಪ್ ಜರುಗಲಿದ್ದು, ರಾಷ್ಟ್ರೀಯ ಕಿರೀಟಕ್ಕಾಗಿ ದೇಶದ ಹಲವು ರಾಜ್ಯ ತಂಡಗಳು ಪೈಪೋಟಿ ನಡೆಸಲಿವೆ.
ಭಾರತೀಯ ಬಾಸ್ಕೆಟ್‌ಬಾಲ್ ಸಂಸ್ಥೆಯ ನಿಯಮದನ್ವಯ ಕರ್ನಾಟಕ ರಾಜ್ಯ ಬಾಸ್ಕೆಟ್ ಬಾಲ್ ಸಂಸ್ಥೆಯ ಈ ಚಾಂಪಿಯನ್‌ಷಿಪ್ ಆಯೋಜಿಸುತ್ತಿದೆ. ಸುಮಾರು 30 ವರ್ಷಗಳ ನಂತರ ಮೈಸೂರಿನಲ್ಲಿ ಈ ಚಾಂಪಿಯನ್‌ಷಿಪ್ ನಡೆಯುತ್ತಿದೆ. 1987ರಲ್ಲಿ ಇಲ್ಲಿ ಕೊನೆಯದಾಗಿ ಹಿರಿಯರ ರಾಷ್ಟ್ರೀಯ ಬಾಸ್ಕೆಟ್‌ಬಾಲ್ ಚಾಂಪಿಯನ್‌ಷಿಪ್ ಜರುಗಿತ್ತು. ಲೀಗ್ ಮತ್ತು ನಾಕೌಟ್ ಹಂತದಲ್ಲಿ ನಡೆಯಲಿರುವ ಚಾಂಪಿಯನ್‌ಷಿಪ್‌ನಲ್ಲಿ 140ಕ್ಕೂ ಅಧಿಕ ಪಂದ್ಯಗಳು ಜರುಗಲಿದ್ದು, ದೇಶದ ಅಂತಾರಾಷ್ಟ್ರೀಯ ಪ್ರಮುಖ ಆಟಗಾರರು ಪಾಲ್ಗೊಳ್ಳುವ ನಿರೀಕ್ಷೆಯಿದೆ.
ಭಾರತದ ಪುರುಷರ ತಂಡದ ನಾಯಕ ವಿಶೇಶ್ ಭೃಗುವಂಶಿಸ, ಭಾರತದ ಮಹಿಳಾ ತಂಡದ ನಾಯಕಿ ಅನಿತಾ ಪಾಲ್ ದೊರೈ, ಕರ್ನಾಟಕದ ಅಂತಾರಾಷ್ಟ್ರೀಯ ಆಟಗಾರ ಅರವಿಂದ್ ಅರುಮುಗಂ, ಭಾಂದವ್ಯ ಎಚ್.ಎಂ ಮತ್ತು ರಾಜೇಶ್ ಉಪ್ಪಾರ ಸೇರಿದಂತೆ ಪ್ರಮುಖ ಆಟಗಾರರು ಟೂರ್ನಿಯಲ್ಲಿ ಭಾಗಿಯಾಗುವ ನಿರೀಕ್ಷೆ ಇದೆ. 29 ಪುರುಷ ಮತ್ತು 24 ಮಹಿಳಾ ತಂಡಗಳು ಈಗಾಗಲೇ ಚಾಂಪಿಯನ್‌ಷಿಪ್‌ನಲ್ಲಿ ಪಾಲ್ಗೊಳ್ಳುವುದನ್ನು ಖಚಿತಪಡಿಸಿವೆ. ಆಟಗಾರರು, ಕೋಚ್‌ಗಳಿಗೆ ಎಲ್ಲ ರೀತಿಯ ಅಗತ್ಯ ಸೌಲಭ್ಯಗಳನ್ನು ರಾಜ್ಯ ಬಾಸ್ಕೆಟ್‌ಬಾಲ್ ಸಂಸ್ಥೆ ಒದಗಿಸಲಿದೆ.
ಜ.19ರಿಂದ 16ರವರೆಗೆ ಚಾಂಪಿಯನ್‌ಷಿಪ್