ಬಾಲ ನ್ಯಾಯಿಕ ತಿದ್ದುಪಡಿ ವಿಧೇಯಕದ ಮುಖ್ಯಾಂಶಗಳು

ಹೊಸದಿಲ್ಲಿ: ಬಾಲ ನ್ಯಾಯಿಕ ತಿದ್ದುಪಡಿ ವಿಧೇಯಕ ಒಳಗೊಂಡಿರುವ ಪ್ರಮುಖ ಅಂಶಗಳು ಹೀಗಿವೆ,

1. 16 ವರ್ಷದ ಮಕ್ಕಳು ಅಪರಾಧ ಎಸಗಿದರೆ ಜೈಲಿಗೆ ಹೋಗಲೇಬೇಕು ಎಂಬುದು ಬಾಲ ನ್ಯಾಯಿಕ ತಿದ್ದುಪಡಿ ವಿಧೇಯಕದ ಉದ್ದೇಶವಲ್ಲ.

2.ಅಪ್ರಾಪ್ತ ವಯಸ್ಕರು ಪಾತಕ ಕೃತ್ಯದಲ್ಲಿ ಭಾಗಿಯಾದರೆ ಅವರು ಪ್ರೌಢ ಮನಸ್ಥಿತಿಯಲ್ಲಿ ಕೃತ್ಯ ಎಸಗಿದ್ದಾರೆಯೇ ಅಥವಾ ಮಕ್ಕಳಾಟಿಕೆಯ ಬಾಲಿಶತನದಿಂದ ನಡೆಸಿರುವರೇ ಎಂಬುದನ್ನು ಬಾಲ ಸಮಿತಿ ನಿರ್ಧರಿಸಬೇಕು.

3.ಕಾನೂನಿನ ಜತೆ ಸಂಘರ್ಷದಲ್ಲಿರುವ ಮಕ್ಕಳ ಕಾಳಜಿ ಮತ್ತು ರಕ್ಷಣೆ ಅಗತ್ಯವನ್ನು ವಿಧೇಯಕ ಪ್ರತಿಪಾದಿಸುತ್ತದೆ.

4.16-18 ವರ್ಷದೊಳಗಿನವರು ಪಾತಕ ಕೃತ್ಯಗಳಲ್ಲಿ ಭಾಗಿಯಾಗಿದ್ದರೆ ಅವರನ್ನು ವಯಸ್ಕ ಅಪರಾಧಿಗಳಂತೆ ವಿಚಾರಣೆ ನಡೆಸಲು ವಿಧೇಯಕ ಅವಕಾಶ ಕಲ್ಪಿಸಿದ್ದು, 21 ವರ್ಷದ ಬಳಿಕವೇ ಬಂಧಿಸಬೇಕಾಗುತ್ತದೆ.

5. ಪ್ರತಿ ಜಿಲ್ಲೆಗಳಲ್ಲೂ ಬಾಲ ನ್ಯಾಯಿಕ ಮಂಡಳಿ ಮತ್ತು ಶಿಶು ಕಲ್ಯಾಣ ಸಮಿತಿ ರಚಿಸಬೇಕು. ಮಂಡಳಿ ಪ್ರಾಥಮಿಕ ತನಿಖೆ ನಡೆಸಿ ಬಾಲಾಪರಾಧಿಯನ್ನು ಪುನರ್ವಸತಿಗೆ ಕಳಿಸಬೇಕೆ ಅಥವಾ ವಯಸ್ಕರಂತೆ ವಿಚಾರಣೆಗೊಳಪಡಿಸಬೇಕೆ ಎಂಬುದನ್ನು ನಿರ್ಧರಿಸಬೇಕು. ಶಿಶು ಕಲ್ಯಾಣ ಸಮಿತಿಯು ಸಾಂಸ್ಥಿಕ ಕಾಳಜಿ ಮತ್ತು ರಕ್ಷಣೆ ಅಗತ್ಯವನ್ನು ನಿರ್ಧರಿಸಬೇಕು.

6. ದತ್ತು ಪೋಷಕರ ಅರ್ಹತೆ ಮತ್ತು ದತ್ತು ನಿಯಮಾವಳಿಗಳನ್ನು ಕೂಡ ವಿಧೇಯಕ ಒಳಗೊಂಡಿದೆ.

7. ಮಗುವಿನ ಮೇಲೆ ಕ್ರೌರ‌್ಯ, ಮಗುವಿಗೆ ಮಾದಕ ವಸ್ತು ನೀಡುವಿಕೆ, ಮಗುವಿನ ಅಪಹರಣ ಮತ್ತು ಮಾರಾಟಕ್ಕೆ ವಿಧಿಸಬೇಕಾದ ಶಿಕ್ಷೆಯನ್ನು ಕೂಡ ನಿರ್ದೇಶಿಸಲಾಗಿದೆ.

8. ಬಾಲಾಪರಾಧಿಯ ವಿರುದ್ಧ ಪ್ರಕರಣ ದಾಖಲಿಸಲು ಕನಿಷ್ಠ 7 ವರ್ಷಗಳಾಗಿರಬೇಕು.

9. 1992ರಲ್ಲಿ ಮಕ್ಕಳ ಹಕ್ಕು ಕುರಿತು ವಿಶ್ವಸಂಸ್ಥೆಯ ಸಮಾವೇಶದಲ್ಲಿ ಕೈಗೊಳ್ಳಲಾಗಿರುವ ನಿರ್ಣಯವನ್ನು ಭಾರತ ಸಮ್ಮತಿಸಿದ್ದು, ಜ್ಯುವೆನಲ್ ಜಸ್ಟಿಸ್ (ಕೇರ್ ಆ್ಯಂಡ್ ಪ್ರೊಟೆಕ್ಷನ್ ಆಫ್ ಚಿಲ್ಡ್ರನ್)ಕಾಯಿದೆಯು ಅದಕ್ಕೆ ಬದ್ಧವಾಗಿದೆ.