ನಗರದ ರಸ್ತೆಗಿಳಿಯಲಿದೆ 1500 ಗುತ್ತಿಗೆ ಬಸ್‌ಗಳು

ಬೆಂಗಳೂರು: ಆರ್ಥಿಕವಾಗಿ ಸಂಕಷ್ಟದಲ್ಲಿರುವ ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆಗೆ (ಬಿಎಂಟಿಸಿ) ಗುತ್ತಿಗೆ ಆಧಾರದ ಮೇಲೆ 1500 ಬಸ್‌ಗಳನ್ನು ಪಡೆದು ಕಾರ್ಯಾಚರಣೆಗೊಳಿಸಲು ಸರಕಾರ ಉದ್ದೇಶಿಸಿದೆ.

ಒಟ್ಟು 1500 ಬಸ್‌ಗಳನ್ನು ಗುತ್ತಿಗೆ ಮೂಲಕ ಪಡೆದು, ಓಡಿಸಲು ತೀರ್ಮಾನಿಸಲಾಗಿದೆ. ಗುತ್ತಿಗೆ ಆಧಾರದ ಮೇಲೆ ಬಸ್‌ಗಳನ್ನು ಒದಗಿಸುವವರಿಗೆ ಕಿ.ಮೀ ಗೆ ಇಂತಿಷ್ಟು ಹಣವನ್ನು ಪಾವತಿಸಲಾಗುತ್ತದೆ. ಸಂಸ್ಥೆಯಿಂದಲೇ ಚಾಲಕ-ನಿರ್ವಾಹಕರನ್ನು ನೇಮಿಸಲಾಗುತ್ತದೆ.

ಕಳೆದ 8-10 ವರ್ಷಗಳ ಹಿಂದೆ ಗುತ್ತಿಗೆ ಆಧಾರದ ಮೇಲೆ ಬಸ್‌ಗಳನ್ನು ಪಡೆದು ಓಡಿಸಲಾಗುತ್ತಿತ್ತು. ಆಗ ಪಿ.ಜಿ.ಆರ್‌.ಸಿಂಧ್ಯಾ ಸಾರಿಗೆ ಸಚಿವರಾಗಿದ್ದರು. ಅದೇ ಗುತ್ತಿಗೆ ಪದ್ಧತಿಯನ್ನು ಮತ್ತೆ ಜಾರಿಗೆ ತರಲಾಗುತ್ತಿದೆ.

ಬಿಎಂಟಿಸಿಗೆ ಒಟ್ಟು 3000 ಹೊಸ ಬಸ್‌ಗಳನ್ನು ಸೇರ್ಪಡೆ ಮಾಡಲಾಗುತ್ತಿದೆ. ಇದರಲ್ಲಿ 1500 ಬಸ್‌ಗಳ ಖರೀದಿಗೆ ಸರಕಾರವೇ ಹಣ ಒದಗಿಸಲಿದೆ. ಸರಕಾರ ಬಸ್‌ಗಳ ಖರೀದಿಗೆ ಅನುದಾನ ನೀಡುತ್ತಿರುವುದು ಇದೇ ಮೊದಲು. ಕಳೆದ ವರ್ಷ 1000 ಬಸ್‌ಗಳ ಖರೀದಿಗೆ ಮಾಡಿದ್ದ ಸಾಲದ ಬಡ್ಡಿಯನ್ನೇ ಪಾವತಿಸಿತ್ತು. ಉಳಿದ 1500 ಬಸ್‌ಗಳನ್ನು ಗುತ್ತಿಗೆಗೆ ಪಡೆಯಲಾಗುತ್ತಿದೆ.

ಅಲ್ಲದೇ ಬಸ್‌ಗಳ ಖರೀದಿಗೆ ಪಡೆಯುವ ಸಾಲ ಮತ್ತು ಬಡ್ಡಿಯ ಮರುಪಾವತಿ ಜವಾಬ್ದಾರಿಯನ್ನು ಸರಕಾರವೇ ಹೊರುತ್ತಿದೆ. ಆ ಮೂಲಕ ನಷ್ಟದಲ್ಲಿರುವ ಬಿಎಂಟಿಸಿಗೆ ಆರ್ಥಿಕವಾಗಿ ಚೇತರಿಸಿಕೊಳ್ಳಲು ನೆರವಾಗುತ್ತಿದೆ.

ಮುಖ್ಯಾಂಶಗಳು

* ಬಿಎಂಟಿಸಿಗೆ 3 ಸಾವಿರ ಬಸ್‌ ಸೇರ್ಪಡೆ

* 1500 ಖರೀದಿ, 1500 ಗುತ್ತಿಗೆಗೆ ಪಡೆದು ಕಾರ್ಯಾಚರಣೆ

* 1500 ಬಸ್‌ ಖರೀದಿಗೆ ಸರಕಾರವೇ ಹಣ ಭರಿಸಲಿದೆ

* ಮಹಿಳಾ ಪ್ರಯಾಣಿಕರ ಸುರಕ್ಷತೆಗಾಗಿ ಬಿಎಂಟಿಸಿ ಮೊಬೈಲ್‌ ಅಪ್ಲಿಕೇಷನ್‌ನಲ್ಲಿ ಹೊಸದಾಗಿ ಎಸ್‌ಒಎಸ್‌ ಬಟನ್‌ ಮತ್ತು ಟ್ರ್ಯಾಕಿಂಗ್‌ ಸೌಲಭ್ಯ ಅಳವಡಿಕೆ

* ಉಚಿತ ಮತ್ತು ರಿಯಾಯಿತಿ ದರದ ಪಾಸುದಾರರಿಗೆ ಸ್ಮಾರ್ಟ್‌ಕಾರ್ಡ್‌ ವಿತರಣೆ

* ಕೇಂದ್ರದ ಅನುದಾನದಲ್ಲಿ 150 ಎಲೆಕ್ಟ್ರಿಕ್‌ ಬಸ್‌ ಖರೀದಿ

ಏ. 1ರಿಂದ ಎರಡು ಸ್ಟ್ರೋಕ್‌ ಆಟೊ ಸಂಚಾರ ನಿಷೇಧ

ನಗರದಲ್ಲಿ ವಾಯು ಮತ್ತು ಶಬ್ಧ ಮಾಲಿನ್ಯವನ್ನು ತಗ್ಗಿಸುವ ಸಲುವಾಗಿ ಏ. 1ರಿಂದ ಜಾರಿಗೆ ಬರುವಂತೆ ಎರಡು ಸ್ಟ್ರೋಕ್‌ ಆಟೊಗಳ ಸಂಚಾರವನ್ನು ಸರಕಾರ ನಿಷೇಧಿಸಿದೆ.

ಈ ಬಗ್ಗೆ ಆಯವ್ಯಯದಲ್ಲಿ ಪ್ರಸ್ತಾಪಿಸಿರುವ ಸಿಎಂ ಸಿದ್ದರಾಮಯ್ಯ, ಎರಡು ಸ್ಟ್ರೋಕ್‌ ಆಟೊಗಳ ಬದಲಿಗೆ ಎಲ್‌ಪಿಜಿ ಕಿಟ್‌ ಅಳವಡಿಸಿರುವ ನಾಲ್ಕು ಸ್ಟ್ರೋಕ್‌ ಆಟೊ ಖರೀದಿಗೆ 30 ಸಾವಿರ ರೂ. ಸಹಾಯಧನ ಘೋಷಿಸಿದ್ದಾರೆ. ಸುಮಾರು 10 ಸಾವಿರ ಆಟೊಗಳಿಗೆ ಸಬ್ಸಿಡಿ ನೀಡಲು 30 ಕೋಟಿ ರೂ. ಒದಗಿಸಲಾಗಿದೆ.

ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿಯು 7-8 ವರ್ಷಗಳ ಹಿಂದೆಯೇ 15 ವರ್ಷ ಮೇಲ್ಪಟ್ಟ ಮತ್ತು ಎರಡು ಸ್ಟ್ರೋಕ್‌ ಆಟೊಗಳ ಸಂಚಾರ ರದ್ದುಪಡಿಸುವಂತೆ ಸರಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿತ್ತು. ಇದಕ್ಕೆ ಆಟೊ ಚಾಲಕರಿಂದ ತೀವ್ರ ವಿರೋಧ ವ್ಯಕ್ತವಾಯಿತು. ಹಾಗಾಗಿ, ಈವರೆಗೆ ಎರಡು ಸ್ಟ್ರೋಕ್‌ ಆಟೊಗಳ ಸಂಚಾರ ರದ್ದಾಗಿರಲಿಲ್ಲ. ನಗರದಲ್ಲಿ 1.25 ಲಕ್ಷ ಆಟೊಗಳಿದ್ದು, ಈ ಪೈಕಿ 33 ಸಾವಿರ ಎರಡು ಸ್ಟ್ರೋಕ್‌ ಆಟೊಗಳಿವೆ.

''ಎಲ್‌ಪಿಜಿ ಕಿಟ್‌ ಅಳವಡಿಕೆಯ 4 ಸ್ಟ್ರೋಕ್‌ ಆಟೊ ಖರೀದಿಗೆ 50 ಸಾವಿರ ರೂ. ಸಬ್ಸಿಡಿ ನೀಡುವಂತೆ ಸರಕಾರಕ್ಕೆ ಮನವಿ ಸಲ್ಲಿಸಲಾಗಿತ್ತು. ಆದರೆ, ಕೇವಲ 30 ಸಾವಿರ ರೂ. ಘೋಷಿಸಲಾಗಿದೆ. ಆಟೊ ದರವು ಶೇ 30ರಷ್ಟು ಹೆಚ್ಚಳವಾಗಿದೆ. ಹಾಗಾಗಿ, 2 ಸ್ಟ್ರೋಕ್‌ ಆಟೊದಿಂದ ಜೀವನ ನಡೆಸುತ್ತಿರುವವರಿಗೆ 30 ಸಾವಿರ ಸಬ್ಸಿಡಿಯಿಂದ ಯಾವುದೇ ಪ್ರಯೋಜನವಾಗುವುದಿಲ್ಲ,''.

-ಎಂ.ಮಂಜುನಾಥ್‌, ಅಧ್ಯಕ್ಷ, ಆದರ್ಶ ಆಟೊ ಮತ್ತು ಟ್ಯಾಕ್ಸಿ ಚಾಲಕರ ಸಂಘ