ಹೊಸದಿಲ್ಲಿ: ನ್ಯಾಯಾಂಗದ ಕುರಿತು ಅವಹೇಳನಕಾರಿ ಹೇಳಿಕೆ ನೀಡಿದ ಕೋಲ್ಕತಾ ಹೈಕೋರ್ಟ್‌ನ ನ್ಯಾಯಮೂರ್ತಿ ಸಿ.ಎಸ್‌.ಕರ್ಣನ್‌ ಅವರ ವಿರುದ್ಧ ಸಿಟ್ಟಿಗೆದ್ದಿರುವ ಹಿರಿಯ ನ್ಯಾಯವಾದಿ ರಾಮ್‌ ಜೇಠ್ಮಲಾನಿ 'ನೀವು ಹೇಳಿದ ಪ್ರತಿಯೊಂದು ಪದವನ್ನೂ ವಾಪಸ್‌ ತೆಗೆದುಕೊಳ್ಳಿ,' ಎಂದು ಸಲಹೆ ನೀಡಿದ್ದಾರೆ. ನ್ಯಾಯಾಂಗ ನಿಂದನೆ ಕೇಸ್‌ಗೆ ಸಂಬಂಧಿಸಿದಂತೆ ಕರ್ಣನ್‌ಗೆ ಜೇಠ್ಮಲಾನಿ ಬಹಿರಂಗ ಪತ್ರ ಬರೆದಿದ್ದು, ಅದರಲ್ಲಿ 'ಭ್ರಷ್ಟಾಚಾರವೇ ಪ್ರಬಲವಾಗಿರುವ ಈ ದೇಶದಲ್ಲಿ ನಮ್ಮ ನ್ಯಾಯಾಂಗವೊಂದೇ ರಕ್ಷ ಣೆ ನೀಡುವಂಥದ್ದು. ಇದನ್ನು ಹಾಳುಗೆಡುವ ಅಥವಾ ದುರ್ಬಲಗೊಳಿಸುವ ಯತ್ನ ಬೇಡ,' ಎಂದು ಎಚ್ಚರಿಸಿದ್ದಾರೆ. ನ್ಯಾಯಾಂಗ ನಿಂದನೆಗೆ ಸಂಬಂಧಿಸಿದಂತೆ ಕರ್ಣನ್‌ ಅವರಿಗೆ ಮಾ.31ರೊಳಗೆ ತನ್ನೆದುರು ಹಾಜರಾಗುವಂತೆ ಜಾಮೀನುಸಹಿತ ಬಂಧನ ಆದೇಶವನ್ನು ಸುಪ್ರೀಂ ಕೋರ್ಟ್‌ ಹೊರಡಿಸಿದೆ. ಈ ಆದೇಶಕ್ಕೆ ಸಡ್ಡು ಹೊಡೆದಿರುವ ಕರ್ಣನ್‌, 'ಈ ಜಾಮೀನುಸಹಿತ ವಾರೆಂಟ್‌ ಎಂಬುದು ಸಂವಿಧಾನಬಾಹಿರವಾಗಿದ್ದು, ನಾನು ಯಾವುದೇ ವಿಚಾರಣೆಗೂ ಹಾಜರಾಗುವುದಿಲ್ಲ. ನನ್ನನ್ನು ದಲಿತ ಎಂಬ ಕಾರಣಕ್ಕೆ ಟಾರ್ಗೆಟ್‌ ಮಾಡಲಾಗುತ್ತಿದೆ' ಎಂದು ಆರೋಪಿಸಿದ್ದಾರೆ. ಈ ಆರೋಪವನ್ನು ತಳ್ಳಿ ಹಾಕಿರುವ ಜೇಠ್ಮಲಾನಿ, 'ಲಾಯರ್‌ ಆಗಿ ನಾನು ನನ್ನಿಡೀ ಬದುಕನ್ನು ಹಿಂದುಳಿದ ವರ್ಗದವರ ಪರವಾಗಿ ಕೆಲಸ ಮಾಡುತ್ತಾ ಕಳೆದಿದ್ದೇನೆ. ಅವರೆಡೆಗೆ ನನಗೆ ಅಪಾರ ಕಾಳಜಿ ಇದೆ. ಆದರೆ ನೀವು ಅವರಂಥವರ ಹೆಸರು ಹಾಳು ಮಾಡುತ್ತಿದ್ದೀರಿ,' ಎಂದು ದೂರಿದ್ದಾರೆ. ನೋಟಿಸ್‌ ನೀಡಿದ್ದರೂ ಮಾ.10ರಂದು ಕೋರ್ಟ್‌ ಅಣತಿಯ ಮೇರೆಗೆ ವಿಚಾರಣೆಗೆ ಹಾಜರಾಗದ ಕರ್ಣನ್‌ ಅವರನ್ನು ಮಾ.31ರ ಬೆಳಗ್ಗೆ 10.30ಕ್ಕೆ ನ್ಯಾಯಾಲಯಕ್ಕೆ ಕರೆ ತರುವಂತೆ ಪಶ್ಚಿಮ ಬಂಗಾಳದ ಪೊಲೀಸ್‌ ಮಹಾನಿರ್ದೇಶಕರಿಗೆ ಏಳು ನ್ಯಾಯಮೂರ್ತಿಗಳ ಪೀಠವು ಆದೇಶ ನೀಡಿ ವಾರೆಂಟ್‌ ಹೊರಡಿಸಿದೆ. ನಿಂದನೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಹೈಕೋರ್ಟ್‌ ಜಜ್‌ ಒಬ್ಬರನ್ನು ಬಂಧಿಸಲು ಸುಪ್ರೀಂ ಕೋರ್ಟ್‌ ಆದೇಶ ಹೊರಡಿಸಿದ್ದು ಭಾರತದ ಇತಿಹಾಸದಲ್ಲೇ ಕರ್ಣನ್‌ ಪ್ರಕರಣ ಮೊದಲಾಗಲಿದೆ.
↧
ಪ್ರತಿ ಪದವನ್ನೂ ವಾಪಸ್‌ ಪಡೆಯಿರಿ; ಕರ್ಣನ್‌ಗೆ ಜೇಠ್ಮಲಾನಿ ಕಿವಿಮಾತು
↧